🔯বৰপথাৰত পথচাৰীক খুন্দিয়ালে তীব্ৰবেগী ছুইফটে

🔯বৰপথাৰত পথচাৰীক খুন্দিয়ালে তীব্ৰবেগী ছুইফটে

🔯শিশুসহ আহত ৪

📝বঙাইগাঁওঃ ১২ জুলাইঃঃ চিৰাং আৰু বঙাইগাঁও জিলাৰ সীমন্তৱৰ্তী বৰপথাৰ গাঁৱত দেওবাৰে নিশা সংঘটিত এক পথ দুৰ্ঘটনাত শিশুসহ ৪ গৰাকী ব্যক্তি গুৰুতৰভাৱে আহত হৈছে । আৰক্ষী সূত্ৰে লাভ কৰা তথ্য মতে , যোৱা নিশা ৮ মান বজাত চিৰাং জিলাৰ মংলাগাঁও চাৰিআলি চ'কৰ পৰা বঙাইগাঁও জিলাৰ বৰপথাৰ বজাৰলৈ যোৱা গড়কপ্তানী পথছোৱাৰ মাজভাগত থকা দলঙৰ কাষত ৰৈ থকা তিনি পথচাৰীক এ এছ ১৯ ডি - ২৮৩৮ নম্বৰৰ তীব্ৰবেগেৰে অহা ছুইফ গাড়ীখনে পিছফালৰ পৰা খুন্দিয়াই দলঙখনৰ প্ৰায় ২০ ফুট তলৰ বোকা পানীলৈ ছিটিকি পৰে ।  লগতে পথৰ কাষত ৰখাই থোৱা এ এছ - ২৬ বি - ০৫৬৯ নম্বৰৰ মটৰ চাইকেলখনো ছুইফটৰ খুন্দাত দলঙৰ তললৈ সৰি পৰে । দুৰ্ঘটনাটোত কোনো লোকৰ প্ৰাণহানি নহলেও পথচাৰী তিনি গৰাকী গুৰুতৰভাৱে আহত হয় ৷ আহত তিনিজন বঙাইগাঁও জিলাৰ বৰপথাৰ গাঁৱৰ লাচেন সূত্ৰধৰৰ পুত্ৰ তলেন সূত্ৰধৰ (২৪) , চিৰাং জিলাৰ মংলাগাঁৱৰ প্ৰেমদাস মণ্ডলৰ পুত্ৰ প্ৰকাশ মণ্ডল (৩২) আৰু চিৰাং জিলাৰ বেতবাৰীৰ সুদেব ৰায়ৰ পুত্ৰ সুমিত ৰায় (৪) বুলি আৰক্ষী সূত্ৰে জানিব পৰা গৈছে । মোমায়েকৰ ঘৰলৈ ফুৰিবলৈ অহা ৪ বছৰীয়া কনমানি সুমিতক লৈ প্ৰকাশ উক্ত স্থানলৈ যাঁওতে  এনেদৰে দুৰ্ঘটনাত পতিত হয় । ইপিনে উক্ত দুৰ্ঘটনাত উল্লেখিত ছুইফটখনৰ চালক ডাংতলৰ পদুম বাহাদুৰৰ পুত্ৰ সমীৰ থাপা (৩৮) নামৰ যুবকজনো গুৰুতৰভাৱে আহত হয় । আৰক্ষীয়ে খবৰ পোৱা মাত্ৰকে ঘটনাস্থলীত উপস্থিত হৈ ১০৮ এম্বুলেন্সৰে আহত চাৰিওকে বঙাইগাঁৱৰ স্বাগত হাস্পতাললৈ প্ৰেৰণ কৰে । আহত সকলে মূৰ , হাত , ভৰি , বুকু , পিঠি , মুখমণ্ডল আদি স্থানত আঘাত প্ৰাপ্ত হৈছে । ইপিনে আৰক্ষীয়ে ক্ৰেনৰ সহায়ত গাড়ী দুখন নিশা ১০.৩০ মান বজাত উদ্ধাৰ কৰি নিজৰ জিম্মাত লয় ।  । স্থানীয় লোকৰ অভিযোগ মতে ছুইফটখনৰ চালকসহ আন দুই আৰোহী মদ্যপান কৰা অবস্থাত থকা বাবেই এই মৰ্মান্তিক ঘটনাটো সংঘটিত হয় ।🔯