🔯অস্থায়ী বিদ্যুৎ কৰ্মচাৰী সকলৰ চাকৰি নিয়মীয়াকৰণৰ দাবীত বঙাইগাঁৱত ৰাজ্যিক ভিত্তিত সভা

🔯অস্থায়ী বিদ্যুৎ কৰ্মচাৰী সকলৰ চাকৰি নিয়মীয়াকৰণৰ দাবীত বঙাইগাঁৱত ৰাজ্যিক ভিত্তিত সভা

📝বঙাইগাঁওঃ ২২ আগষ্টঃ  অসম ৰাজ্যিক বিদ্যুৎ পৰিষদৰ উত্তৰসুৰী তিনিওটা কোম্পানী ক্ৰমে অসম শক্তি বিতৰণ কোম্পানী লিমিটেড , অসম শক্তি উৎপাদন নিগম লিমিটেড আৰু অসম বিদ্যুৎ সংবহন নিগম লিমিটেডৰ অধীনত কৰ্মৰত অস্থায়ী বিদ্যুৎ কৰ্মচাৰী সকলৰ বৃহত্তম মঞ্চ আসাম ষ্টেট আউটচৰ্চ পাৱাৰ ৱাৰ্কাৰ্চ ইউনিয়নৰ আজি এখন ৰাজ্যিক ভিত্তিক  সাধাৰণ সভা আৰু কেন্দ্ৰীয় কাৰ্যনিৰ্বাহক সভা বঙাইগাঁও চহৰৰ যতীন্দ্ৰ ভৱনত অনুষ্ঠিত হয় ৷ ৰাজ্যখনৰ বিভিন্ন প্ৰান্তৰ পৰা অহা ইউনিয়নৰ শাখা সমিতিসমূহৰ প্ৰতিনিধিৰ উপস্থিতিত অনুষ্ঠিত সাধাৰণ সভাত অস্থায়ী কৰ্মচাৰীসকলৰ বিভিন্ন সমস্যাসমূহৰ ওপৰত আলোচনা কৰা হয় ৷ মূলত বিদ্যুৎ বিভাগৰ অস্থায়ী কৰ্মচাৰী সকলোৰ চাকৰি নিয়মীয়াকৰণ কৰাৰ দাবীত অনুষ্ঠিত হয় এই সভা ৷ সভাত আসাম ষ্টেট আউটচৰ্চ পাৱাৰ ৱাৰ্কাৰ্চ ইউনিয়নৰ সভাপতি দিব্যজোতি পাঠক , সাধাৰন সম্পাদক ধনজিৎ কুমাৰ ৰায় , সংগঠনটোৰ উপদেষ্টা সকল ক্ৰমে অমিত কৰ , ৰাজেশ পাঠক , মৃনাংগ শৰ্মাসহ আৰু কেইবাজনো বিষয়ববীয়া উপস্থিত থাকে ৷ ইপিনে  সংগঠনটোৱে আয়োজন কৰা এখন সংবাদ মেলত সংগঠনটোৰ নেতৃবৃন্দই বৰ্তমানৰ বিজেপি নেতৃত্বাধীন চৰকাৰক সমালোচনা কৰি কয় যে বিদ্যুৎ বিভাগৰ এই অস্থায়ী কৰ্মচাৰীসকল দীৰ্ঘদিন ধৰি বিনা বেতনে সেৱা আগবঢ়াই আহিছে যদিও চৰকাৰে এইসকল কৰ্মচাৰীৰ চাকৰি নিয়মীয়াকৰণ নকৰিলে ৷ ৰাজ্য খনত কৰ্মৰত প্ৰায় পাঁচ সহস্ৰাধিক এই অস্থায়ী কৰ্মচাৰী সকলে ৰ'দ - বৰষুণ , বতাহ - ধুমুহাকো নেওচি দিনে নিশাই বিদ্যুৎ বিভাগৰ সেৱা আগবঢ়াই গৈছে ৷ বিভাগটোত এনেও উদাহৰণ আছে যে এই বিভাগত অস্থায়ী