👉বঙাইগাঁৱত কিশোৰকে ধৰি ক'ভিডত দুজনৰ মৃত্যু

👉বঙাইগাঁৱত কিশোৰকে ধৰি ক'ভিডত দুজনৰ মৃত্যু 

👉বঙাইগাঁও জিলাত পুনৰ ৪৯ জন ব্যক্তৰ দেহত ধৰা পৰিল ক'ভিড - ১৯ প'জিটিভ  

👉মুঠ সক্ৰিয় ৰোগীৰ সংখ্যা ৪৮৮  জনলৈ বৃদ্ধি 

বঙাইগাঁওঃ ২ মেঃ 

📝বঙাইগাঁও জিলাত ক'ৰোনাত আক্ৰান্তৰ সংখ্যা বৃদ্ধি পোৱাৰ লগতে ক'ৰোনাৰ বাবে বিভিন্নজনে মৃত্যুক আকোৱালি ল'বলগীয়া হৈছে  ৷ আজিও এজন কিশোৰৰ মৃত্যু হয় ৷ আনহাতে আন এজন ব্যক্তিৰ মৃত্যু হৈছে যদিও প্ৰশাসনে সেই সন্দৰ্ভত কোনো তথ্য জানিবলৈ দিয়া নাই ৷ জিলা প্ৰশাসনে জানিবলৈ দিয়া মতে বঙাইগাঁৱৰ জেল্কাঝাৰৰ হিৰণ্য সিংহ(১৪ ) নামৰ মস্তিষ্ক পক্ষাঘাতজনিত (চেৰিব্ৰাল পালচী, Cerebral Palsy) ৰোগত আক্ৰান্ত কিশোৰজন শনিবাৰে শ্বাস- প্ৰশ্বাসৰ সমস্যাত ভোগাত পৰিয়ালৰ লোকে বঙাইগাঁও চহৰৰ ব্যক্তিগতখণ্ডৰ আৰোগ্য হাস্পতালত ভৰ্তি কৰিছিল ৷ চিকিৎসালয়খনত কিশোৰজনৰ ৰেপিড এণ্টিজেণ্ট টেষ্ট কৰাত ক'ভিড প'জিটিভ ফলাফল অহাত কিশোৰজনক বঙাইগাঁও অসামৰিক চিকিৎসালয়লৈ প্ৰেৰণ কৰে ৷ পিছত পুৱা ৯ঃ২০ বজাত কিশোৰজনক বঙাইগাঁও অসামৰিক চিকিৎসালয়ত ভৰ্তি কৰা হয় যদিও উন্নত চিকিৎসাৰ বাবে উক্ত দিনাই পুৱা ৯ঃ ৫০ বজাত বৰপেটা মেডিকেল কলেজ হাস্পতাললৈ প্ৰেৰণ কৰা হয় ৷ কিন্তু আজি চিকিৎসাধীন অৱস্থাত কিশোৰজনৰ মৃত্যু হয় ৷ ইপিনে জিলা প্ৰশাসনে প্ৰকাশ কৰা ক'ভিডৰ তথ্যত মৃতকৰ সংখ্যা দুজন বুলি উল্লেখ কৰিছে যদিও আনজনৰ কোনো তথ্য জনোৱা নাই ৷ উল্লেখ্য যে দেওবাৰে জিলাখনত নতুনকৈ ৪৯ জন ব্যক্তিৰ দেহত ক'ভিড - ১৯ প'জিটিভ ধৰা পৰে ৷ একেদৰে মৃত্যু হয় দুজনৰ ৷ সেইদৰে সুস্থ হৈ উঠে ৩৫ জনকৈ ব্যক্তি ৷ জিলাখনত বৰ্তমান সক্ৰিয় ৰোগীৰ সংখ্যা ৪৮৮ জনলৈ বৃদ্ধি পাইছে ৷ জিলাখনত যোৱা ১ মাৰ্চৰ পৰা দেওবাৰলৈ মুঠ ক'ভিডত আক্ৰান্তৰ সংখ্যা ৭২৫ জন ৷🔯