🔯চিৰাং জিলাৰ পথৰ বিধ্বস্ত ৰূপ🔯

🔯চিৰাং জিলাৰ পথৰ বিধ্বস্ত ৰূপ🔯

🔯পথৰ ওপৰত গাঁত নে গাঁতৰ ওপৰত পথ নোৱাৰি ধৰিব🔯 

🔯যমৰ যাতনাত ভুগিছে সৰ্বসাধাৰণ ৰাইজঃ নিৰ্বিকাৰ সংশ্লিষ্ট পক্ষ🔯

📝বঙাইগাঁওঃ ১০ জুনঃ বিটিআৰৰ চিৰাং জিলাৰ এটা পথকলৈ সম্প্ৰতি যমৰ যাতনাত ভুগিছে পথটোৰে নিতৌ অহা - যোৱা কৰা হেজাৰ হেজাৰ লোক ৷ পথটোৱে এনে এটা বিধ্বস্ত ৰূপ পাইছে যে পথৰ ওপৰত গাঁত হৈছে নে গাঁতৰ ওপৰত পথটো আছে অনুমান কৰাটো কঠিন হৈ পৰিছে ৷ উল্লেখ্য যে বঙাইগাঁও বিধান সভা সমষ্টিৰো অন্তৰ্গত এই পথটোকলৈ এতিয়া ক্ষোভিত হৈ পৰিছে বৃহত্তৰ অঞ্চলবাসী ৷ চিৰাং জিলাৰ চাপাগুৰি চ'কৰ ৰাষ্ট্ৰীয় ঘাই পথৰ পৰা উত্তৰ অঞ্চললৈ যোগাযোগৰ অন্যতম গুৰুত্বপূৰ্ণ মূল পথটো সম্প্ৰতি একেবাৰে জৰাজীৰ্ণ ৰূপ পাইছে ৷ ৰৌমাৰী, হাগ্ৰামা দলং , আমগুৰী হৈ উত্তৰ অঞ্চলৰ আমটেকা লৈ যোৱা এই পথটোৰ বিধ্বস্ত ৰূপে জ্বলাকলা খুৱাইছে সৰ্বসাধাৰণ ৰাইজক ৷ পথটোৰ মাজত সৃষ্টি হৈছে বৃহৎ- বৃহৎ গাতৰ  ৷ দীৰ্ঘদিন ধৰি মেৰামতিৰ অভাৱত নিতৌ বিধ্বস্ত ৰূপ লৈছে পথটোৱে ৷ কিন্তু সংশ্লিষ্ট পক্ষ এই ক্ষেত্ৰত  নিৰ্বিকাৰ ৷ পথটো মেৰামতিৰ বাবে ৰাইজে দাবী জনাই আহিছে যদিও কোনো গুৰুত্ব দিয়া নাই প্ৰশাসনেও ৷ যেন কৰিবলগীয়া কাৰো একো নাই ৷ ফলত ইয়াৰ কুফল ভোগ কৰিবলগীয়া হৈছে পথটোৰে  অহা যোৱা কৰা পথচাৰী ৰাইজ, ছাত্ৰ - ছাত্ৰীৰ লগতে গাড়ী -মটৰৰ যাত্ৰী তথা বাহন চালকসকলে ৷ চিৰাং জিলাৰ কাজলগাঁও লোকনিৰ্মাণ বিভাগৰ  কাৰ্যবাহী বিষয়া কাৰ্যালয়ৰ  অধীনৰ  চাপাগুৰি ৰাষ্ট্ৰীয় ঘাইপথৰ পৰা ভূটান ৰাষ্ট্ৰলৈ যোৱা সংযোগী পথটোৰ মাজত বৃহৎ বৃহৎ গাঁত সৃষ্টি হোৱাত পথটোৱে চলাচল কৰা সকলো প্ৰকাৰৰ যান - বাহন চলাচল কৰাত অসুবিধাৰ সৃষ্টি হোৱাৰ লগতে জহি খহি যোৱা এই বিধ্বস্ত পথৰ বাবে বহু লোক দূৰ্ঘটনাত পতিত  হৈছে ৷ উক্ত পথটোৰে বিভিন্ন বিদ্যালয়ৰ ছাত্ৰ,ছাত্ৰী,শিক্ষকৰ লগতে ব্যৱসায়ী,চৰকাৰী চাকৰিয়াল আদিৰ লগতে চিকিৎসালয়লৈ ৰোগীসকল অহা যোৱা কৰিব লগা হোৱাত বহু সমস্যা সৃষ্টি হয় বুলি ৰাইজে জানিব দিছে ৷  

