🔯বঙাইগাঁও পৌৰসভা গঠন- বিজেপিৰ পৰ্যৱেক্ষক উপস্থিত হৈ গ্ৰহণ কৰিলে প্ৰাৰ্থীসকলৰ মতামত🔯

🔯বঙাইগাঁও পৌৰসভা গঠন- বিজেপিৰ পৰ্যৱেক্ষক উপস্থিত হৈ গ্ৰহণ কৰিলে প্ৰাৰ্থীসকলৰ মতামত🔯

🔯২০ মাৰ্চৰ পিচত ৰাজ্যিক কমিটিয়ে পৌৰসভা গঠন সন্দৰ্ভত প্ৰকাশ কৰিব চূডান্ত সিদ্ধান্ত- মনোজ বৰুৱা🔯

📝বঙাইগাঁওঃ ১৭ মাৰ্চঃ বঙাইগাঁও পৌৰসভা এইবাৰ বিজেপি দলে নিজৰ দখললৈ নিলে যদিও পৌৰসভাখন গঠনৰ ক্ষেত্ৰত দলটো কিছু বিপাঙত পৰিছে ৷ যাৰ বাবে এতিয়ালৈকে পৌৰসভাৰ সভাতিৰ আসনত কোন বহিব, উপ সভাপতি কোন হ'ব সেয়া প্ৰকাশ কৰিব পৰা নাই ৷ ইয়াৰ কাৰণ হ'ল দাবীদাৰ অনেক ৷ বঙাইগাঁও পৌৰসভাৰ সভাপতিৰ আসনখন অনুসূচিত জাতিৰ বাবে সংৰক্ষিত  ৷ কিন্তু অনুসূচিত জাতিৰ প্ৰাৰ্থী কেইবাগৰাকীও বিজয়ী হৈ আহিছে ৷ এনে প্ৰেক্ষাপটত কাক সভাপতিৰ আসনত বহুৱাব তাকলৈ সমস্যাত পৰিছে দলটো ৷ প্ৰথমবাৰৰ বাবে অগপৰ দখলত থকা পৌৰসভাখন দখল কৰা বিজেপিয়ে দলটোৰ ভাৱমূৰ্তি নিকা কৰি ৰাখি যাতে জনসাধাৰণৰ বাবে প্ৰকৃতাৰ্থত কাম কৰিব পাৰে তাৰ ওপৰত গুৰুত্ব প্ৰদান কৰি এগৰাকী সকলোৰে মনপুত প্ৰাৰ্থীকহে আসনখনত বহুৱাবলৈ বিচাৰিছে ৷ যাতে আগন্তুক দিনত দলটো অধিক ৰাইজৰ মাজলৈ সোমাই যোৱাত সুবিধা হয় ৷ বিজেপিয়ে পৌৰসভা দখল কৰাৰ পিচত দ্বিতীয় লক্ষ্য গাঁও পঞ্চায়ত আৰু বিধান সভা সমষ্টিটো দখল কৰা ৷ গতিকে পৌৰসভাৰ উন্নয়নৰ কামৰ জৰিয়তে দলটোৱে গাওঁলৈ গতি কৰাত যাতে সুবিধা হয় তাৰ বাবে অধিক সতৰ্কতাৰে পৌৰসভাখন গঠনৰ দিশে আগবাঢ়িছে ৷ সেয়ে যি কোনো বিজয়ী প্ৰাৰ্থী এগৰাকীক সভাপতিৰ আসনত বহুৱাব বিচৰা নাই দলটোৱে ৷ একেই কথা উপ সভাপতিৰ ক্ষেত্ৰতো ৷ অৱশ্যে ইয়াৰ মাজতে কোনোবাই আসনখনত বহিবলৈ নিজাববীয়াকৈ চেষ্টা চলাই থকা বুলিও বুবু বাবা ওলাইছে ৷ ইপিনে এই সমগ্ৰ দিশ সন্দৰ্ভত বুজ লোৱাৰ বাবে বৃহস্পতিবাৰে ৰাজ্যিক বিজেপিৰ পৰ্যৱেক্ষেক হিচাপে মনোজ বৰুৱা উপস্থিত হয় ৷ লগতে প্ৰভাৰী ব্ৰজ কুমাৰ দাস আৰু সহ প্ৰভাৰী ৰঞ্জন বৰাও উপস্থিত হয় ৷ পৰ্যৱেক্ষক গৰাকীয়ে বঙাইগাঁও জিলা বিজেপি কাৰ্যালয়ত উপস্থিত হৈ পৌৰসভা নিৰ্বাচনত জয়ী হোৱা দলৰ প্ৰাৰ্থীসকলৰ সৈতে ব্যক্তিগতভাৱে মিলিত হৈ পৌৰসভা গঠন সন্দৰ্ভত তেওঁলোকৰ মতামত আৰু পৰামৰ্শ গ্ৰহণ কৰে ৷ একেদৰে জিলা বিজেপিৰ সভানেত্ৰী হিমানী অধিকাৰী , প্ৰভাৰী,  সহ প্ৰভাৰীৰ লগতে সাংগঠনিক ক'ৰ কমিটিৰ সদস্যসকলৰ সৈতেও মিলিত হৈ ব্যক্তিগত মতামত গ্ৰহণ কৰে ৷

