NEWS 4 BONGAIGAON

👉বঙাইগাঁও  চহৰত বান 

👉এছডিআৰএফ বাহিনীৰ উদ্ধাৰ অভিযান

👉বানাক্ৰান্তৰ বাবে তিনিটা আশ্ৰয় শিবিৰ মুকলি 

👉কোৱাৰেণ্টাইন কেন্দ্ৰৰ চৌহদো জলমগ্ন 

 🔯বঙাইগাঁওঃ ২৭ জুনঃ 

🔯বঙাইগাঁও চহৰত কৃত্ৰিম বানৰ সমস্যাই জটিলৰূপ ধাৰণ কৰিছে।কেবাদিন ধৰি হৈ থকা বৰষুণে পঁচিশটা ৱাৰ্ড বিশিষ্ট বঙাইগাঁও চহৰৰ মুখ্য পথৰ লগতে বিভিন্ন  পথ সমূহত কৃত্রিম বানৰ সৃষ্টি কৰিছে ৷ কৃত্ৰিম বানৰ কৱলত পৰিছে চহৰখনৰ নিউ বঙাইগাঁওস্থিত ৰে'লৱে ইনষ্টিটিউট কোৱাৰেণ্টাইন কেন্দ্ৰৰ চৌহদো ৷ ধাৰাষাৰ বৰষুণৰ ফলত বঙাইগাঁও চহৰ আৰু চহৰ খনৰ ৰে'লেৱে আৱাসিক অঞ্চল সমূহ পানীৰ তলত বুৰ গৈছে ৷ কিন্তু সকলোতকৈ জটিল ৰূপ ধাৰণ কৰিছে চহৰখনৰ ১১ নং ৱাৰ্ডৰ পালপাৰা - বাবুপাৰা অঞ্চল ৷ উক্ত অঞ্চলৰ প্ৰায় শতাধিক পৰিয়ালৰ ঘৰৰ ভিতৰত পানী সোমাইছে ৷ যাৰ ফলস্বৰূপে অঞ্চলবাসী ৰাইজৰ মাজত এক হাহাকাৰ পৰিস্থিতিৰ সৃষ্টি হৈছে ৷ যোৱা নিশাৰ পৰাই অঞ্চলটোত পানী সোমোৱা আৰম্ভ হয় ৷ উল্লেখ্য যে অঞ্চলটোৰ মাজেৰে বৈ যোৱা টেকনঝৰা নদীৰ বাঢ়নী পানীয়ে সৃষ্টি কৰিছে এই বানপানীৰ ৷ ইতিমধ্যে জলবন্দী হৈ পৰা পৰিয়াল সমূূহক জিলা প্ৰশাসনে এছডিআৰএফৰ সহায়ত উদ্ধাৰ কৰি নিৰাপদ স্থানলৈ আনিছে ৷ লগতে বানাক্ৰান্ত পৰিয়ালসূহৰ আশ্ৰয়ৰ বাবে ৰে'লৱে উচ্চতৰ মাধ্যমিক বিদ্যালয়, নেতাজী বিদ্যা নিকেটন আৰু ৰবীন্দ্ৰ ভৱনত আশ্ৰয় শিবিৰ স্থাপন কৰা হৈছে ৷ আশ্ৰয় শিবিৰত যোগান ধৰা হৈছে খাদ্য সামগ্ৰী ৷ 

