👉বঙাইগাঁও জিলৰ বইটামাৰীৰ ইন্দিৰা গান্ধী মহাবিদ্যালয়ক প্ৰাদেশিকীকৰণ চৰকাৰৰ

👉বঙাইগাঁও জিলৰ বইটামাৰীৰ  ইন্দিৰা গান্ধী মহাবিদ্যালয়ক প্ৰাদেশিকীকৰণ চৰকাৰৰ  

👉আনন্দিত অঞ্চলবাসী 

        বঙাইগাঁওঃ২০ আগষ্টঃ

📝ৰাজ্য চৰকাৰৰ শিক্ষা বিভাগে মঙলবাৰে এক নিৰ্দেশযোগে ৰাজ্যৰ ২৭ খন অপ্ৰাদেশিকীকৃত মহাবিদ্যালয় প্ৰাদেশিকীকৰণ কৰে । বঙাইগাওঁ জিলাৰ বইটামাৰী অঞ্চলৰ একমাত্ৰ উচ্চ শিক্ষানুষ্ঠান ইন্দিৰা গান্ধী মহাবিদ্যালয়কো এইবাৰ চৰকাৰে প্ৰাদেশিকীকৰণ কৰে । অৱশ্যে প্ৰথম পৰ্যায়ত মহাবিদ্যালয়খনৰ অসমীয়া বিভাগৰ তিনিগৰাকী আৰু দৰ্শন বিভাগৰ তিনিগৰাকী অধ্যাপকক সহকাৰী অধ্যাপক ৰূপে পদ সমূহ প্ৰাদেশিকীকৰণ কৰাৰ লগতে মহাবিদ্যালয়খনৰ বৰ্তমানৰ অধ্যক্ষ গৰাকীক টিউটৰ অধ্যক্ষ, শিক্ষা বিভাগ আৰু ভূগোল বিভাগৰ এগৰাকীকৈ অধ্যাপকক টিউটৰ অধ্যাপক হিচাপে ৰখা হৈছে । বৰ্তমানলৈ কাৰ্যালয়ৰ উচ্চ বৰ্গ সহায়ক , নিম্ন বৰ্গ সহায়ক বা চতুৰ্থ বৰ্গৰ কৰ্মচাৰী কাৰো পদসমূহ চৰকাৰে প্ৰাদেশিকীকৰণ কৰা নাই যদিও পৰৱৰ্তী তালিকাত তেওঁলোকৰ যোগ্য বিৱেচিতখিনিৰ প্ৰাদেশিকীকৰণ হ'ব বুলি ধাৰণা কৰা হৈছে । উল্লেখ্য যে  বৃহত্তৰ বইটামাৰী অঞ্চলত উচ্চ শিক্ষাৰ বাবে এখনো মহাবিদ্যালয় নথকাত বৃহত্তৰ অঞ্চলৰ ছাত্ৰ-ছাত্ৰীৰ অসুবিধা দূৰ কৰাৰ বাবে অঞ্চলটোৰ কিছু শিক্ষানুৰাগী ব্যক্তিয়ে বইটামাৰীত এখন মহাবিদ্যালয় স্থাপনৰ উদ্যোগ লৈছিল । ১৯৯৫ চনৰ ৩ মে' ত বইটামাৰী উচ্চতৰ মাধ্যমিক বিদ্যালয় প্ৰাংগণত এই উপলক্ষে এক ৰাজহুৱা সভা অনুষ্ঠিত হয় আৰু সভাত উপস্থিত হৈ তদানীন্তন বিধায়ক প্ৰয়াত চন্দন কুমাৰ সৰকাৰে মহাবিদ্যালয়খন নিৰ্মানৰ ক্ষেত্ৰত ৭ লাখ টকা আৰ্থিক সাহায্য দিয়াৰ কথা ঘোষণা কৰে । সভাখনতে চন্দন সৰকাৰক সভাপতি আৰু ৰজকান্ত নাথক সম্পাদক হিচাপে লৈ এখন পৰিচালনা সমিতি গঠন হয় । তদানীন্তন বিধায়ক প্ৰয়াত চন্দন সৰকাৰৰ তৎপৰতাত  ১৯৯৫ চনৰে ১০ চেপ্তেম্বৰত অসমৰ তদানীন্তন মুখ্যমন্ত্ৰী হিতেশ্বৰ শইকীয়াই মহাবিদ্যালয়খনৰ আধাৰশিলা স্থাপন কৰে । মহাবিদ্যালয় গৃহ সম্পূৰ্ণ নোহোৱালৈকে উক্ত বছৰৰ পৰাই অস্থায়ী গৃহত মহাবিদ্যালয়খনৰ পাঠদান আৰম্ভ হয় । ১৯৯৯ চনত গুৱাহাটী বিশ্ববিদ্যালয়ৰ অনুমতি আৰু ২০০৫ চনত চৰকাৰৰ কনকাৰেঞ্চ লাভ কৰে মহাবিদ্যালয়খনে । অৱশেষত মঙলবাৰে অসম চৰকাৰে এক নিৰ্দেশ যোগে মহাবিদ্যালয়খনক প্ৰাদেশিকীকৰণ কৰে । চৰকাৰৰ এই সিদ্ধান্তই বৃহত্তৰ অঞ্চলটোৰ লোকসকলক আনন্দিত কৰি তুলিছে । মুখ্যমন্ত্ৰী সৰ্বানন্দ সোনোৱাল আৰু বিত্ত-শিক্ষামন্ত্ৰী হিমন্ত বিশ্ব শৰ্মাক ধন্যবাদ জ্ঞাপন কৰিছে মহাবিদ্যালয়ৰ বৰ্তমানৰ অধ্যক্ষ নাৰায়ন মেধি, মহাবিদ্যালয়ৰ এলুমনি এচ'ছিয়েচনৰ সভাপতি ধনঞ্জয় গোস্বামীৰ লগতে বিভিন্ন দল সংগঠন তথা ৰাইজে । মহাবিদ্যালয়খনৰ যিখিনি পদ প্ৰাদেশিকীকৰণ হোৱা নাই সেইখিনিকো যোগ্য বিৱেচিত খিনিক সোনকালে প্ৰাদেশিকীকৰণ কৰিবলৈ সকলোৱে চৰকাৰক দাবী জনাইছে 🔯।