 ইয়াৰ পিচতে পৰ্যৱেক্ষক মনোজ বৰুৱাই সংবাদ মাধ্যমৰ আগত কয় যে পৌৰসভা নিৰ্বাচনত ভাৰতীয় জনতা পাৰ্টিৰ সমৰ্থনত সমগ্ৰ অসমৰ জনসাধাৰণে জনাদেশ প্ৰদান কৰিছে ৷ বিশেষভাৱে সমগ্ৰ অসমৰ ভিতৰতে বঙাইগাঁও পৌৰসভাখন এক অত্যন্ত গুৰুত্বপূৰ্ণ পৌৰসভা ৷ এই পৌৰসভাত এইবাৰ নজিৰ সৃষ্টি কৰি এক ব্যতিক্ৰমী চিন্তা- চৰ্চা বঙাইগাঁওবাসী জনসাধাৰণে কৰিছে ৷ গতিকে বিজেপিৰ কাৰণে এইটো এটা অতি আনন্দৰ দিন আৰু আনন্দৰ বিষয় ৷ কাৰণ বঙাইগাঁওবাসী জনসাধাৰণে প্ৰথমবাৰৰ বাবে বিজেপিৰ সমৰ্থনত পৌৰসভা গঠন কৰিব পৰাকৈ জনাদেশ প্ৰদান কৰিছে ৷ গতিকে আমি অত্যন্ত সতৰ্কতাৰে আগন্তুক পৌৰসভা যাতে গঠন কৰিব পৰা যায় তাৰ কাৰণে বিজেপিয়ে ইতিমধ্যে এক প্ৰক্ৰিয়া আৰম্ভ কৰিছে ৷ এই প্ৰক্ৰিয়াৰ অংশ হিচাপে আমি বঙাইগাঁও পৌৰসভাৰ নিৰ্বাচিত যিসকল পাৰিষদ সেই পাৰিষদসকলৰ সৈতে পৌৰসভা গঠন সম্পৰ্কত তেওঁলোকৰ যি পৰামৰ্শ তথা মতামত সেয়া গ্ৰহণ কৰিছো ৷ সেইদৰে জিলা বিজেপিৰ সাংগঠনিক ক্ষেত্ৰখনৰ যি ক'ৰ কমিটি আছে সেই কমিটিৰ সদস্যসকলোৰো মতামত গ্ৰহণ কৰা বুলি কয় ৷ লগতে এই মতামৰ ভিত্তিত প্ৰতিবেদন যুগুত কৰি ৰাজ্যিক কমিটিক অৰ্পণ কৰিব আৰু ৰাজ্যিক কমিটিয়ে ২০ মাৰ্চৰ পিচত পৌৰসভা গঠন সন্দৰ্ভত চূডান্ত সিদ্ধান্ত প্ৰকাশ কৰিব বুলিও জানিব দিয়ে ৷ অৰ্থাৎ ২০ মাৰ্চৰ পিচতহে ঘোষণা হ'ব পৌৰসভাৰ সভাপতি - উপ সভাপতিৰ নাম ৷ পৰ্যৱেক্ষক গৰাকীয়ে সমগ্ৰ অসমতে এইদৰে ৰাজ্যিক বিজেপিৰ নিৰ্দেশনা অনুসৰি পৰ্যৱেক্ষক উপস্থিত হৈ পৌৰসভা গঠনৰ ক্ষেত্ৰত দলৰ প্ৰাৰ্থীসকলৰ লগতে কৰ কমিটিৰ মতামত গ্ৰহণ কৰি থকা বুলিও প্ৰকাশ কৰে ৷🔯