👉বঙাইগাঁও জিলাত কৰ'নাই লৈছে ভয়াৱহ ৰূপ

👉বঙাইগাঁও জিলাত কৰ'নাই লৈছে ভয়াৱহ ৰূপ 

👉আক্ৰান্তৰ সংখ্যাই অতিক্ৰম কৰিলে হাজাৰৰ সংখ্যা 

👉বিগত 24 ঘণ্টাত নতুনকৈ আক্ৰান্ত হ'ল 63 জন

 

             বঙাইগাঁওঃ ৯ আগষ্টঃ 

📝বঙাইগাঁও জিলাত কোভিডত আক্ৰান্ত ব্যক্তিৰ সংখ্যাই হাজাৰৰ ঘৰ অতিক্ৰম কৰিছে ৷ জিলাখনত  এতিয়া কৰ'না ভাইৰাছৰ গণ সংক্ৰমণে লৈছে ভয়াৱহ ৰূপ ৷ দৈনিক ধৰা পৰিছে বিভিন্নজন ব্যক্তিৰ দেহত কোভিড - 19 পজিটিভ ৷ বিগত 24 ঘণ্টাত জিলাখনত নতুনকৈ 63 জন ব্যক্তিৰ দেহত কোভিড - 19 পজিটিভ ধৰা পৰাত মুঠ আক্ৰান্তৰ সংখ্যা 1016 জনলৈ বৃদ্ধি পাইছে ৷ কিন্তু তৎস্বত্বেও জিলা প্ৰশাসনে ৰাজহুৱা নকৰে আক্ৰান্ত ব্যক্তিৰ পৰিচয় ৷ আন জিলাত কোভিডত আক্ৰান্ত ব্যক্তিৰ নাম ৰাজহুৱা কৰা হয় যদিও বঙাইগাঁও জিলাত উপায়ুক্ত ডাঃ এম এছ লক্ষ্মীপ্ৰিয়াই আক্ৰান্ত ব্যক্তিৰ পৰিচয় ৰাজহুৱা কৰিব নোৱাৰিব বুলি জাৰি কৰি থৈছে এক নিৰ্দেশনা ৷ যাৰ ফলত জিলা প্ৰশাসনে কোভিডত আক্ৰান্ত ব্যক্তিৰ পৰিচয় ৰাজহুৱা নকৰাত জিলাখনত কোভিডত আক্ৰান্ত ব্যক্তিৰ সংখ্যা বৃদ্ধি পোৱাৰ ক্ষেত্ৰত ইয়ো এক অন্যতম কাৰক বুলি সচেতন মহলে মন্তব্য কৰিছে ৷ লগতে আক্ৰান্ত ব্যক্তিৰ পৰিচয় ৰাজহুৱা নকৰাৰ ফলত আক্ৰান্তক যিহেতু চিনিয়ে নাপায়, সেয়ে অধিকাংশ লোকে এতিয়া কৰ'নাকলৈ বেপোৰোৱা ভাৱ পোষণ কৰিছে ৷ ইপিনে জিলা প্ৰশাসনে কোভিডত আক্ৰান্ত ব্যক্তিৰ নাম ৰাজহুৱা নকৰে বুলি নিৰ্দেশনা জাৰি কৰি থৈছে যদিও সেই নিৰ্দেশনা প্ৰশাসনে নিজেই ভংগ কৰিছে ৷ জিলাখনৰ কোভিডত আক্ৰান্ত আন ব্যক্তিৰ নাম ৰাজহুৱা নকৰা প্ৰশাসনে কিন্তু জিলাখনৰ আৰক্ষী অধীক্ষকগৰাকী কোভিডত আক্ৰান্ত হোৱাত তেওঁৰ নাম উল্লেখ কৰি বিষয়টো জনসংযোগ বিভাগৰ জৰিয়তে সংবাদ মাধ্যমক অৱগত কৰিছিল ৷ আনহাতে  কোভিড  পজিটিভ ধৰা পৰা ব্যক্তিক প্ৰশাসনে চিকিৎসালয়ত ভৰ্তি কৰে যদিও আৰক্ষী অধীক্ষকগৰাকীৰ ক্ষেত্ৰত সেয়া কৰা নহ'ল ৷ কোভিডত আক্ৰান্ত হোৱাৰ পিচতো আৰক্ষী অধীক্ষকগৰাকী চৰকাৰী আবাসতে থাকিল ৷ এইদৰেই এতিয়া বঙাইগাঁও জিলা প্ৰশাসনে নিজ ইচ্ছাৰে নিয়ম বনায় আৰু নিয়ম ভংগ কৰে ৷ যাৰ ফলত জিলা প্ৰশাসনৰ প্ৰতি ৰাইজৰ ক্ৰমাৎ আস্থা নোহোৱা হ'ব ধৰিছে ৷ উল্লেখ্য যে জিলাখনৰ মুঠ 1016 জন ব্যক্তি কোভিড- 19 ত আক্ৰান্ত হৈছে যদিও ইয়াৰ ভিতৰত 624 জন ব্যক্তি সুস্থ হৈ নিজ ঘৰলৈ উভতি গৈছে ৷ আনহাতে বৰ্তমান 291 জন ব্যক্তি জিলাখনৰ বিভিন্ন চিকিৎসালয়ত চিকিৎসাধীন হৈ থকাৰ বিপৰীতে 101 জন ব্যক্তি জিলাৰ বাহিৰত চিকিৎসাধীন হৈ আছে🔯 ৷