👉বঙাইগাঁৱৰ বইটামাৰীত চুলাই মদৰ বিৰুদ্ধে মহিলাৰ অভিযান

👉বঙাইগাঁৱৰ বইটামাৰীত চুলাই মদৰ বিৰুদ্ধে মহিলাৰ অভিযান

                            বঙাইগাঁওঃ ৬ ছেপ্টেম্বৰঃ 

📝বঙাইগাঁও জিলাৰ বইটামাৰীত শনিবাৰে নিশা একাংশ মহিলাই চুলাই মদৰ বিৰুদ্ধে অভিযান চলায়। হাতে হাতে লাঠি লৈ ওলাই অহা মহিলাসকলে বইটামাৰীৰ শালবাৰী আৰু বেছিমাৰী গাঁৱৰ বিভিন্ন চুবুৰীত চুলাই মদৰ বিৰুদ্ধে অভিযান চলায়। অভিযান কালত মহিলাসকলে ৫ লিটাৰ অবৈধ চুলাই উদ্ধাৰ  কৰিবলৈ সক্ষম হয় আৰু সেইবোৰ নষ্ট কৰি পেলায় ৷ উল্লেখ্য যে বইটামাৰীৰ বিভিন্ন অঞ্চলত অবৈধ চুলাইৰ ৰমৰমীয়া বেহা বৰ্তমানেও ব্যাহত আছে। অঞ্চলটোৰ বেছিমাৰী, শালবাৰী, আদি গাঁৱত বৰ্তমানে অবৈধ চুলাইৰ ঘাটি নাই যদিও চুলাইত আসক্ত লোকসকলৰ বাবে বাহিৰৰ পৰা কিছুমান ব্যক্তিয়ে গাওঁখনত চুলাইৰ যোগান ধৰি ৰমৰমীয়া বেহা চলাই আছে । এই ক্ষেত্ৰত  আৰক্ষী প্ৰশাসন আৰু আবকাৰী বিভাগে ব্যৱস্থা নোলোৱাৰ অভিযোগ মহিলাসকলৰ । যাৰ ফলত সমগ্ৰ অঞ্চলটোতে এক অসামাজিক পৰিবেশ গঢ়ি উঠাৰ লগতে বহু পৰিয়ালৰ ঘৰত সৃষ্টি হৈছে গৃহ কন্দলৰ ৷ কাৰণ দৈনিক চুলাই সেৱন কৰি আহি চুলাইৰ নিচাত মাতাল স্বামীৰ অত্যাচাৰত অতিষ্ঠ হৈ পৰিছে একাংশ মহিলা । সেয়ে শাৰিৰীক আৰু মানসিক অত্যাচাৰত অতিষ্ঠিত মহিলাসকলৰ আবকাৰী আৰু আৰক্ষীৰ প্ৰতি মোহভংগ ঘটিছে আৰু নিজাববীয়াকৈ চুলাই মদৰ বিৰুদ্ধে অভিযান চলাবলৈ ওলাই আহে ৷ অৱশ্যে পিছত ঘটনাস্থলীত আৰক্ষীৰ দল এটা উপস্থিত হয় আৰু মহিলাসকলক বুজাই পৰাই ঘৰলৈ পঠাই দিয়ে ৷ আৰক্ষীয়ে লগতে চুলাই মদৰ বিৰুদ্ধে ব্যৱস্থা গ্ৰহণৰো আশ্বাস প্ৰদান কৰে🔯