🔯কোচ ৰাজবংশী জনগোষ্ঠীৰ সমস্যাঃ 🔯কেন্দ্ৰ আৰু ৰাজ্যত অধিষ্ঠিত প্ৰতিটো গাদী দখলকাৰী ৰাজনৈতিক দলেই প্ৰতাৰণা কৰি আহিছে - বিশ্বজিৎ ৰায়

🔯কোচ ৰাজবংশী জনগোষ্ঠীৰ 

🔯শীঘ্ৰে সমস্যা সমাধান নকৰিলে আগষ্টৰ পৰা অসম - পশ্চিম বংগৰ সংগঠনেৰে ঐক্যমঞ্চ গঠন কৰি পুনৰ আন্দোলনৰ হুংকাৰ 

🔯পশ্চিম বংগৰ মমতা বেনাৰ্জী নেতৃত্বাধীন চৰকাৰকো সমালোচনা

📝বঙাইগাঁওঃ ৩০ জুনঃ অসম চৰকাৰে যদি কোচ ৰাজবংশী সংগঠনেৰে আলোচনা কৰি জনজাতিকৰণ আৰু কমতাপুৰৰ দাবীকে ধৰি জনগোষ্ঠীটোৰ সমস্যাসমূূহ সমাধা নকৰে তেতিয়াহলে অসম আৰু পশ্চিম বংগৰ কোচ ৰাজবংশী সংগনেৰে ঐক্যমঞ্চ গঠন কৰি অহা আগষ্ট মাহৰ পৰাই জনজাতিকৰণ আৰু পৃথক কমতাপুৰ ৰাজ্য পুনৰ গঠনৰ দাবীত তীব্ৰ আন্দোলন কৰা হ'ব বুলি হুংকাৰ দিছে কোচ ৰাজবংশী জাতীয় মহাসভাৰ সাধাৰণ সম্পাদক বিশ্বজিৎ ৰায়ে ৷ লগতে ইতিমধ্যে এই সম্পৰ্কে অসম-পশ্চিম বংগৰ কেইবাটাও সংগঠনেৰে অনানুষ্ঠানিক আলোচনা হোৱা বুলিও বিশ্বজিৎ ৰায়ে জানিবলৈ দিছে ৷ বুধবাৰে বঙাইগাঁৱত কোচ ৰাজবংশী জাতীয় মহাসভা আৰু কোচ ৰাজবংশী জাতীয় মঞ্চই আয়োজন কৰা এখন যৌথ সংবাদমেল সম্বোধন কৰি আক্ৰাছুৰ প্ৰাক্তন সভাপতি তথা কোচ ৰাজবংশী জাতীয় মহাসভাৰ সাধাৰণ সম্পাদক বিশ্বজিৎ ৰায়ে তীব্ৰ ক্ষোভ প্ৰকাশ কৰি কৰি কয় যে কেন্দ্ৰ আৰু ৰাজ্যত অধিষ্ঠিত প্ৰত্যেকটো গাদী দখলকাৰী ৰাজনৈতিক দলেই চৰকাৰ গঠন কৰাৰ আগত কোচ ৰাজবংশীৰ সমস্যা সমাধানৰ কথা কয যদিও চৰকাৰ গঠন কৰাৰ পিচত সমস্যা সমাধান নকৰি চৰমভাবে প্ৰতাৰণা কৰি আহিছে ৷ পূৰ্বৰ কংগ্ৰেছ চৰকাৰৰ দৰে যোৱা ২০১৪ চনৰ লোকসভা নিৰ্বাচন আৰু ২০১৬ চনৰ অসম বিধান সভাৰ নিৰ্বাচনত বিজেপি দলে কেন্দ্ৰ আৰু অসমত চৰকাৰ গঠন কৰিলেই ছয় মাহৰ ভিতৰত অসমৰ ছয় জনগোষ্ঠীক অনুসূচিত জনজাতিকৰণৰ মৰ্যাদা প্ৰদানৰ কথা