ইপিনে চহৰখনৰ ১৩ নম্বৰ ৱাৰ্ডৰ অন্তৰ্গত গুৰুনানক নগৰ, জ্যোতি নগৰ, বঙাইগাঁও ষ্টেডিয়াম, আৰক্ষী ৰিজাৰ্ভৰ দক্ষিণ-পশ্চিমাংশ, ১২ নম্বৰ ৱাৰ্ডৰ অন্তৰ্গত কদমতলী-শালবাৰী (উত্তৰ আৰু দক্ষিণ), বিবেকানন্দ পল্লী, পাইপ লাইন, বৰপাৰা পাহাৰতলী, নতুনপাৰা আদি এলেকা কৃত্রিম বানৰ কবলত পৰিছে। নতুনপাৰা, পাইপলাইন আদি অঞ্চলৰ বহু পৰিয়ালৰ গৃহ জলমগ্ন হৈ পৰিছে ৷ জলমগ্ন হৈ পৰিছে বঙাইগাঁও পৰিৱেশ উন্নয়ন উদ্যান, বঙাইগাঁও আই টি আই চৌহদ আদিও ৷ আশ্বাৰ্যজনক কথা এয়ে যে চহৰখনৰ অধিকাংশ উপপথত পানী নিস্কাশনৰ ব্যবস্থা নথকাত চহৰখনৰ ১২ নম্বৰ ৱাৰ্ড, ১৩ নম্বৰ ৱাৰ্ডৰ সম্ভ্ৰান্ত আৱাসীৰ ঘৰৰ চোতালৰ লগতে মাৰ্বল-টাইলচ লোগোৱা লোকৰ আৱাস গৃহত পানী আৱদ্ধ হৈ পৰাত অঞ্চলটোৰ লোকসকল একপ্ৰকাৰ জলবন্দী হৈ পৰিছে। ইপিনে চহৰখনৰ "চাপাগুৰি-উত্তৰ শালমাৰা(বীৰ চিলাৰায় পথ)" মুখ্যপথৰ দুয়োকাষে পকী নলা থাকিলেও নলাটোৰ পৰা অতিৰিক্ত পানী বিজ্ঞান সন্মতভাৱে নিস্কাশনৰ ব্যৱস্থা নথকাত ধাৰাষাৰ বৰষুণৰ সময়ত হোটেল জাহ্নবীৰ পৰা পালসিং গেৰেজ এলেকাৰ পথচোৱাত পানী জমা হৈ পথচাৰী সকলক অসুবিধাত পেলাই আহিছে। 

অন্যহাতে মূষলধাৰ বৰষুণৰ সময়ত মুখ্য নলাত পানী উফন্দি উঠি কদমতলী (শালবাৰী) হৈ এই পানী টেকনঝৰা নৈত পৰাত দীৰ্ঘদিন ধৰি কদমতলীবাসী কৃত্রিম বানৰ সমস্যাত ভুগি আহিছে। একেদৰে বঙাইগাঁও চহৰৰ দক্ষিণৰ বৰপাৰাৰ পাহাৰতলীত কৃত্রিম বানে অঞ্চলটোৰ লোকক জ্বলা-কলা খুৱাইছে। কৃত্রিম বানপানীৰ কবলত পৰিছে বঙাইগাঁৱৰ নিউ কলনি এলেকা। অন্যহাতে নিউ বঙাইগাঁৱৰ পৰা ৰে'লৱে ৱৰ্কশ্বপলৈ যোৱা পথছোৱাত পানী জমা হোৱাত ৰে'লৱে ৱৰ্কশ্বপ লৈ অহা যোৱা কৰা ৰে'লৱে কৰ্মচাৰীৰ লগতে সেই পথেৰে অহা- যোৱা কৰা পথচাৰী আৰু অৰ্ধসামৰিক বাহিনীৰ কোম্পানীৰ কেম্পত থকা সকলক অসুবিধাত পেলাইছে। একেদৰে বঙাইগাঁও জিলা প্ৰশাসনে কোৱাৰেণ্টাইন চেন্টাৰ হিচাপে লোক ৰখা নিউ বঙাইগাঁও ৰে'লৱে ইনষ্টিটিউটৰ চৌদিশে পানী জমা হৈ পৰিছে । ইপিনে জিলা প্ৰশাসনে প্ৰকাশ কৰা তথ্য মতে জিলাখনত বৰ্তমানলৈকে আঠ শতাধিক লোক বানৰ কৱলত পৰিছে ৷ বানাক্ৰান্তৰ বাবে স্থাপন কৰা হৈছে চাৰিটাকৈ  আশ্ৰয় শিবিৰ ৷ এই শিবিৰত ৫৬৪ জন বানাক্ৰান্তই আশ্ৰয় গ্ৰহণ কৰিছে ৷ আশ্ৰয় শিবিৰত চাউল, ডাইল,নিমখ, মিঠাতেল যোগান ধৰা হৈছে ৷ ৭৭ টা পৰিয়ালক নিৰাপদ স্থানলৈ স্থানান্তৰিত কৰা হৈছে 🔯