🔯নাট্যশিল্পী লক্ষীধৰ শৰ্মা🔯

🔯নাট্যশিল্পী লক্ষীধৰ শৰ্মা🔯 

🔯শিল্পী হোৱাই  যেন  আছিল তেওঁৰ বাবে দৰিদ্ৰতাৰ অন্যতম কাৰণ🔯

📝দিগন্ত বৰ্মণ: নলবাৰী 

🔯চিৰ সেউজ পৃথিবীত হেঙুল বলোৱা , সুন্দৰৰ আৰাধনাত সপ্ত ৰঙেৰে নিজকে একাকাৰ কৰি আজীবন শিল্প সাধনাত ব্ৰতী হৈ মমবাতিৰ দৰে আনক পোহৰ বিলাই কোনো কৈফিয়ৎ নিবিচাৰি শেষ হৈ যোৱাৰ দৰে প্ৰচাৰবিহীন যেন এক নষ্টালজিয়া। কল্প ৰূপেৰে সাগৰত বুৰ যোৱা এগৰাকী নাট্যশিল্পী, নাম--- লক্ষীধৰ শৰ্মা। ১৯৪২চনত নলবাৰী জিলাৰ ধৰ্মপুৰ সমষ্টিৰ  মোহখলী  গাঁৱত  জন্মগ্ৰহণ কৰা লক্ষীধৰ শৰ্মা আছিল একেধাৰে নাট্যশিল্পী ,  চিন্তাশীল , কৌতুহলী আৰু বহুমুখী মনৰ অধিকাৰী। ২২ বছৰ কাল মঞ্চত দপদপাই থাকি এতিয়া জীৱনৰ ঊনাশী বছৰীয়া বিয়লি বেলাত নাট্যশিল্পীগৰাকীয়ে অতীতক সুঁৱৰি হুমুনিয়াহ কাঢ়িছে। জীৱনৰ আৰম্ভনীৰে পৰা এইগৰাকী শিল্পীৰ পেচা আছিল যাত্ৰা পাৰ্টী আৰু ভ্ৰাম্যমাণ থিয়েটাৰট অভিনয় । অভিনয়কে মূল সাৰথি কৰি দৰ্শকক মনোৰঞ্জন দি, অভিনয় কৰি ভাল পোৱা লক্ষীধৰ শৰ্মাই ক্ৰমে জৱহাৰজৌতি থিয়েটাৰত ২ বছৰ, মকুন্দ থিয়েটাৰ, অপসৰা থিয়েটাৰ আৰু শংকৰদেৱ নাট্য সমিতিত তিনি বছৰকৈ, পূৰ্বজৌতি থিয়েটাৰ, সুৰদেৱী থিয়েটাৰ আৰু ৰূপজ্যোতি থিয়েটাৰত এবছৰকৈ অভিনয় কৰি দৰ্শকক আমোদ দি আহিছিল । শিল্পীগৰাকীয়ে মুগকুছি যাত্ৰাপাৰ্টীত ৮ বছৰ জড়িত আছিল৷ ত্যাগ-কষ্টৰ মাজেৰে সৰ্বমুঠ ২২ বছৰ কাল কেৱল অভিনয়তে জীৱনৰ সৰ্বোচ্চ উজাৰি দি  শিল্পীগৰাকীয়ে সম্প্ৰতি  বৰ কষ্টেৰে জীৱন নিৰ্বাহ কৰিবলগীয়া হৈছে । তথাপি সম্পূৰ্ণ ভগ্ন দেহা আৰু মনেৰে হ’লেও মৃত্যুৰ আগমুহূৰ্তলৈকে  শিল্প সাধনা কৰি যোৱাৰ পণ লৈছে তেওঁ৷ দোকান এখনকে বৰ্তমান জীৱিকাৰ সমল হিচাপে লোৱা শিল্পীগৰাকীয়ে তাহানি বিভিন্ন অনুষ্ঠান- প্ৰতিষ্ঠানৰ পৰা সন্মান  লাভ কৰিছিল যদিও সেই বঁটা- বাহন আৰু সম্বৰ্ধনা লাভৰ মুহূৰ্তবোৰ তেওঁৰ বাবে এতিয়া নষ্টালজিয়া। কোনো চৰকাৰী আঁচনিয়ে ঢুকি নোপোৱা পৰা নাট্যশিল্পীগৰাকীয়ে অকপতে আজি ক’বলৈ বাধ্য হৈছে--- শিল্পী হোৱাই  যেন  আছিল তেওঁৰ বাবে দৰিদ্ৰতাৰ অন্যতম কাৰণ ।🔯