NEWS 4 BONGAIGAON

👉বঙাইগাঁৱৰ গ্ৰামাঞ্চলৰ কোৱাৰেণ্টাইন কেন্দ্ৰত নিৰাপত্তাহীনতাত ভুগিছে ব্যক্তি 

               বঙাইগাঁওঃ ২১ জুনঃ

🔯বঙাইগাওঁ জিলা প্ৰশাসনে বহি:ৰাজ্যৰ পৰা অহা লোকসকলক জিলাখনৰ চহৰৰ কোৱাৰেণ্টাইন কেন্দ্ৰৰ লগতে গাওঁ অঞ্চলৰ বহু বিদ্যালয় কোৱাৰেণ্টাইন কেন্দ্ৰ হিচাপে লৈ বিদ্যালয়সমূহতো বহি:ৰাজ্যৰ পৰা অহা লোকক কোৱাৰেণ্টাইন কৰি আছে । বিশেষকৈ বহি:ৰাজ্যৰ পৰা অহা লোকসকল জিলাখনৰ যিটো গ্ৰাম্য অঞ্চলৰ সেই অঞ্চলতে কোৱাৰেণ্টাইন কৰা দেখা গৈছে । কিছুমান গ্ৰাম্য অঞ্চলত কোৱাৰেণ্টাইন ব্যৱস্থা ভালদৰে ৰূপায়ণ হৈ আছে যদিও আন কিছুমান অঞ্চলত এই কোৱাৰেণ্টাইন ব্যৱস্থাত যথেষ্ট খেলিমেলি হোৱাৰ অভিযোগ উত্থাপিত হৈছে । জিলা প্ৰশাসনে এই কোৱাৰেণ্টাইন ব্যৱস্থা পৰিচালনাৰ বাবে গাঁও পৰ্যায়ত, পঞ্চায়ত পৰ্যায়ত, ব্লক পৰ্যায়ত আৰু জিলা পৰ্যায়ত কৰ'ণা প্ৰতিৰোধী দল নামৰ কমিটি গঠন কৰি দিছে । গাওঁ পৰ্যায়ৰ কৰ'ণা প্ৰতিৰোধী দলত বিদ্যালয়ৰ প্ৰধানশিক্ষক, গ্ৰামসেৱক ,এ ই, জে ই , গাৱঁৰ প্ৰতিৰোধী বন্ধু, গাওঁৰক্ষী বাহিনী, আশা কৰ্মী, এচ এইছ জি ৰ সম্পাদকক অন্তৰ্ভুক্ত কৰিছে । একেদৰে পঞ্চায়ত পৰ্যায়ত পঞ্চায়ত সচিব, শিক্ষা বিভাগৰ চি আৰ চি চি , স্থানীয় এ এন এম, জীৱিকা সাৰথি, গাওঁৰক্ষী বাহিনীৰ সম্পাদক , আশা ছুপাৰভাইজৰ, এজন স্থানীয় প্ৰতিৰোধী বন্ধুক লৈ পঞ্চায়ত পৰ্যায়ৰ প্ৰতিৰোধী দল গঠন কৰি দিছে জিলা প্ৰশাসনে । গাওঁ বা পঞ্চায়ত পৰ্যায়ৰ দল সমূহক দিহা-পৰামৰ্শ বা তদাৰক কৰাৰ বাবে ব্লক পৰ্যায় আৰু জিলা  পৰ্যায়তো দুখন কমিটি আছে । কিন্তু বৰ্তমানে কিছুমান গাওঁ অঞ্চলৰ কোৱাৰেণ্টাইন ব্যৱস্থাত যথেষ্ট আঁসোৱাহ পৰিলক্ষিত হৈছে । কিছুমান বিদ্যালয়ৰ কোৱাৰেণ্টাইন ব্যৱস্থাত খেলিমেলি হোৱাৰ ৰাইজে অভিযোগ উত্থাপন কৰিছে । কিছু গাওঁ অঞ্চলৰ কোৱাৰেণ্টাইন কেন্দ্ৰত গাওঁৰক্ষী বাহিনীয়ে ভালদৰে কৰ্তব্য পালন নকৰাৰো অভিযোগ উঠিছে । ফলত কোৱাৰেণ্টাইন কেন্দ্ৰত থকা লোক নিৰাপত্তাহীনতাত ভুগিছে ।