নিৰ্বাচনী ঘোষণা পত্ৰ আৰু বিভিন্ন নিৰ্বাচনী সভাত প্ৰতিশ্ৰুতি দিছিল যদিও প্ৰধানমন্ত্ৰী নৰেন্দ্ৰ মোডী নেতৃত্বাধীন কেন্দ্ৰীয় চৰকাৰ আৰু মুখ্যমন্ত্ৰী সৰ্বানন্দ সোণোৱাল নেতৃত্বাধীন অসম চৰকাৰে প্ৰথমটো কাৰ্যকালত জনজাতিকৰণৰ বিষয়টো সমাধা নকৰিলে ৷ বৰং তদানীন্তন বিত্ত আৰু স্বাস্থ্য মন্ত্ৰী ড° হিমন্ত বিশ্ব শৰ্মাক অধ্যক্ষ হিচাপে লৈ কেন্দ্ৰীয় চৰকাৰে মন্ত্ৰী গোট গঠন কৰিছিল যদিও দুই এখন সভা অনুষ্ঠিত কৰি পৰৰ্ৱতী সময়ত অসম বিধান সভাৰ নিৰ্বাচনৰ অজুহাত দেখুৱাই মন্ত্ৰী গোটৰ প্ৰতিবেদন কেন্দ্ৰীয় চৰকাৰলৈ প্ৰেৰণ নকৰিলে ৷ অথচ কোচ ৰাজবংশী জনগোষ্ঠীৰ সকলো সংগঠনে জনজাতিকৰণৰ বিষয়টো সমাধান কৰাৰ বাবে মন্ত্ৰী গোটৰ অধ্যক্ষ ড° হিমন্ত বিশ্ব শৰ্মাক লিখিতভাবে সমাধান সূত্ৰ প্ৰদান কৰিছিল ৷ বৰ্তমান তদানীন্তন অসম চৰকাৰৰ মন্ত্ৰী তথা মন্ত্ৰী গোটৰ অধ্যক্ষ ড° হিমন্ত বিশ্ব শৰ্মা যিহেতু অসমৰ মুখ্যমন্ত্ৰী হ'ল আমি আশা কৰিছিলোঁ জনজাতিকৰণৰ বিষয়টো সমাধানৰ বাবে খৰতকীয়া ব্যৱস্থা গ্ৰহণ কৰিব ৷ কিন্তু নতুন মুখ্যমন্ত্ৰী গৰাকীয়েও বিষয়টো সমাধনৰ ক্ষেত্ৰত তৎপৰতা অৱলম্বন কৰা দেখা পোৱা নাই ৷ আনকি মুখ্যমন্ত্ৰীক বিষয়টো সোঁৱৰাই দিয়াৰ বাবে কোচ ৰাজবংশী সংগঠন সমূহে সাক্ষাৎ কৰিব বিচাৰিছিল যদিও মুখ্যমন্ত্ৰীয়ে আজিলৈকে সাক্ষাতৰ বাবে সময় দিয়া নাই ৷ এতিয়া আমি ভাবিবলৈ বাধ্য হৈছো যে বৰ্তমানৰ মুখ্যমন্ত্ৰী গৰাকীৰ মনোভাৱ পূৰ্বৰ মুখ্যমন্ত্ৰী সকলোৰ দৰে একেই ৷ 

ইপিনে কমতাপুৰ স্বায়ত্বশাসিত পৰিষদ সন্দৰ্ভত সংবাদমেলত বিশ্বজিৎ ৰায়ে কয় য়ে তদানীন্তন মুখ্যমন্ত্ৰী সৰ্বানন্দ সোণোৱাল নেতৃত্বাধীন অসম চৰকাৰে যোৱা বিধান সভাৰ নিৰ্বাচনী বৈতৰণী পাৰ হোৱাৰ স্বাৰ্থত অন্তৰ্ৱৰ্তীকালিন কমতাপুৰ স্বায়ত্বশাসিত পৰিষদখন কোচ ৰাজবংশী জাতীয় আন্দোলনত জড়িত নথকা কেইজনমান বিজেপি দলৰ নেতা-পালিনেতা আৰু চৰকাৰে নিজেই প্ৰণয়ন কৰা কমতাপুৰ স্বায়ত্বশাসিত পৰিষদৰ আইনক উলাই কৰি পৰিষদৰ বাহিৰৰ কেইবাজনক অন্তৰ্ভূক্ত কৰি অন্তৰ্ৱৰ্তীকালিন পৰিষদখন গঠন কৰিছিল ৷ আনকি চৰকাৰী স্কুলত চাকৰি কৰা ব্যক্তি পৰিষদত অন্তৰ্ভুক্ত কৰিছে ৷ যাৰ বাবে অন্তৰ্ৱৰ্তীকালিন পৰিষদখনক অবৈধ আখ্যা দি কোচ ৰাজবংশী জনগোষ্ঠীৰ কেইবাটাও সংগঠনে ক্ষোভ প্ৰকাশ কৰাৰ লগতে ধুবুৰী জিলাৰ তিনিজন সচেতন ব্যক্তিয়ে গুৱাহাটী উচ্চ ন্যায়ালয়ৰ দ্বাৰস্থ হৈছিল ৷ সেয়ে মুখ্যমন্ত্ৰী ড° হিমন্ত বিশ্ব শৰ্মাই যদি কোচ ৰাজবংশী জনগোষ্ঠীৰ উন্নয়ণ বিচাৰে আৰু জনগোষ্ঠীটোৰ আবেগ অনুভূতিৰ প্ৰতি দায়বদ্ধতা আৰু শ্ৰদ্ধাশীল, তেন্তে অচিৰেই কোচ ৰাজবংশী জনগোষ্ঠীৰ সকলো সংগঠনেৰে আলোচনা কৰি স্বায়ত্বশাসিত পৰিষদখন পৰিষদৰ ভিতৰৰ উপযুক্ত ব্যক্তিকলৈ পুনৰ গঠন কৰাৰ লগতে কোচ ৰাজবংশী সকলোক অনুসূচিত জনজাতিকৰণৰ মৰ্যাদা প্ৰদানৰ বাবে কেন্দ্ৰীয় চৰকাৰলৈ প্ৰতিবেদন প্ৰেৰণ কৰি জনজাতিকৰণ কৰক ৷ অন্যাথা কোচ ৰাজবংশী সকলে পুনৰ গণতান্ত্ৰিকভাবে আন্দোলন কৰাৰ বাহিৰে গত্যন্তৰ নাথাকিব বুলি চৰকাৰক সকীয়াই দিয়ে কোচ ৰাজবংশী জাতীয় মহাসভা আৰু কোচ ৰাজবংশী জাতীয় মঞ্চই ৷ লগতে অসম চৰকাৰে যদি কোচ ৰাজবংশী সংগঠনেৰে আলোচনা কৰি সমস্যা সমাধা নকৰে তেতিয়াহলে অসম আৰু পশ্চিম বংগৰ কোচ ৰাজবংশী সংগনেৰে ঐক্যমঞ্চ গঠন কৰি অহা আগষ্ট মাহৰ পৰাই পৃথক কমতাপুৰ ৰাজ্য পুনৰ গঠন আৰু জনজাতিকৰণৰ দাবীত তীব্ৰ আন্দোলন কৰা হ'ব বুলি হুংকাৰ দি এই সম্পৰ্কে অসম-পশ্চিম বংগৰ কেইবাটাও সংগঠনেৰে অনানুষ্ঠানিক আলোচনা হোৱা বুলিও সদৰি কৰে ৷ 

