👉বঙাইগাঁৱত উদ্ধাৰ হোৱা নৱজাতকক জিলা শিশু সুৰক্ষা বিষয়াক হস্তান্তৰ

👉বঙাইগাঁৱত উদ্ধাৰ হোৱা নৱজাতকক জিলা শিশু সুৰক্ষা বিষয়াক হস্তান্তৰ

বঙাইগাঁওঃ২১ এপ্ৰিলঃ

📝বঙাইগাঁও চহৰৰ মহাবীৰস্থানত যোৱা ১৮ এপ্ৰিলত ৰে'ল পথৰ কাষৰ জংঘলৰ মাজত পৰিত্যক্ত অবস্থাত উদ্ধাৰ হোৱা নৱজাতক শিশুটিক আজি বঙাইগাঁও স্বাগত হাস্পতাল আৰু ৰিছাৰ্ছ চেণ্টাৰ কৰ্তৃপক্ষই  বঙাইগাঁও জিলা শিশু সুৰক্ষা বিষয়াক হস্তান্তৰ কৰে ৷ উল্লেখ্য যে যোৱা ১৮ এপ্ৰিলত বঙাইগাঁও চহৰৰ মহাবীৰ স্থানৰ পৰা এই নৱজাতক শিশুটিক উদ্ধাৰ কৰা হৈছিল ৷ মহাবীৰ স্থানৰ ৰে'ল পথৰ কাষত জংঘলত বস্তাত মেৰিয়াই পেলাই থোৱা হৈছিল নৱজাতক শিশুটিক ৷ শিশুটিৰ ক্ৰন্দন শুনি  স্থানীয় ৰাইজ ওচৰত গৈ  প্ৰত্যক্ষ কৰিছিল শিশুটিক ৷ পিছত কৃষক মুক্তি সংগ্ৰাম সমিতিৰ বঙাইগাঁও জিলা সমিতিৰ সাধাৰণ সম্পাদক নন্দন দেৱনাথৰ নেতৃত্বত এটি যুৱকৰ দলে শিশুটিক উদ্ধাৰ কৰি বঙাইগাঁও স্বাগত হাস্পতাল এণ্ড ৰিছাৰ্ছ চেণ্টাৰ নামৰ ব্যক্তিগত নাৰ্ছিং হোমত ভৰ্ত্তি কৰে ৷  এই কেইদিন নৱজাতক শিশুটিৰ চিকিৎসা আৰু পৰিচৰ্যা চলিছিল উক্ত নাৰ্ছিং হোমতেই ৷ আজি জিলা শিশু সুৰক্ষা বিষয়াৰ অধীনত শিশুটিক চমজাই দিয়া হয় ৷ ইপিনে আজি এই চিকিৎসা কেন্দ্ৰটিত এক সংবাদ মেলৰো আয়োজন কৰা হয় ৷ সংবাদ মেলত চিকিৎসালয়খনৰ স্বত্বাধিকাৰী তথা বিশিষ্ট চিকিৎসক ডাঃ এচ কে দাসে উপস্থিত থাকি কয় যে শিশুটিক আঘাতপ্ৰাপ্ত অবস্থাত ভৰ্ত্তি কৰা হৈছিল ৷ বৰ্তমান শিশুটি সুস্থ যদিও নিউৰো চাৰ্জনৰ দ্বাৰা চিকিৎসাৰ উপদেশ প্ৰদান কৰে ৷ চিকিৎসকজনৰ মতে কোনো অবৈধ গৰ্ভপাতৰ কাৰণে হয়তো শিশুটিক এনেদৰে পেলাই থৈ যোৱা হৈছিল অথবা শিশুটি লিংগ বৈষম্যৰ বলিয়ো হ'ব পাৰে ৷  কাৰণ শিশুটি যিহেতু কন্যা সন্তান তাৰ বাবেও কোনোৱাই পেলাই থৈ যাব পাৰে ৷ ইপিনে এই নৱজাতক শিশুটিক অতি সাহসেৰে চিকিৎসালয়লৈ লৈ অহা কৃষক মুক্তিৰ নেতা নন্দন দেবনাথৰ লগতে যুবকৰ দলটিক ভূয়সী প্ৰসংশা কৰি চিকিৎসক জনে কয় যে এওঁলোকৰ কাৰণে হয়তো এদিনীয়া নৱজাতক শিশুটিৰ জীবন ৰক্ষা পৰিল ৷ উল্লেখ্য যে এই নৱজাতক শিশুটিক সন্তান হিচাপে গ্ৰহণ কৰাৰ কাৰণে শতাধিক নি:সন্তান দম্পতীয়ে চিকিৎসকজনৰ সৈতে যোগাযোগ কৰা বুলিও জানিবলৈ দিয়ে ৷ সংবাদ মেলত জিলাৰ সহকাৰী আয়ুক্ত কবিতা ডেকা আৰু জিলা শিশু সুৰক্ষা বিষয়াও উপস্থিত থাকে ৷ 🔯