👉এন আৰ চিৰ পুনৰীক্ষণ মানি নলয় আমছুৱে

👉চূড়ান্ত এন আৰ চি পুনৰীক্ষণ সম্পৰ্কত মুখ্যমন্ত্ৰীৰ মন্তব্য আৰু মহামান্য উচ্চতম ন্যায়ালয়ত ৰাজ্যিক সমন্বয়কে পুনৰীক্ষণৰ বাবে দাখিল কৰা আবেদন সন্দৰ্ভত আমছুৰ প্ৰতিক্ৰিয়া

👉এন আৰ চিৰ পুনৰীক্ষণ মানি নলয় আমছুৱে 

বঙাইগাঁওঃ ২১ মেঃ 

📝অসম চৰকাৰৰ মুখ্যমন্ত্ৰী ড°হিমন্ত বিশ্ব শৰ্মাই শপত গ্ৰহণ কৰিয়ে এন আৰ চি সন্দৰ্ভত ৰাজ্যৰ সীমান্ত জিলাত ২০ শতাংশ আৰু অন্যান্য জিলাত ১০ শতাংশ লোকৰ নাম পুনৰীক্ষণ কৰা হ'ব বুলি কৰা মন্তব্যৰ লগতে এন আৰ চিৰ ৰাজ্যিক সমন্বয়কে মহামান্য উচ্চতম ন্যায়ালয়ত এন আৰ চিৰ সম্পূৰ্ণ পুনৰীক্ষণৰ বাবে জনোৱা আবেদনৰ তীব্ৰ বিৰোধিতা কৰিছে আমছুৱে ৷ লগতে কোনোপধ্যে এন আৰ চিৰ পুনৰীক্ষণ মানি নলয় বুলিও স্পষ্ট কৰি দিছে সংগঠনটোৱে ৷ শুকুৰবাৰে বৃহত্তৰ বঙাইগাঁও প্ৰেছ ক্লাবত আয়োজিত এখন সংবাদ মেলত আমছুৰ সভাপতি ৰেজাউল কৰিম সৰকাৰ আৰু সাধাৰণ সম্পাদক ইমতিয়াজ হুছেইনে কয় যে ড°হিমন্ত বিশ্ব শৰ্মাই যোৱা ১০ মে'ত মুখ্যমন্ত্ৰী হিচাপে শপত গ্ৰহণ কৰাৰ পিছতে সংবাদ মাধ্যমৰ আগত অসমৰ সীমান্ত জিলাৰ ২০ শতাংশ আৰু বাকী জিলাসমূহত ১০ শতাংশ এন আৰ চি ত নাম অন্তৰ্ভুক্ত হোৱা লোকৰ পুনৰীক্ষণ কৰা হ'ব বুলি প্ৰকাশ কৰিছে। আনহাতে এন আৰ চিৰ ৰাজ্যিক সমন্বয়কে ১১ মে'ত মহামন্য উচ্চতম ন্যায়ালয়ত এন আৰ চিৰ সম্পূৰ্ণ তথা বিস্তৃত পুনৰীক্ষণৰ বাবে আৱেদন দাখিল কৰিছে। কিন্তি মনকৰিবলগীয়া যে সেই আবেদন  (IA NO- 61664/21)ত বিগত ২০১৯ চনৰ ৩১ আগষ্টত প্ৰকাশ হোৱা চূড়ান্ত এন আৰ চি ক খচৰা তালিকাৰ সৈতে পৰিপূৰক তালিকা হিচাপে অভিহিত কৰিছে ৷ যি সম্পূৰ্ণ অযুক্তিকৰ তথা উচ্চতম ন্যায়ালয়ৰ আদেশ তথা কেন্দ্ৰীয় চৰকাৰৰ সিদ্ধান্তৰ পৰিপন্থী। সেইদৰে  চূড়ান্ত এন আৰ চি প্ৰকাশ পোৱাৰ আগত উচ্চতম ন্যায়ালয়ে কেইবাটাও আদেশ মৰ্মে  চূড়ান্ত এন আৰ চি প্ৰকাশ কৰিবলৈ নিৰ্দেশ দিছিল। উচ্চতম ন্যায়ালয়ৰ নিৰ্দেশ অনুসৰি ভাৰতৰ মহাপঞ্জীয়ক আৰু তদানীন্তন ৰাজ্যিক