সংবাদ মেলত কোচ ৰাজবংশী নেতা বিশ্বজিৎ ৰায়ে পশ্চিম বংগত শাসনাধিষ্ঠিত তৃণমূল কংগ্ৰেছ নেতৃত্বাধীন চৰকাৰকো কঠোৰ ভাষাৰে সমালোচনা কৰি কয় যে মমতা বেনাৰ্জী নেতৃত্বাধীন চৰকাৰে কোচ ৰাজবংশীৰ উন্নয়ন নিবিচাৰে, বৰং কূট-কৌশল কৰি আৰু দুই-এক তোষামোদকাৰী কোচ ৰাজবংশী নেতাক চৰকাৰী পদবীত বহুৱাই কমতাপুৰ ৰাজ্যৰ আন্দোলনক মষিমূৰ কৰিব বিচাৰিছে ৷ অবিভক্ত গোৱালপাৰা জিলা যেনেকৈ অসমৰ অংগ নাছিল সেইদৰে উত্তৰ বংগ কেতিয়াও পশ্চিম বংগ ৰাজ্যৰ অধীনস্থ নাছিল আৰু শাসন কৰাৰ অধিকাৰো নাই ৷ সেই কথা মুখ্যমন্ত্ৰী মমতা বেনাৰ্জীয়ে কোচবিহাৰ ৰাজ্যৰ ইতিহাস আৰু ১৯৪৯ চনৰ ২৮ আগষ্টত ভাৰত চৰকাৰ আৰু কোচবিহাৰ ৰাজ্যৰ মাজত হোৱা চুক্তিখন এবাৰ ফঁহিয়াই চালে গম পাব । কমতাপুৰ ৰাজ্য কোচ-কমতাবাসীৰ ন্যাৰ্য দাবী আৰু এই দাবীৰ পৰা কোনো চৰকাৰে কোচ ৰাজবংশী সকলোক আতৰাই আনিব নোৱাৰে ৷ কোচ ৰাজবংশী সকল কেতিয়াও কাৰো বশ্যতা স্বীকাৰ কৰি জীয়াই থকা নাছিল ৷ কিন্তু চুকত থাকি বুকুত কামোৰ মৰা আৰু দুই এক নেতাৰ সুবিধাবাদী চৰিত্ৰৰ বাবে কোচ ৰাজবংশী সকল বিভাজিত হৈ পশ্চিম বংগ আৰু অসমৰ অধীনস্থ হ'ব লগা হৈছিল আৰু এই দুই ৰাজ্যত বিভাজিত হৈ কোচ ৰাজবংশী সকলে অসমীয়া আৰু বঙালী ভাষা আৰু সংস্কৃতি গ্ৰহণ কৰাৰ ফলত কোচ ৰাজবংশী জনগোষ্ঠীৰ নিজস্ব স্বকীয়তা কিছুপৰিমাণে বিলুপ্তিৰ পথত ৷ কোচ ৰাজবংশী সকল কেতিয়াও মূলসুঁতিৰ অসমীয়া আৰু বঙালী নাছিল বুলি উল্লেখ কৰি বিশ্বজিৎ ৰায়ে কয যে শেহতীয়াকৈ পশ্চিম বংগৰ বিজেপি সাংসদ জন বাৰ্লাই উত্তৰ বংগক কেন্দ্ৰীয় শাসিত ৰাজ্যৰ মৰ্যাদা দিব লাগে বুলি যি বক্তব্য তুলি ধৰিছে তাক কোচ ৰাজবংশী জাতীয় মহাসভাই আদৰণি জনাইছে ৷ তদানীন্তন অটল বিহাৰী বাজপেয়ী নেতৃত্বাধীন বিজেপি চৰকাৰে যদি ঝাৰখণ্ড, উত্তৰাখণ্ড আৰু ছত্তিছগড় ৰাজ্য গঠন কৰিব পাৰে, তেতিয়াহলে অসম আৰু পশ্চিম বংগত অন্তৰ্ভূক্ত হৈ থকা