NEWS 4 BONGAIGAON

👉অখিল গগৈৰ মুক্তিৰ দাবীৰে টীয়কত অসম প্ৰেমী যুৱ-ছাত্ৰ সমাজৰ সংবাদ মেল

👉কৃষক মুক্তি সংগ্ৰাম সমিতিৰ প্ৰতিবাদ

                                     টীয়কঃ ৮জুনঃ 

🔯টীয়কস্থিত অসম প্ৰেমী যুৱ-ছাত্ৰ সমাজৰ কেন্দ্ৰীয় কাৰ্যালয়ত সোমবাৰে অসম প্ৰেমী যুৱ ছাত্ৰ সমাজে কৃষক নেতা অখিল গগৈৰ মুক্তি তথা অসমৰ কেইবাটাও জলন্ত সমস্যা সমাধানৰ দাবীত এক সংবাদ মেল সম্বোধন কৰে। সংবাদ মেলত উপদেষ্টা মনোজ গগৈয়ে সাংবাদিক সকলক সম্বোধি কয় যে ৰাজনৈতিক মেৰপাকত বন্দী হৈ অসমীয়া জন জীৱনৰ এক সংগ্ৰামী সত্বা অখিল গগৈ কাৰাগাৰত ১৮০ দিন অৰ্থাৎ ছমাহ ধৰি বন্দী হৈ আছে। উল্লেখ্য  যে ৰাষ্ট্ৰীয় অনুসন্ধানকাৰী সংস্থা চমুকৈ নিয়া(NIA) ই মাওবাদীৰে সৈতে সম্পৰ্ক থকা অভিযোগত গ্ৰেপ্তাৰ কৰিছিল অখিল গগৈক। কিন্তু ২৯ মে'ত নিয়া ( NIA )ই আদালতত তথ্য প্ৰমাণৰ অবিহনে কেৱল অভিযোগ আৰোপ কৰি প্ৰায় ৪০ পৃষ্ঠা চাৰ্জশ্বীট দাখিল কৰে। এই ৪০ পৃষ্ঠাৰ ১৯ পৃষ্ঠা অভিযোগ হোৱাৰ বিপৰীতে বাকী ২১ পৃষ্ঠা বিভিন্ন নথি সংলগ্ন। ইপিনে সমগ্ৰ বিশ্বতে কোভিড- ১৯ ৰ ত্ৰাসৰ বাবে উচ্চতম ন্যায়ালয়ৰ পৰামৰ্শ অনুসৰি বিভিন্ন ৰাজ্যত কাৰাবন্দী সকলক মুক্তি দিছে। কিন্তু তাৰ বিপৰীতে জামিন পোৱাৰ পিছতো পুনৰ গোচৰ ৰুজু কৰি অখিল গগৈক ১৮০ দিনে কাৰাবন্দী কৰি ৰখাতো এক ৰাজনৈতিক ষড়যন্ত্ৰ। ইয়াৰ যোগেদি চৰকাৰে মানৱাধিকাৰ ভংগ কৰাৰ ওপৰিও গণতন্ত্ৰকো ধূলিসাৎ কৰাৰ লগতে এক প্ৰতিশোধ পৰায়ণ মনোবৃত্তিহে দাঙি ধৰিছে ধৰিছে বুলি অভিযোগ কৰে ৷ 

উপদেষ্টাগৰাকীয়ে আৰু অভিযোগ কৰি কয় যে অসমীয়া সমাজ জীৱনৰ এক প্ৰতিবাদী সত্বা অখিল গগৈক দীঘলীয়া ভাৱে বন্দী কৰি থোৱাৰ সুযোগ লৈ বিজেপি চৰকাৰে বিভিন্ন ধৰণৰ জনবিৰোধী কাম হাতত লৈছে। তাৰে মাজতে পূবৰ আমাজন হিচাপে খ্যাত দিহিং পাটকাই বৰ্ষাৰণ্যৰ চেলেকি সংৰক্ষিত বনাঞ্চলত কয়লাৰ মুক্ত খননৰ বাবে অনুমতি প্ৰদান কৰিছে, ডিব্ৰু ছৈখোৱা ৰাষ্ট্ৰীয় উদ্যানৰ সাতটা স্থানত অইল ইণ্ডিয়া খনন আৰু হাইড্ৰকাৰ্বন পৰীক্ষণৰ বাবে গ্ৰহণ কৰা হৈছে হঠকাৰী সিদ্ধান্ত, অখিল গগৈক কাৰাবন্দী কৰি ৰাখি মুকলি কৰা হৈছে ইখনৰ পিছত সিখন টোলগেট। বিজনী, ৰহা, ডবকা, সোণাপুৰকে ধৰি চাৰিখন টোলগেট মুকলি কৰাৰ লগতে আন চাৰিখন টোলগেট নিৰ্মাণৰ কাম চলি আছে ৷ অৰুণাচল প্ৰদেশৰ দিবাং নদীত ৬২২২.১৬ হেক্টৰ বনভূমি ধংস কৰি দিবাং জলবিদ্যুৎ প্ৰকল্প নিৰ্মাণ কৰিবলৈ লোৱা হৈছে। এই প্ৰকল্পই তিনিচুকীয়া জিলাত ভয়াৱহ জলবোমাৰ ৰূপ লোৱাৰ আশংকা বেছি ৷ সেইদৰে অখিল গগৈৰ কাৰাবন্দীত্বৰ সুযোগ লৈ নামনি সোৱণশিৰি বৃহৎ নদীবান্ধৰ কাম চলি আছে। সেয়ে চৰকাৰখনত জনগণই বিৰোধ কৰা কৰ্মৰ পৰা আঁতৰত থাকিবলৈ সকিয়নি দিয়াৰ লগতে অসমীয়া জন জীৱনৰ প্ৰতিবাদী কন্ঠ তথা ভাৰতীয় নাগৰিক অখিল গগৈক মানৱীয় দুৰ্যোগৰ এই সময়ত সংবেদনশীল দৃষ্টিৰে সকলো কথা বিশ্লেষণ কৰি তেওঁ আৰু তেওঁৰ সহযোগীসকলক অনতি পলমে মুক্তি দিবলৈ দাবী জনায় । 

ইপিনে টীয়কৰ মাজমজিয়াত ৰাষ্ট্ৰীয় ঘাইপথৰ দাঁতিত কৃষক মুক্তি সংগ্ৰাম সমিতিৰ যোৰহাট জিলাৰ সভাপতি মৃদুল বৰাৰ উপস্থিতত টীয়ক মহকুমা সমিতিৰ উদ্যোগত অখিল গগৈকে ধৰি কা বিৰোধী আন্দোলনৰ ৰোষত পৰি কাৰাবন্দী হৈ থকা নেতাসকলক মুক্তিৰ দাবীত হাতে হাতে প্লেকাৰ্ড লৈ প্ৰতিবাদ সাব্যস্ত কৰে।