NEWS 4 BONGAIGAON

👉ঈদৰ নামত বজাৰত অযথা ভিৰ কৰি  বিপদ মাতি নানিব--চৰ- চাপৰি সাহিত্য পৰিষদ

          

                    

                         বঙাইগাঁওঃ ২০ মেঃ 

🔯ঈদৰ বজাৰৰ নামত বজাৰত অযথা ভিৰ কৰি বিপদ মাতি নানিবলৈ চৰ-চাপৰি সাহিত্য পৰিষদে জনগনলৈ আহ্বান জনাইছে। সংবাদ মাধ্যমলৈ প্ৰেৰিত প্ৰেছ বিবৃতিত চৰ-চাপৰি সাহিত্য পৰিষদৰ সভাপতি ড° হাফিজ আহমেদ, উপ-সভাপতি অধ্যাপক নাজিৰ হোছেইন সৰকাৰ, হজৰত আলী আহমেদ আৰু সম্পাদক হালিম খান চৌধুৰী আৰু মজিবুৰ ৰহমানে কয় যে "ঈদৰ বজাৰ কৰাৰ নামত অসমৰ বিভিন্ন প্ৰান্তত একাংশ লোকে শাৰীৰিক ব্যৱধান ভংগ কৰি বজাৰবোৰত সমবেত হৈ আছে। সেইদৰে বিনা কাৰণে অসমৰ নগৰে-চহৰে, গাঁৱে-ভূঞে কিছুসংখ্যক লোক সমবেত হোৱা দেখা গৈছে। কোভিড-১৯ ৰ  সংক্ৰমণৰ ফলত আমাৰ দেশ তথা ৰাজ্যখনে এক ভয়াৱহ পৰিস্থিতিৰ মাজেৰে দিন পাৰ কৰিবলগীয়া হৈছে। ৰাজ্যখনত আক্ৰান্তৰ সংখ্যা ইতিমধ্যে ডেৰ শতাধিকৰ অধিক হৈছেগৈ।অধিকাংশ শ্ৰমিক তথা দৰিদ্ৰ কৃষকসকলে চৰম আৰ্থিক অনাটনৰ সমুখীন হ'বলগীয়া হৈছে। এনে পৰিস্থিতিত জনসাধাৰণে এনে কোনো কাম কৰাটো উচিত নহয় যি কামে কোৰোনা ভাইৰাছ বিয়োপোৱাত সহায় কৰিব পাৰে। উল্লেখ্য যে লকডাউনৰ ফলত এইবাৰ পৱিত্ৰ ঈদ-উল-ফিতৰৰ নামাজ অসমৰ মুছলমানসকলে ঘৰতে আদায় কৰিব লাগিব। দেশৰ এই দুৰ্যোগৰ সময়ত ঈদৰ বজাৰ  কৰাৰ নামত অযথা বজাৰত সমবেত হৈ সামাজিক ব্যৱধান ভংগ কৰাটো অকল আইনৰ দৃষ্টিতে এক অপৰাধ নহয় বৰং এনে অবিবেচক কাৰ্যই নিজৰ পৰিয়াল তথা সমাজখনলৈও বিপদ মাতি আনিব বুলি প্ৰকাশ কৰিছে। লক্ষ্যণীয় যে ঈদৰ দিনাখন নতুন কাপোৰ পিন্ধাটো ধৰ্মীয় দিশৰ পৰা বাধ্যতামূলক নহয় ৷ চাফ-চিকুণ কাপোৰ-কানি পিন্ধিলেই হয়। গতিকে নতুন কাপোৰ কিনাৰ নামত অযথা সামাজিক ব্যৱধান ভংগ নকৰিবলৈ সকলো ৰাইজলৈ সাহিত্য পৰিষদে অনুৰোধ জনাইছে। ইপিনে চৰ-চাপৰিৰ বজাৰ -সমাৰবোৰত সামাজিক ব্যৱধান মানি চলা হৈ আছে নে নাই তাৰ প্ৰতি তীক্ষ্ণ নজৰ  ৰাখিবলৈ আহ্বান জনাইছে। 🔯       

                 

                        News4Bongaigaon