👉বঙাইগাঁও জিলাত বাৰ্মিজ চুপাৰিৰ অবৈধ বেহাৰ বিৰুদ্ধে আৰক্ষীৰ অভিযান

👉বঙাইগাঁও জিলাত বাৰ্মিজ চুপাৰিৰ অবৈধ বেহাৰ বিৰুদ্ধে আৰক্ষীৰ অভিযান

👉২৫ লক্ষাধিক টকা বজাৰমূল্যৰ অবৈধ চুপাৰি জব্দ 

বঙাইগাঁওঃ২৫ মেঃ 

📝 আন বিভিন্ন জিলাৰ লগতে বঙাইগাঁও জিলাতো অবৈধ গাঞ্জা ,বাৰ্মিজ চুপাৰী আদি বেহাৰ বিৰুদ্ধে আৰক্ষী বিভাগ সক্ৰিয় হৈ পৰিছে ৷ বিশেষকৈ জিলাখনত স্বপ্ননীল ডেকাই নতুনকৈ আৰক্ষী অধীক্ষক হিচাপে যোগদান কৰাৰ পিছতে আৰক্ষী বিভাগ সক্ৰিয় হৈ পৰা পৰিলক্ষিত হৈছে ৷ যোৱা নিশা বঙাইগাঁও জিলা আৰক্ষীয়ে জিলাখনৰ অন্তৰ্গত তথা চিৰাং জিলাৰ সীমামুৰীয়া চৌৰাগুৰিত অবৈধ বাৰ্মিজ চুপাৰিৰ বেহাৰ সৈতে জড়িত অবৈধ ব্যৱসায়িৰ বিৰুদ্ধে অভিযান চলায় ৷ উল্লেখ্য যে এই অঞ্চলটোত দীৰ্ঘ দিনৰ পৰা বাৰ্মিজ চুপাৰিৰ অবৈধ বেহা চলি থকাৰ লগতে এই বাৰ্মিজ চুপাৰিৰ আন্তৰ্জাতিক চোৰাং ব্যৱসায়ৰ সৈতে ছিণ্ডিকেট চক্ৰ এটা সক্ৰিয় হৈ থকাৰ অভিযোগ উত্থাপিত হৈ আহিছে ৷ তেনে সময়তে বঙাইগাঁও  জিলাৰ আৰক্ষী অধীক্ষক স্বপ্ননীল ডেকাৰ  নেতৃত্বত আৰক্ষীয়ে এই বাৰ্মিজ চুপাৰিৰ বেহাৰ সৈতে জড়িত স্বপন কুমাৰ সৰকাৰ নামৰ ব্যক্তি এজনৰ গৃহত নিশা ১১ মান বজাত এই অভিযান চলায় ৷ অভিযানকালত আৰক্ষীয়ে স্বপন কুমাৰ সৰকাৰৰ বাসগৃহৰ পৰা অবৈধ ভাৱে মজুত কৰি ৰখা অৱস্থাত ১৪০ বেগ বাৰ্মিজ চুপাৰি জব্দ কৰে । 

বাসগৃহটোত  বাংলাদেশত নিৰ্মিত কেইবাখনো মৰাপাটেৰে তৈয়াৰী বস্তাও জব্দ কৰে। অৱশ্যে বঙাইগাঁও আৰক্ষীৰ অভিযানৰ উমান পাই বাসগৃহৰ গৰাকী স্বপন কুমাৰ সৰকাৰে পলাই যাবলৈ সক্ষম হয়। আৰক্ষীয়ে অভিযানকালত ট্ৰাক এখনৰ লগতে চুপাৰিত মিহলোৱা ৰং , ৰং জাতীয় ৰাসায়নিক দ্ৰব্য আদিও জব্দ কৰে ৷ ইপিনে অভিযান সন্দৰ্ভত জিলা আৰক্ষী অধীক্ষক স্বপ্ননীল ডেকাই সংবাদ মাধ্যমৰ আগত কয় যে এক গোপন সূত্ৰৰ পম খেদি বঙাইগাঁও আৰক্ষীয়ে নিশা এই অভিযান চলাই অবৈধভাৱে মজুত কৰি ৰখা ১৪০ বস্তা বাৰ্মিজ চুপাৰি জব্দ কৰিবলৈ সক্ষম হয় ৷ প্ৰতিটো বস্তাত প্ৰায় ৬০ কিলোকৈ চুপাৰি আছে ৷ অৱশ্যে আমি অহাৰ পূৰ্বে স্বপন কুমাৰ সৰকাৰ পলায়ণ কৰে ৷ কিন্তু অতি সোনকালে আটক কৰিবলৈ সক্ষম হ'ম ৷ আৰক্ষী অধীক্ষকগৰাকীয়ে আৰু দুটামান খবৰ আছে আৰু ব্যৱস্থা লোৱা হ'ব বুলি কৈ অবৈধ বেহাৰ বিৰুদ্ধে তথ্য পালেই ব্যৱস্থা গ্ৰহণ কৰা হ'ব বুলিও প্ৰকাশ কৰে ৷ এই অভিযানত জিলাৰ অতিৰিক্ত আৰক্ষী অধীক্ষক , উপ আৰক্ষী অধীক্ষক ,বঙাইগাঁও সদৰ থানাৰ ভাৰপ্ৰাপ্ত আৰক্ষী বিষয়া আদিও আছিল ৷ ইপিনে জানিব পৰা মতে দেওবাৰে নিশাও বঙাইগাঁও আৰক্ষীয়ে এ এচ - ০১ এল এল ১২৭৬ নম্বৰৰ এখন চুপাৰি ভৰ্তি ট্ৰাক জব্দ কৰিবলৈ সক্ষম হয় ৷🔯