NEWS 4 BONGAIGAON

👉উচ্চতৰ মাধ্যমিক চূড়ান্ত পৰীক্ষাৰ ফলাফল

👉বঙাইগাঁৱৰ পাঁচখন শিক্ষানুষ্ঠানৰ এশ শতাংশ উত্তীর্ণ

                বঙাইগাঁওঁঃ ২৬ জুনঃ 

🔯বৃহস্পতিবাৰে ঘোষিত উচ্চতৰ মাধ্যমিক চূড়ান্ত পৰীক্ষাৰ ফলাফলে বঙাইগাঁও চহৰ তথা জিলাবাসীৰ বাবে সুখবৰ কঢ়িয়াই আনে ৷ ঘোষিত ফলাফল অনুসৰি জিলাখনৰ তিনিগৰাকীকৈ শিক্ষাৰ্থীয়ে ৰাজ্যখনৰ ভিতৰত তৃতীয়, সপ্তম আৰু নৱম স্থান দখল কৰাৰ লগতে বঙাইগাঁও চহৰৰ পাঁচখনকৈ শিক্ষানুষ্ঠানৰ ছাত্ৰ-ছাত্ৰীৰ উত্তীৰ্ণৰ হাৰ আছিল এশ শতাংশ ৷  এইদৰে বঙাইগাঁও চহৰৰ পাঁচখনকৈ শিক্ষানুষ্ঠানৰ উচ্চতৰ মাধ্যমিক কলা আৰু বিজ্ঞান শাখাত শিক্ষাৰ্থী উত্তীৰ্ণৰ এশ শতাংশ হাৰে এতিয়া আন এক সুখবৰ কঢ়িয়াই আনিছে জিলাখনলৈ। ইয়াৰে বেচৰকাৰী খণ্ডৰ আগশাৰীৰ শিক্ষানুষ্ঠান বঙাইগাঁও উচ্চতৰ মাধ্যমিক বিদ্যালয় (ইংৰাজী মাধ্যম) ৰ পৰা উচ্চতৰ মাধ্যমিক চূড়ান্ত পৰীক্ষাৰ কলা আৰু বিজ্ঞান শাখাত অৱতীৰ্ণ আটাইকেইগৰাকী পৰীক্ষাৰ্থী উত্তীর্ণ হৈছে। উল্লেখ্য এইবেলি বিদ্যালয়খনৰ পৰা কলা শাখাত মুঠ ২১গৰাকী পৰীক্ষাৰ্থী অৱতীৰ্ণ হৈছিল আৰু সকলো পৰীক্ষাৰ্থী উত্তীর্ণ হৈছে। ইয়াৰে ভিতৰত ফাৰহানুৰ ৰহমানে ৰাজ্যখনৰ ভিতৰত তৃতীয় স্থান দখল কৰাৰ বিপৰীতে অজস্বেতা বশিষ্ঠ গোস্বামীয়ে নৱম স্থান দখল কৰিবলৈ সক্ষম হৈছে। বিদ্যালয়খনৰ মুঠ অৱতীৰ্ণ পৰীক্ষাৰ্থীৰ ২০ গৰাকীয়ে প্ৰথম বিভাগ আৰু এগৰাকীয়ে দ্বিতীয় বিভাগত উত্তীর্ণ হয়। লগতে কলা শাখাত  ছগৰাকী ছাত্রই ষ্টাৰ মাৰ্ক পোৱাৰ বিপৰীতে নগৰাকী ছাত্রই ডিষ্টিংচন লাভ কৰিছে।

ইপিনে বিদ্যালয়খনৰ পৰা উচ্চতৰ মাধ্যমিক (বিজ্ঞান) শাখাত মুঠ অৱতীৰ্ণ ১৫ গৰাকী পৰীক্ষাৰ্থীৰ সকলোৱে প্ৰথম বিভাগত উত্তীর্ণ হৈছে। বিজ্ঞান শাখাত উত্তীর্ণ পৰীক্ষাৰ্থীৰ দুগৰাকীয়ে ডিষ্টিংচন আৰু নগৰাকীয়ে ষ্টাৰ মাৰ্ক অৰ্জন কৰিছে। আনহাতে বঙাইগাঁও চহৰৰ চৰকাৰী খণ্ডৰ শিক্ষা প্রতিষ্ঠান বীৰঝৰা উচ্চতৰ মাধ্যমিক বিদ্যালয়ৰো উত্তীৰ্ণৰ হাৰ এশ শতাংশ। এইবেলি বীৰঝৰা উচ্চতৰ মাধ্যমিক বিদ্যালয়ৰ পৰা উচ্চতৰ মাধ্যমিক (বিজ্ঞান) শাখাত মুঠ ৫৪ গৰাকী পৰীক্ষাৰ্থীয়ে অৱতীৰ্ণ হৈছিল আৰু আটাইকেইগৰাকী পৰীক্ষাৰ্থীয়ে উত্তীর্ণ হৈছে। ইয়াৰে ভিতৰত ২০ গৰাকী পৰীক্ষাৰ্থীয়ে প্ৰথম বিভাগ ,৩২ গৰাকী পৰীক্ষাৰ্থীয়ে দ্বিতীয় বিভাগত আৰু দুগৰাকীয়ে তৃতীয় বিভাগত উত্তীর্ণ হৈছে। অন্যহাতে বিদ্যালয়খনৰ ভকেচনেল শাখাত অৱতীৰ্ণ আঠ গৰাকী পৰীক্ষাৰ্থীৰ আটাইকেইজনে উত্তীর্ণ হৈছে। ইয়াৰে দুজনে প্ৰথম আৰু ৬ জনে দ্বিতীয় বিভাগত উত্তীর্ণ হৈছে । ইপিনে বঙাইগাঁও ৰে'লৱে উচ্চতৰ মাধ্যমিক বিদ্যালয়ৰ পৰা উচ্চতৰ মাধ্যমিক (বিজ্ঞান ) চূড়ান্ত পৰীক্ষাত মুঠ অৱতীৰ্ণ ৩০ গৰাকী পৰীক্ষাৰ্থীৰ সকলোৱে উত্তীর্ণ হৈছে। উত্তীর্ণ হোৱা সকলৰ ভিতৰত ১৩জনে প্রথম বিভাগত, ১৫ জনে দ্বিতীয় বিভাগত আৰু দুগৰাকীয়ে তৃতীয় বিভাগত উত্তীর্ণ হৈছে। তদুপৰি বঙাইগাঁও জুনিয়ৰ কলেজৰ কলা শাখাত এশ শতাংশ উত্তীর্ণ হৈছে। এইবেলি কলেজখনৰ পৰা মুঠ ৩৯ গৰাকী পৰীক্ষাৰ্থী অৱতীৰ্ণ হৈছিল আৰু ইয়াৰ ভিতৰত ৮ গৰাকীয়ে প্রথম বিভাগত, ১৮ গৰাকীয়ে দ্বিতীয় বিভাগত আৰু ১৩ গৰাকীয়ে তৃতীয় বিভাগত উত্তীর্ণ হৈছে। বিদ্যালয় - মহাবিদ্যালয়কেইখনৰ এই আশাপ্ৰদ ফলাফলে বৌদ্ধিক সমাজক আনন্দিত কৰি তুুুলিছে ৷🔯