🔯গোৱালপাৰাৰ ল'ৱাৰ চোটিপাৰা হাইস্কুলৰ ছাত্ৰ-ছাত্ৰীৰ বঙাইগাঁও ভ্ৰমণ🔯

🔯গোৱালপাৰাৰ ল'ৱাৰ চোটিপাৰা হাইস্কুলৰ ছাত্ৰ-ছাত্ৰীৰ বঙাইগাঁও ভ্ৰমণ🔯

📝বঙাইগাঁওঃ ১৮ মে': ভ্ৰমণৰ জৰিয়তে নিজৰ এলেকাৰ বাহিৰৰ ঠাই বা নিকটতম জিলা বা অন্য দেশলৈ ভ্ৰমণে ছাত্ৰ-ছাত্ৰীক বাহিৰৰ পৃথিৱীখনৰ লগত চিনাকী কৰাই দিয়ে আৰু তাৰ দ্বাৰা প্ৰত্যক্ষভাৱে ছাত্ৰ-ছাত্ৰীসকলে জ্ঞান আহৰণ কৰে।সেইবাবেই হয়তো শিক্ষা বিভাগৰ তৰফৰ পৰা ছাত্ৰ-ছাত্ৰীক নিজৰ জিলাৰ বাহিৰে আন জিলালৈ ভ্ৰমণলৈ নিয়াৰ বাবে বিভিন্ন ব্যৱস্থা গ্ৰহণ কৰিছে। ইয়াৰে অংশ হিচাপে বুধবাৰে গোৱালপাৰাৰ ল'ৱাৰ চোটিপাৰা হাইস্কুলৰ ছাত্ৰ-ছাত্ৰীসকলে বঙাইগাঁও জিলা ভ্ৰমণলৈ আহে। উক্ত বিদ্যালয়ৰ সহকাৰী প্ৰধান শিক্ষকজনৰ পৰা জানিব পৰা মতে ৩০ কিলোমিটাৰৰ ভিতৰত পাইকানৰ নিকটৱৰ্তী ল'ৱাৰ চোটিপাৰা হাইস্কুলখনেই এখন স্কুল।গাৰো মাধ্যমৰ (নৱম আৰু দশম-দুটা ক্লাছৰ বাবে কেৱল ইংৰাজী মাধ্যম) বিদ্যালয়খনৰ ছাত্ৰ-ছাত্ৰী ৮০০গৰাকী। চৰকাৰী শিক্ষক ৬ গৰাকী।কমিউনিটি শিক্ষক কেইবাগৰাকী লৈ বিদ্যালয়ৰ শ্ৰেণী চলাই থকা বুলি সহকাৰী প্ৰধান শিক্ষকগৰাকীয়ে জানিবলৈ দিয়ে। এইখন বিদ্যালয়তে বিগত গুণোৎসৱত বহিৰ্মূল্যায়ক হিচাপে আহিছিল অসমৰ মুখ্য সচিৱ জিষ্ণু বৰুৱা(আই এ এছ)।তেওঁ বিদ্যালয়খনৰ ছাত্ৰ-ছাত্ৰীসকলে অন্য ঠাইতো দূৰৰ কথা গোৱালপাৰা চহৰখনো নেদেখা বুলি জানিব পাৰি ছাত্ৰ-ছাত্ৰীসকলক নিকটৱৰ্তী জিলালৈ ভ্ৰমণলৈ নিয়াৰ বাবে পৰামৰ্শ দিয়ে। তাৰেই ফল স্বৰূপে সেই  বিদ্যালয়ৰে ১০ গৰাকী ছাত্ৰ-ছাত্ৰী(৮গৰাকী ছাত্ৰী আৰু দুগৰাকী ছাত্ৰ) সহকাৰী প্ৰধান শিক্ষক ক্ৰনিকচন ডি মোমিন আৰু এগৰাকী কমিউনিটি শিক্ষয়িত্ৰী(চেবা চাংমা)ৰ সৈতে বঙাইগাঁও জিলালৈ আহে। তেওঁলোকক নেতৃত্ব দিয়ে বালিজানা ৰাজহ চক্ৰৰ চক্ৰ বিষয়া অমৰজ্যোতি নাথে।

বঙাইগাঁও জিলাৰ আৱৰ্ত ভৱনত উপস্থিত হোৱাত উপায়ুক্ত নৱদ্বীপ পাঠকে তেওঁলোকক আন্তৰিকভাৱে স্বাগতম জনায়।চক্ৰ বিষয়া আৰু শিক্ষক দুগৰাকীক গামোচাৰে সম্বৰ্ধনা জনায় আৰু ছাত্ৰ-ছাত্ৰীসকলক একোটা উপহাৰ দিয়ে। আৱৰ্ত ভৱনত উপায়ুক্তৰ সৈতে উপস্থিত আছিল অতিৰিক্ত উপায়ুক্ত পংকজ চমুৱা আৰু সহকাৰী আয়ুক্ত শ্যামাশ্ৰী শইকীয়া।শিক্ষক তথা ছাত্ৰ-ছাত্ৰীৰ দলটোৱে আৱৰ্ত ভৱনত দুপৰীয়াৰ আহাৰ গ্ৰহণ কৰাৰ পিছত সহকাৰী আয়ুক্তগৰাকীৰ সৈতে বঙাইগাঁও পৰিৱেশ উদ্যানত থকা পাব্লিক একুৱাৰিয়াম দৰ্শনৰ বাবে যায় । একুৱাৰিয়াম দৰ্শনৰ পিছত তেওঁলোকক বঙাইগাঁও তেল শোধনাগাৰলৈ লৈ যোৱা হয়। তেল শোধনাগাৰ চোৱাৰ পিছত তেওঁলোকে গোৱালপাৰা অভিমুখে প্ৰত্যাৱৰ্তন কৰিব।🔯