দুই-এটা কোৱাৰেণ্টাইন কেন্দ্ৰত নিশাৰ ভাগত মদ খাই লোক প্ৰৱেশ কৰাৰ ঘটনাও ঘটিছে । আৰক্ষী-প্ৰশাসন বা গাওঁৰক্ষী বাহিনীৰ পহৰা নথকাৰ ফলত একাংশ বিদ্যালয়ৰ কোৱাৰেণ্টাইন কেন্দ্ৰত আন লোক প্ৰৱেশ কৰাৰ অভিযোগ উঠিছে । জিলাখনৰ নৰ্থ বইটামাৰী হাইস্কুলৰ কেন্দ্ৰত দুদিনমান পূৰ্বে নিশা মদৰ নিচাত এজন যুৱক কোৱাৰেণ্টাইন হৈ থকা যুৱক এজনক লগ কৰিবলৈ  কেন্দ্ৰটোৰ ভিতৰত প্ৰৱেশ কৰা একাংশ লোকে প্ৰত্যক্ষ কৰিছে । তাৰ আগতেও কেন্দ্ৰটোত মদ খাই লোক প্ৰৱেশ কৰিছিল । আনকি মানসিক ৰোগীও প্ৰৱেশ কৰা বুলি জানিব পৰা গৈছে ৷ নিশা কেন্দ্ৰসমূহত কোনো পহৰা নথকাৰ বাবে এনে ঘটনাসমূহ ঘটিছে । ইফালে বহু বিদ্যালয়ৰ কোৱাৰেণ্টাইন কেন্দ্ৰত মাত্ৰ এজন যুৱকক কোৱাৰেণ্টাইন কৰা হয় । তেওঁলোকেও ভয় শংকাত নিশা কটায় । বহু কেন্দ্ৰত এজন যুৱকে অকলে ভয় কৰে বাবে পৰিয়ালৰ কোনো লোকে কোৱাৰেণ্টাইন কেন্দ্ৰত বেলেগ কোঠাত নিশা কটোৱাৰো ব্যৱস্থা কৰিছে । এনেবোৰ কাৰণত কোৱাৰেণ্টাইনত থকা কাৰোবাৰ দেহত কোভিড-১৯ পজিটিভ ধৰা পৰিলে সামাজিক সংক্ৰমণৰ আশংকাই দেখা দিছে । গাওঁ সমূহত কোৱাৰেণ্টাইন ব্যৱস্থা পৰিচালনাৰ বাবে প্ৰশাসনে কমিটি গঠন কৰি দিছিল যদিও বহু বিদ্যালয়ৰ কোৱাৰেণ্টাইন কেন্দ্ৰত বিদ্যালয়ৰ প্ৰধান শিক্ষকৰ বাহিৰে আন লোকসকলে দায়িত্বৰ পৰা ফালৰি কটাৰ অভিযোগ উঠিছে । জিলাখনত কিছু পঞ্চায়তৰ বিষয়ববীয়া আৰু ব্লক পৰ্যায়ৰ বিষয়াও এইক্ষেত্ৰত গুৰুত্ব নিদিয়ে । কিছু গ্ৰাম্য অঞ্চলৰ কোৱাৰেণ্টাইন কেন্দ্ৰসমূহত জিলাখনৰ প্ৰশাসনিক বিষয়াই পৰিদৰ্শন নকৰাৰ অভিযোগ উঠিছে । তাৰ বিপৰীতে মন্ত্ৰী ফণীভূষণ চৌধুৰীয়েহে বিভিন্ন কেন্দ্ৰ পৰিদৰ্শন কৰি আছে । ইফালে গাওঁ অঞ্চলৰ হোম কোৱাৰেণ্টাইন ব্যৱস্থাতো যথেষ্ট সুৰুঙা দিয়া হৈছে । স্বাস্থ্যমন্ত্ৰী হিমন্ত বিশ্ব শৰ্মাই কোৱাৰেণ্টাইন ব্যৱস্থা ভালদৰে ৰূপায়ণ নহ'লে ৰাজ্যত ভয়াৱহ ৰূপত গণ সংক্ৰমণ হোৱাৰ আশংকা কৰিছে । তেনেক্ষেত্ৰত বঙাইগাৱঁৰ গ্ৰাম্য অঞ্চলৰ কোৱাৰেণ্টাইন ব্যৱস্থাত অধিক গুৰুত্ব দিবলৈ প্ৰশাসনক ৰাইজে দাবী জনাইছে ।🔯