সমন্বয়কে ২০১৯ চনৰ ৩১ আগষ্টত যৌথ ভাৱে চূড়ান্ত এন আৰ চি প্ৰকাশ কৰে যদিও চূড়ান্ত এন আৰ চি প্ৰকাশিত হোৱাৰ পূৰ্বে কেন্দ্ৰীয় চৰকাৰ আৰু ৰাজ্য চৰকাৰে সম্পূৰ্ণ খচৰাত অন্তৰ্ভুক্ত হোৱা তথা বাদ পৰা লোকৰ পুনৰীক্ষণৰ বাবে আৱেদন দাখিল কৰে ৷ কিন্তু ৰাজ্যিক সমন্বয়কে দাখিল কৰা প্ৰতিবেদনৰ ওপৰত আশ্বস্ত হৈ ২০১৯ চনৰ ২৩ জুলাইত মহামান্য উচ্চতম ন্যায়ালয়ে কেন্দ্ৰীয় চৰকাৰ আৰু ৰাজ্য চৰকাৰৰ পুনৰীক্ষণৰ আবেদন খাৰিজ কৰে তথা ২০১৯ চনৰ ৩১ আগষ্টত চূড়ান্ত এন আৰ চি প্ৰকাশ কৰিবলৈ নিৰ্দেশনা প্ৰেৰণ কৰে ৷ সংবাদ মেলত আছু নেতাদ্বয়ে আৰু কয় যে চূড়ান্ত এন আৰ চি প্ৰকাশ হোৱাৰ পূৰ্বে অৰ্থাৎ ২০১৯ চনৰ ২০ আগষ্টত কেন্দ্ৰীয় গৃহ মন্ত্ৰালয়ে জাৰী কৰা বিবৃতিত ২০১৯ চনৰ ৩১ আগষ্টত প্ৰকাশ পাবলগীয়া এন আৰ চিক চূড়ান্ত এন আৰ চি বুলি অভিহিত কৰে।সমান্তৰালভাৱে ২০১৯ চনৰ ২ চেপ্টেম্বৰত কেন্দ্ৰীয় বৈদেশিক পৰিক্ৰমা মন্ত্ৰালয়ে বিবৃতি জাৰি কৰি ৩১ আগষ্টত প্ৰকাশ হোৱা এন আৰ চিক চূড়ান্ত এন আৰ চি বুলি অভিহিত কৰে। উক্ত বিবৃতিকেইখনত এন আৰ চিত বাদ পৰা লোকসকলৰ ভৱিষ্যতৰ  আইনী প্ৰক্ৰিয়াৰ বিষয়ো উল্লেখ কৰিছিল।কেন্দ্ৰীয় গৃহ ৰাজ্যিক মন্ত্ৰীয়ে ভাৰতৰ সংসদত ২০১৯ চনৰ ৩ জুলাই ,৩১ আগষ্ট , ৪ জুলাই আৰু ২০২১ চনৰ ১৬ মাৰ্চত উত্থাপন হোৱা লিখিত প্ৰশ্নৰ উত্তৰত ২০১৯ চনৰ ৩১ আগষ্টত প্ৰকাশিত হোৱা এন আৰ চিক চূড়ান্ত এন আৰ চি বুলি আখ্যা দি আহিছে। সেয়হে এন আৰ চিৰ ৰাজ্যিক সমন্বয়কে মহামান্য উচ্চতম ন্যায়ালয়ত কৰা আবেদনত চূড়ান্ত এন আৰ চিক খচৰা তালিকাৰ সৈতে পৰিপূৰক তালিকা হিচাপে অভিহিত কৰাৰ কথা আইন সংগত নহয় বুলি আমছুৱে মন্তব্য কৰে ৷ লগতে পুনৰীক্ষণৰ বিষয়টো মহামান্য উচ্চতম ন্যায়ালয়ে বিবেচনা কৰি ২০১৯ চনৰ ২৩ জুলাইত ৰায় প্ৰদান কৰাৰ পিছত পুনৰ এনে আবেদন আমি অৰ্থহীন বুলিও কয় ৷ লগতে আমছুৰ তৰফৰ পৰা উচ্চতম ন্যায়ালয়ত ইয়াৰ বিৰুদ্ধে সংগঠনটোৱে সবল স্থিতি ল'বলৈ ইতিমধ্যে সিদ্ধান্ত লোৱাৰ কথাও উল্লেখ কৰে। 

