🔯বঙাইগাঁৱত 'পি এম কেয়াৰ্ছ ফ'ৰ চিল্ড্ৰেন' আঁচনিৰ অধীনত এটি শিশুক সা-সুবিধা প্ৰদান🔯

🔯বঙাইগাঁৱত 'পি এম কেয়াৰ্ছ ফ'ৰ চিল্ড্ৰেন' আঁচনিৰ অধীনত এটি শিশুক সা-সুবিধা প্ৰদান🔯

📝বঙাইগাঁওঃ ৩০ মে':-  ক'ভিড-১৯ অতিমাৰীত পিতৃ-মাতৃ উভয়কে হেৰুওৱা দেশৰ অনাথ শিশুসকলৰ ভৱিষ্যত সুৰক্ষিত আৰু সম্পূৰ্ণ কৰি তোলাৰ উদ্দেশ্যে ভাৰত চৰকাৰে এবছৰ পূৰ্বে ঘোষণা কৰা 'পি এম কেয়াৰ্ছ ফ'ৰ চিল্ড্ৰেন' আঁচনিৰ সা-সুবিধাৰাজি সোমবাৰে নতুন দিল্লীৰ পৰা ভিডিঅ' কনফাৰেন্সিঙৰ মাধ্যমেৰে অনুষ্ঠিত এক ৰাষ্ট্ৰীয় কাৰ্যসূচীৰ জৰিয়তে প্ৰধানমন্ত্ৰী মোদীয়ে শিশুসকললৈ হস্তান্তৰ প্ৰক্ৰিয়া আনুষ্ঠানিকভাৱে মুকলি কৰে ৷ এই ভিডিঅ' কনফাৰেন্স বঙাইগাঁও জিলা উপায়ুক্তৰ কাৰ্যালয়তো পোনপটীয়াকৈ সম্প্ৰচাৰ কৰা হয়। জিলা উপায়ুক্ত নবদ্বীপ পাঠক,  অতিৰিক্ত উপায়ুক্ত পংকজ চমুৱাৰ উপৰি  বঙাইগাঁও  জিলাৰ যুটীয়া স্বাস্থ্য সেৱা সঞ্চালক ডা:পি কে ৰয়, বঙাইগাঁও জিলাৰ বিদ্যালয় সমূহৰ পৰিদৰ্শক, জিলা শিশু সুৰক্ষা বিষয়া আদি উপস্থিত থকা অনুষ্ঠানত ক'ভিডত পিতৃ- মাতৃক হেৰুওৱা শিশু এটিক এই আঁচনিৰ অধীনত প্ৰধানমন্ত্ৰীৰ তৰফৰ পৰা স্নেহ পত্ৰ, ফিক্সড ডিপিজটৰ পাছবুক, হেল্থ কাৰ্ড,প্ৰমাণ পত্ৰ আদি প্ৰদান কৰা হয়। এই সমূহ জিলা উপায়ুক্তই শিশুটিক প্ৰদান কৰে ৷ 

উল্লেখ্য যে এই আঁচনিৰ অধীনত অনাথ শিশুসকলৰ প্ৰত্যেককে ২৩ বছৰ বয়সলৈকে তেওঁলোকৰ উপযুক্ত শিক্ষা-দীক্ষাকে ধৰি ভৱিষ্যত জীৱন আগবঢ়াই নিয়াৰ ক্ষেত্ৰত চৰকাৰে সম্পূৰ্ণ সহায়-সমৰ্থন আগবঢ়াব। তেওঁলোকক নিজৰ ঘৰৰ ওচৰতে চৰকাৰী বা ব্যক্তিগত বিদ্যালয়ত নামভৰ্তি, কিতাপ-বহী-ইউনিফৰ্ম আদিৰ খৰছ পিএম কেয়াৰ্ছ ফ'ৰ চিল্ডেনৰ পৰা চৰকাৰে বহন কৰিব। তদুপৰি, তেওঁলোকলৈ দৈনন্দিন আন খা-খৰছৰ বাবদো মাহে ৪,০০০ টকাকৈ প্ৰদানৰ লগতে ১৮ বছৰলৈকে বিশেষ জলপানীও আগবঢ়োৱা হ'ব। ১৮ বছৰৰ পৰা ২৩ বছৰ বয়সৰ সময়ছোৱাত মাহেকীয়া ষ্টাইপেণ্ড প্ৰদানৰ লগতে চিকিৎসা বিজ্ঞান, অভিযান্ত্ৰিক শিক্ষাকে ধৰি উচ্চ কাৰিকৰী শিক্ষা তথা প্ৰতিযোগিতামূলক পৰীক্ষাৰ প্ৰস্তুতিৰ বাবে ক'চিং আৰু শিক্ষা ঋণৰো সুবিধা চৰকাৰে আগবঢ়াব। তদুপৰি, তেওঁলোকে ২৩ বছৰ বয়স সম্পূৰ্ণ কৰাৰ লগে লগে প্ৰত্যেকেই পিএম কেয়াৰ্ছ ফ'ৰ চিল্ড্ৰেন আঁচনিৰ পৰা ১০ লাখ টকাকৈ এককালীন সাহায্য লাভ কৰিব। আনহাতে, এই  শিশুসকলৰ প্ৰতিগৰাকীয়ে বছৰি ৫ লাখ টকা পৰ্যন্ত বিনামূলীয়া চিকিৎসাৰ সুবিধাযুক্ত আয়ুস্মান ভাৰত হেল্থ কাৰ্ডো লাভ কৰিব🔯