উল্লেখ্য যে পথটোৱে জৰাজীৰ্ণ ৰূপ পোৱাৰ ক্ষেত্ৰত পথটোৰে দিনে নিশাই অতিমাত্ৰা ওজনৰ শিল, বালি কঢ়িওৱা ডাম্পাৰৰ লগতে ট্ৰেক্টৰৰ অৱদান সকলোতকৈ বেছি বুলি স্থানীয় ৰাইজে অভিযোগ উত্থাপন কৰিছে ৷ কাৰণ দৈনিক ডাম্পাৰ সমূহে অতিমাত্ৰা শিল,বালি, মাটি আদি কঢ়িয়াই লৈ যোৱাৰ ফলত পথটোৰ মাজত পুখুৰী সদৃশ বৃহৎ বৃহৎ গাঁত সৃষ্টি হোৱাত পথটোৰে চলাচল  কৰাটো অনুপযোগী হৈ পৰিছে বুলি স্থানীয় ৰাইজ, পথাচাৰী তথা টেম্প চালকসকলে প্ৰকাশ কৰে ৷ কিন্তু এই লৈ জিলা প্ৰশাসনে কোনো ব্যৱস্থা গ্ৰহণ নকৰাৰ অভিযোগ উঠিছে ৷ একেদৰে জিলাখনৰ বিভাগীয় কৰ্তৃপক্ষইও কোনো গুৰুত্ব নিদিয়া বুলি জানিব দিয়ে ৰাইজে ৷ উত্থাপিত অভিযোগ মতে প্ৰতিখন ডাম্পাৰৰ পৰা তথা শিল- বালি মহলদাৰৰ পৰা একাংশ দল,  সংগঠন আৰু চৰকাৰী বিভাগৰৰ বিষয়া- কৰ্মচাৰীয়ে মোটা অংকৰ ধন লৈ অহাৰ বাবেই পথটোৱে জৰাজীৰ্ণ ৰূপ ধাৰণ কৰাৰ পিচতো সকলোৱে নিৰ্বিকাৰ ভূমিকা গ্ৰহণ কৰি আহিছে ৷ পথটো মেৰামতিৰ বাবে দল - সংগঠনৰ ভূমিকাও পুুতৌজনক হিচাপে বিৱেচিত হৈ আহিছে ৷ আনহাতে ডাম্পাৰসমূহে অত্যাধিক পৰিমাণৰ শিল, বালি কঢ়িয়াই আহিছে যদিও বন বিভাগ, পৰিবহণ বিভাগে কোনো ব্যৱস্থা গ্ৰহণ নকৰাৰ অভিযোগ উঠিছে ৷ স্থানীয় ৰাইজে জাম্পাৰৰ বাবেই পথটো জহি খহি যোৱা বুলিও অভিযোগ উত্থাপন কৰিছে ৷ ইপিনে ৰাজ্য  চৰকাৰেও কোনো গুৰুত্ব প্ৰদান নকৰাৰ লগতে বৰ্তমানৰ ইউ পি পি এলৰ প্ৰমোদ বড়ো নেতৃত্বাধীন বিটিচি প্ৰশাসনেও কোনো কানসাৰ নিদিয়াত সমগ্ৰ পথটো সম্পূৰ্ণ ভাবে জহি খহি যোৱাৰ উপক্ৰম হৈছে ৷ লগতে পথটোৱে বৰ্তমান বিটিআৰৰ উন্নয়নৰ নমুনাক উদঙাই দিছে৷ এই ক্ষেত্ৰত জিলা প্ৰশাসন, স্থানীয় জনপ্ৰতিনিধি আৰু লোকনিৰ্মান বিভাগৰ দৃষ্টি আকৰ্ষণ কৰি অতি শীঘ্ৰে পথচোৱা মেৰামতি কৰাৰ দাবী জনোৱাৰ লগতে ডাম্পাৰ সমূহক নিয়ন্ত্ৰন কৰিবলৈ ৰাইজ তথা অটো,টেম্পৰ চালকসকলে সংশ্লিষ্ট কৰ্তৃপক্ষক আহ্বান জনাইছে ৷🔯