🔯বঙাইগাঁৱত জাপানীজ এনকেফেলাইটিছ প্ৰতিৰোধৰ বাবে গঠিত টাস্ক ফৰ্চৰ সভা

🔯বঙাইগাঁৱত জাপানীজ এনকেফেলাইটিছ প্ৰতিৰোধৰ বাবে গঠিত টাস্ক ফৰ্চৰ সভা

📝বঙাইগাঁওঃ ৩ জুলাইঃ বঙাইগাঁও জিলাৰ অতিৰিক্ত উপায়ুক্ত নৱজ্যোতি ওজাৰ অধ্যক্ষতাত শনিবাৰে জিলা উপায়ুক্ত কাৰ্যালয়ৰ সভাকক্ষত জিলাখনত জাপানীজ এনকেফেলাইটিছ প্ৰতিৰোধৰ বাবে গঠিত টাস্ক ফৰ্চৰ চলিত বৰ্ষৰ প্ৰথমখন সভা অনুষ্ঠিত হয় ৷ সভাত বিভিন্ন সহযোগী বিভাগেৰে গঠিত এই টাস্ক ফৰ্চৰ কাম - কাজৰ বিষয়ে বিশদভাবে পৰ্যালোচনা কৰা হয় ৷ সভাত অতিৰিক্ত উপায়ুক্তগৰাকীয়ে জাপানীজ এনকেফেলাইটিছ, একিউট এনকেফেলাইটিছ ছিন্ড্ৰম ৰোগৰ সংক্ৰমণ ৰোধৰ ক্ষেত্ৰত ক্ষিপ্ৰভাৰে আৰু সুপৰিকল্পনাৰ কাৰ্যপন্থা অৱলম্বন কৰি যাবলৈ আহ্বান জনায় ৷এইক্ষেত্ৰত ৰাইজৰ মাজত সজাগতা বৃদ্ধিৰ ওপৰতো গুৰুত্ব আৰোপ কৰে ৷

ক'ভিড- ১৯ আৰু সাম্ভব্য বানপানী সমস্যাৰ লগতে জাপানীজ এনকেফেলাইটিছ ৰোধৰ ক্ষেত্ৰত জিলাখনৰ সকলো বিভাগক প্ৰয়োজনীয় যাৱতীয় নিৰ্দেশ প্ৰদান কৰে ৷ সভাত জিলা স্বাস্থ্য বিভাগৰ যুটীয়া স্বাস্থ্য সেৱা সঞ্চালক ডাঃ নীলমাধৱ দাস ,জিলা নিৰীক্ষণ বিষয়া ডাঃ বাদল সৰকাৰ ,জিলা মেলেৰিয়া বিষয়া ডাঃ ইমদাদুল ইছলাম খানৰ লগতে বিভিন্ন সংশ্লিষ্ট চৰকাৰী বিভাগৰ মুৰব্বী বিষয়াসকলৰ উপৰিও ৰাষ্ট্ৰীয় স্বাস্থ্য অভিযানৰ বিষয়ববীয়াসকল উপস্থিত থাকে ৷🔯