কৰ্মচাৰী হিচাপে বিনা বেতনে কাম কৰি বৃদ্ধ বয়স হৈছে ৷ আকৌ কিছুমান কৰ্মচাৰীৰ বয়স হৈ মৃত্যুয়ো ঘটিছে ৷ তথাপি এই অস্থায়ী কৰ্মচাৰী সকলৰ চাকৰি নিয়মীয়াকৰণ কৰা নহ'ল ৷ ইপিনে যোৱা কিছুদিন পূৰ্বে বিদ্যুৎ বিভাগৰ প্ৰায় ১,৮০০  কৰ্মচাৰীৰ নিযুক্তিৰ বাবে সাক্ষাৎকাৰ অনুষ্ঠিত হৈছিল ৷ উক্ত সাক্ষাৎকাৰৰ বাবে জাৰি কৰা জাননীত প্ৰথমতে উল্লেখ কৰা হৈছিল যে এই সাক্ষাৎকাৰত বিদ্যুৎ বিভাগত বৰ্তমান কৰ্মৰত অস্থায়ী কৰ্মচাৰী সকলে আবেদন কৰিব পাৰিব ৷ সেই মতে চৰকাৰে ধাৰ্য কৰা ১০০ টকীয়া মাচুল আদায় দি এই অস্থায়ী কৰ্মচাৰী সকলে উক্ত সাক্ষাৎকাৰৰ বাবে আবেদন কৰে ৷ কিন্তু পিছত আন এক জাননী যোগে উক্ত সাক্ষাৎকাৰৰ পৰা অস্থায়ী কৰ্মচাৰীসকলক বঞ্চিত কৰি অনুষ্ঠিত কৰা হ'ল এই সাক্ষাৎকাৰ ৷ জাননী যোগে জনোৱা হ'ল যে বিদ্যুৎ বিভাগত কাম কৰাৰ কমেও পাঁচ বছৰৰ অভিজ্ঞতা থকা তথা এই কামৰ বিনিময়ত বিভাগীয় ভাবে প্ৰদান কৰা ধনৰ ৰচিদ দিব নোৱাৰাত অস্থায়ী কৰ্মচাৰী সকলক এই সাক্ষাৎকাৰত অযোগ্য বুলি বিৱেচনা কৰা হয় ৷ ইপিনে বিনা বেতনে চাকৰি কৰা এই অস্থায়ী কৰ্মচাৰী সকলৰ ক্ষেত্ৰত ৰচিদৰ কথা কৈ এই সাক্ষাৎকাৰৰ পৰা বঞ্চিত কৰা কাৰ্যত হতভম্ব হৈ পৰে এই কৰ্মচাৰী সকলে ৷ উল্লেখ্য যে জীৱনৰ উপযুক্ত সময় খিনি বিনাবেতনে চাকৰি কৰি বিভাগটোত দিনে নিশাই সেৱা আগবঢ়াই শেষ মূহুৰ্তত সাক্ষাৎকাৰৰ পৰা বঞ্চিত হোৱা কাৰ্যত মনোবলো ভাঙি পৰিছে এই অস্থায়ী কৰ্মচাৰী সকলৰ ৷ ফলত চৰকাৰৰ এনে কাৰ্যৰ প্ৰতিবাদ জনাই তথা অস্থায়ী কৰ্মচাৰী সকলৰ চাকৰি নিয়মীয়াকৰণ কৰাৰ দাবীত সংগঠনটোৱে অনুষ্ঠিত কৰে এই সভা ৷ সংবাদ মেলত সংগঠনটোৰ নেতৃত্বই অস্থায়ী কৰ্মচাৰীসকলৰ চাকৰি নিয়মীয়াকৰণৰ বাবে চৰকাৰে অতিশীঘ্ৰে ব্যৱস্থা গ্ৰহণ নকৰিলে গণতান্ত্ৰিক পদ্ধতিৰে আন্দোলন কৰিবলৈ বাধ্য হ'ব বুলিও উল্লেখ কৰে ৷🔯