🔯বঙাইগাঁৱত অভিভাৱক মন্ত্ৰী ৰঞ্জিত দাসৰ পৰ্যালোচনা সভা🔯

🔯বঙাইগাঁৱত অভিভাৱক মন্ত্ৰী ৰঞ্জিত দাসৰ পৰ্যালোচনা সভা🔯

🔯মাকৈৰ পৰা পশুখাদ্য উৎপাদনৰ  উদ্যোগ স্থাপনৰ বাবে যাৱতীয় ব্যৱস্থা গ্ৰহণ কৰিবলৈ উপায়ুক্তক আহ্বান🔯 

📝বঙাইগাঁওঃ ২৬ মাৰ্চঃ বঙাইগাঁও জিলাৰ অভিভাৱক মন্ত্ৰী ৰঞ্জিত দাসে শনিবাৰে জিলাখনত জনস্বাস্থ্য কাৰিকৰী, পঞ্চায়ত আৰু গ্ৰামোন্নয়ন, ৰাজহ বিভাগ আৰু জিলাখনৰ যোগীঘোপাত নিৰ্মাণ কৰি থকা মাল্টি মডেল লজিষ্টিক পাৰ্কৰ কাম-কাজৰ অগ্ৰগতি সম্পৰ্কত এক পৰ্যালোচনা কৰে। বঙাইগাঁও জিলাৰ উপায়ুক্ত কাৰ্যালয়ৰ সভাকক্ষত অনুষ্ঠিত পৰ্যালোচনা সভাত মন্ত্ৰী ৰঞ্জিত দাসে মাল্টি মডেল লজিষ্টিক পাৰ্কৰ কামৰ অগ্ৰগতিৰ সম্পৰ্কত জিলা উপায়ুক্ত ডা:এম এছ লক্ষ্মী প্ৰিয়াৰ পৰা বুজ লয় আৰু অতি শীঘ্ৰে তেওঁ উক্ত স্থানত গৈ কাম-কাজ চোৱাৰ কথা প্ৰকাশ কৰে। এই সন্দৰ্ভত তেওঁৰ সন্মুখত কাম-কাজৰ ভিজুৱেল কিছুমান প্ৰদৰ্শন কৰা হয়। আনহাতে জনস্বাস্থ্য কাৰিকৰী বিভাগৰ অধীনত বঙাইগাঁৱত জল জীৱন মিছন আৰু স্বচ্ছ ভাৰত মিছনৰ কাম-কাজৰো মন্ত্ৰীগৰাকীয়ে বুজ লয়। জিলাখনত যি ৫৩ টা আঁচনি সম্পূৰ্ণ হৈছে, সেই আঁচনিসমূহৰ পৰা সংশ্লিষ্ট ৰাইজে খোৱা পানী নিয়মীয়াকৈ পাই আছে নে নাই সেয়া উপায়ুক্তক নিজে গৈ চাবলৈ মন্ত্ৰী ৰঞ্জিত দাসে আহ্বান জনায়।লগতে কোনেও যাতে খোৱা পানী অপচয় নকৰে তাকো নিৰীক্ষণ কৰিবলৈ মন্ত্ৰী গৰাকীয়ে কাৰ্যবাহী অভিযন্তা শান্তনু সূত্ৰধাৰক নিৰ্দেশ দিয়ে। এই বিভাগৰ অধীনত পানী পৰীক্ষাগাৰত নিৰ্দ্ধাৰিত লক্ষ্যতকৈ অধিক পৰিমাণে পানী পৰীক্ষা কৰা হৈছে বুলি উপায়ুক্ত ডা:লক্ষ্মী প্ৰিয়াই মন্ত্ৰীগৰাকীক জানিবলৈ দিয়ে।  

ইপিন পঞ্চায়ত আৰু গ্ৰামোন্নয়ন মন্ত্ৰী ৰঞ্জিত দাসে জিলাখনত এই বিভাগৰ অধীনত চলি থকা এম জি এন ৰেগা,  প্ৰধানমন্ত্ৰী আৱাস যোজনা (গ্ৰামীণ) আদিৰ কাম-কাজৰো বুজ লয়।এম জি এনৰেগাৰ অধীনত জিলাখনৰ পাৰদৰ্শিতাৰ বিষয়ে জানিব পাৰি বিভাগীয় বিষয়াসকলক তেওঁ প্ৰশংসা কৰে আৰু জিলাখনৰ সফলতা সম্পৰ্কত সামাজিক মাধ্যমত ডাটা আপলোড কৰিবলৈ কয় যাতে  সৰ্বসাধাৰণ ৰাইজে এই বিষয়ে জানিব পাৰে। আনহাতে ৰাজহ বিভাগৰ নতুনকৈ আৰম্ভ কৰা মিছন বসুন্ধৰা সম্পৰ্কত মন্ত্ৰীগৰাকীয়ে বুজ লয়। এই সম্পৰ্কত উপায়ুক্ত ডা:লক্ষ্মী প্ৰিয়াই কয় যে মিছন বসুন্ধৰাৰ কামসমূহ অনলাইনযোগে নিস্পত্তি কৰি থকা হৈছে। ইয়াৰ উপৰি ২৫  মাৰ্চৰ পৰা ৩০ মাৰ্চ লৈ প্ৰতিটো ৰাজহ চক্ৰৰ অধীনত গাঁও পঞ্চায়তৰ কাৰ্যালয়ত ৰাজহ আদালত অনুষ্ঠিত কৰাৰ লগতে ইয়াৰ দ্বাৰা বহু কাম সমাধা কৰি থকা হৈছে। বঙাইগাঁও জিলাৰ কৃষি উৎপাদিত প্ৰধান শস্য মাকৈ বুলি জানিব পাৰি মন্ত্ৰী ৰঞ্জিত দাসে জিলাখনত মাকৈৰ পৰা পশুখাদ্য উৎপাদন কৰা উদ্যোগ এটা নিৰ্মাণ কৰাৰ বাবে যাৱতীয় ব্যৱস্থা গ্ৰহণ কৰিবলৈ উপায়ুক্তক আহ্বান জনায়। পৰ্যালোচনা সভাত জিলা উপায়ুক্তগৰাকীৰ লগতে জিলা উন্নয়ন আয়ুক্ত ভাস্কৰ দাস, জিলা পৰিষদৰ মুখ্য কাৰ্যবাহী বিষয়া নাদিৰা জেচমিন,অতিৰিক্ত উপায়ুক্ত শ্যামল ক্ষেত্ৰ গগৈ, পংকজ চমুৱা, অতিৰিক্ত উপায়ুক্ত তথা উত্তৰ শালমাৰা মহকুমাৰ মহকুমাধিপতি(ভাৰপ্ৰাপ্ত) পাৰ্থ সাৰথি জহৰী ,সদৰ মহকুমাধিপতি মগেন নৰহ আৰু জেনিফাৰ ইয়াচমিন চৌধুৰী, চক্ৰ বিষয়া ৰুণাভ ৰামছিয়াৰী,ৰীতিমনি দাস,সুজাটা গোস্বামী, পল্লৱ জ্যোতি নাথ, জয়ন্ত চক্ৰৱৰ্তী আৰু খণ্ড উন্নয়ন বিষয়াসকল উপস্থিত থাকে।🔯