ইপিনে আমছুৰ নেতাদ্বয়ে সংবাদ মেলত উল্লেখ কৰা মতে এন আৰ চিৰ বৰ্তমান ৰাজ্যিক সমন্বয়কৰ ভাৱমূৰ্ত্তি তথা নিযুক্তিৰ বিৰুদ্ধে  আমছুৰ তৰফৰ পৰা উচ্চতম ন্যায়ালয়ত ইতিমধ্যে আবেদন (IA No.179757/2019) দাখিল কৰিছে আৰু বিষয়টো এতিয়াও বিচাৰাধীন হৈ আছে। আনহাতে মহামান্য উচ্চতম ন্যায়ালয়ৰ তত্বাৱধানত হৈ থকা এন আৰ চিত মহামান্য আদালতৰ নিৰ্দেশ নোহোৱাকৈ নিজাববীয়াকৈ ৰাজ্যিক সমন্বয়কে বিভিন্ন জিলাৰ উপাযুক্তক চিঠি প্ৰেৰণ কৰি এন আৰ চিত অন্তৰ্ভুক্ত হোৱা লোকৰ পুনৰীক্ষণৰ আদেশ দিয়া কাৰ্যৰ বিৰূদ্ধে আমছুৰ তৰফৰ পৰা মহামান্য উচ্চতম ন্যায়ালয়ত আদালতক অৱমাননা কৰা (Contempt Petition(C) No.  634/2020) আবেদন দাখিল কৰা হৈছে বুলি কৈ  এই আবেদন মহামান্য উচ্চতম ন্যায়ালয়ত বিচাৰাধীন হৈ আছে বুলিও কয়। সেয়হে এনে এগৰাকী বিতৰ্কিত বিষয়াৰ নিযুক্তি প্ৰক্ৰিয়া আৰু ব্যক্তিগত ভাৱমূৰ্তি সদায় প্ৰশ্নৰ আৱৰ্তত আছে আৰু আদালতত বিচাৰাধীন হৈ আছে, তেনে এগৰাকী বিষয়াৰ কাৰ্য আইন সংগতভাৱে নোহোৱাতো কোনো অস্বাভাৱিক কথা নহয় বুলিও আমছুৱে অনুভৱ কৰে। সেয়হে আমছুৱে এন আৰ চিৰ লগত জড়িত প্ৰত্যেকটো পক্ষক ৰাজনৈতিক চক্ৰান্তৰ পৰা বিৰত থাকি আইন সংগত ভাৱে বাকী কাম কাজখিনি নিয়াৰিকৈ আগুৱাই নিবলৈ আহ্বান জনায় ৷ লগতে এন আৰ চি সমন্বয়কে চলিত বৰ্ষৰ ১১ মেত উচ্চতম ন্যায়ালয়ত আবেদন দাখিল কৰাৰ পূৰ্বে কেন্দ্ৰীয় বা ৰাজ্য চৰকাৰৰ অনুমোদন  লৈছে নে  নাই  সেই কথা  ৰাজহুৱা কৰিবলৈকো চৰকাৰক দাবি জনায় সংগঠনটোৱে।সংবাদ মেলত আমছুৰ উপ সভাপতি আব্দুৰ ৰহমান বিশ্বাস ,মইদুল ইছলাম , সহকাৰী সাধাৰণ সম্পাদক তফিৰউদ্দিন আহমেদ ,মোৰাদোদ জামান শ্বেখ আৰু মুখ্য সাংগঠনিক সম্পাদক গুলজাৰ হুছেইন উপস্থিত থাকে ৷🔯