NEWS 4 BONGAIGAON

👉বঙাইগাঁও জিলাৰ বইটামাৰীত টুনীয়া নৈৰ বাঢ়নী পানীত প্লাৱিত বহু অঞ্চল 

👉উটি গ'ল বাঁহৰ সাকোঁ, বহি:বিশ্বৰ লগত সংযোগহীন দুখন গাৱঁৰ লোক

                
              বঙাইগাঁওঃ ২৭ জুনঃ

🔯বিগত কেইবাদিন ধৰি নেৰানেপেৰাকৈ হৈ থকা ধাৰাষাৰ বৰষুণৰ ফলত বঙাইগাওঁ জিলাৰ বইটামাৰী অঞ্চলৰ কেইবাখনো গাওঁ বানৰ কবলত পৰিছে । জিলাখনৰ মাজেৰে বৈ যোৱা টুনীয়া নৈৰ জলস্তৰ বৃদ্ধি হৈ বাঢ়নী পানীয়ে বহু অঞ্চল প্লাৱিত কৰিছে । টুনীয়া নৈৰ বাঢ়নী পানীয়ে অঞ্চলটোৰ নৰ্থ বইটামাৰীৰ ধলাগাওঁ আৰু দেৱানগাৱঁত নৈখনৰ ওপৰত থকা বাহৰ সাঁকো দুখন উটুৱাই নিয়াত দেৱানগাওঁ ৰাভাপাৰা আৰু ধলাগাওঁ টিলাপাৰাৰ শতাধিক পৰিয়াল বহি:বিশ্বৰ লগত সংযোগহীন হৈছে ৷

তেওঁলোক নিজৰ ঘৰত আৱদ্ধ হৈ পৰিছে । খাদ্য সামগ্ৰীকে ধৰি মৌলিক প্ৰয়োজনৰ বাবেও লোকসকলে নৈখনৰ ইপাৰলৈ আহিব লাগে । কিন্তু সাঁকো দুখন ভাগি যোৱাত লোকসকল গৃহবন্দী হৈ পৰিছে । ইফালে দেৱানগাওঁ সূত্ৰধৰপাৰা আৰু বৰখাতাত টুনীয়া নৈৰ বাঢ়নী পানীয়ে বহু লোকৰ ঘৰ-দুৱাৰ প্লাৱিত কৰিছে । লোকসকলৰ মাজত হাহাকাৰ লাগিছে ।মানুহৰ লগতে পশুধন সমূহৰো আলৈ আথানি নোহোৱা হৈছে । নৈৰ পাৰ খহাই নৈৰ বাঢ়নী পানীয়ে গাওঁ প্লাৱিত কৰিছে । বৰখাতাৰ ৰাষ্ট্ৰীয় ঘাইপথৰ ওপৰেদিও পানী বাগৰি গৈছে । অঞ্চলটোৰ ধলাগাওঁ উজানপাৰাতো কেইবাঘৰ লোকৰ ঘৰ-দুৱাৰ পানীৰ তলত বুৰ গৈছে ।  

আজি স্থানীয় বিধায়ক তথা মন্ত্ৰী ফণীভূষণ চৌধুৰীয়ে নৰ্থ বইটামাৰীৰ বানপীড়িত অঞ্চল পৰিদৰ্শন কৰি লোকসকলক আশ্ৰয় শিবিৰলৈ নিয়াৰ ব্যৱস্থা কৰে । ইতিমধ্যে অঞ্চলটোৰ দেৱানগাঁও সূত্ৰধৰপাৰা প্ৰাথমিক বিদ্যালয়ত বানাক্ৰান্তসকলৰ বাবে মুকলি কৰা হৈছে আশ্ৰয় শিবিৰ ৷ সেইদৰে বানাক্ৰান্ত ৰাইজক এচ ডি আৰ এফৰ দলে উদ্ধাৰ কৰি নিৰাপদ স্থানলৈ আনে ৷ একেদৰে ধনতোলা গাঁও পঞ্চায়তৰ অন্তৰ্গত ঢালকাটা গাঁও সম্পূৰ্ণ ৰূপে বুৰাই পেলাইছে পানীয়ে । ফলত লোকসকল ভীষণ সমস্যাৰ সৃষ্টি হৈছে ।🔯