ঐতিহাসিক কমতাপুৰ ৰাজ্যৰ ভূখণ্ডক সামৰি কমতাপুৰ নতুবা কোচবিহাৰ ৰাজ্য কিয় গঠন কৰিব নোৱাৰে বুলিও প্ৰশ্ন কৰে ৷ কমতাপুৰ নতুবা কোচবিহাৰ ৰাজ্য গঠন নোহোৱালৈকে কোচ ৰাজবংশী সকল ৰাজনৈতিক, সামাজিক, অৰ্থনৈতিক আৰু শৈক্ষিক ভাবে কেতিয়াও সুৰক্ষিত নহয় বুলিও কয় ৷গতিকে কেন্দ্ৰীয় চৰকাৰে যদি কোচ ৰাজবংশী সকলোক ভাৰতীয় নাগৰিক বুলি ভাবে আৰু নামনি অসম আৰু উত্তৰ বংগত স্থায়ী শান্তি বিচাৰে তেতিয়াহলে অতিশীঘ্ৰে কমতাপুৰ নতুবা কোচবিহাৰ ৰাজ্য পুনৰ গঠন কৰিবলৈ কেন্দ্ৰীয় চৰকাৰক সংবাদমেল যোগে দাবী জনায় ৷ সংবাদমেল যোগে অবিভক্ত গোৱালপাৰা জিলাক শৈক্ষিক , সাংস্কৃতিক আৰু ক্ৰীড়াৰ ক্ষেত্ৰত আগুৱাই নিয়াৰ স্বাৰ্থত চিলাৰায় অভিযান্ত্ৰিক মহাবিদ্যালয়ৰ নিৰ্মাণ খৰতকীয়া কৰাৰ লগতে আগন্তুক ১২ জুলাইৰ পৰা আৰাম্ভ হ'ব লগা অসম বিধানসভাৰ বাজেট অধিবেশনতে বঙাইগাঁও জিলাত এখন পূৰ্ণাংগ বিশ্ববিদ্যালয়, চিকিৎসা মহাবিদ্যালয়, নৰনাৰায়ণ সাংস্কৃতিক আৰু ক্ৰীড়া ক্ষেত্ৰ, নাৰ্চিং মহাবিদ্যালয়, চিলাৰায় কমাণ্ডো বাহিনী, খেলা-ধূলাৰ বাবে ছাই(SAI)ৰ এটা শাখা কেন্দ্ৰ আৰু সোণালী বান্দৰৰ ৰম্যভূমি কাকৈজানা বনাঞ্চলক অভয়াৰণ্য হিচাপে ঘোষণা কৰাৰ লগতে বিজনী, চিদলী, চিকনাঝাৰ ৰাজবাৰীক সংৰক্ষণ কৰিবলৈ অসম চৰকাৰক অনুৰোধ জনায় । সংবাদমেলত কোচ ৰাজবংশী জাতীয় মঞ্চৰ সাধাৰণ সম্পাদক ভূপেন ৰায়ো উপস্থিত আছিল ৷ উল্লেখ্য যে সংবাদ মেলত বিটিচি কোচ ৰাজবংশী সন্মিলনী  আৰু বিটিচি কোচ ৰাজবংশী যুৱ-ছাত্ৰ সন্মিলনীও উপস্থিত থকাৰ কথা আছিল যদিও প্ৰতিকূল বতৰৰ বাবে উপস্থিত থাকিব নোৱাৰিলে ৷ সংগঠন দুুুটা উপস্থিত থাকিব নোৱাৰিলেও জাতীয় মহাসভা আৰু জাতীয় মঞ্চই উত্থাপন কৰা বিষয় তথা দাবীৰ প্ৰতি সমৰ্থন জনোৱা বুলি বিশ্বজিৎ ৰায়ে অৱগত কৰে ৷ 🔯