🔯বঙাইগাঁও জিলা উপায়ুক্তৰ মাল্টি মডেল ল'জিষ্টিক পাৰ্ক আৰু ধ্বজাবাহী আঁচনিৰ কামৰ পৰ্যালোচনা

🔯বঙাইগাঁও জিলা উপায়ুক্তৰ মাল্টি মডেল ল'জিষ্টিক পাৰ্ক আৰু ধ্বজাবাহী আঁচনিৰ কামৰ পৰ্যালোচনা

📝বঙাইগাঁওঃ ২৭ জুলাইঃ বঙাইগাঁও জিলাৰ উপায়ুক্ত ডা: এম এচ লক্ষ্মীপ্ৰিয়াৰ সভাপতিত্বত মঙলবাৰে উপাযুক্ত কাৰ্যালয়ৰ সভাকক্ষত এখন আন্ত:বিভাগীয় আলোচনা সভা অনুষ্ঠিত হয়।ৰাষ্ট্ৰীয় ঘাইপথ আৰু আন্ত:গাঁঠনি উন্নয়ন নিগমৰ কাৰ্যবাহী সঞ্চালক, ভাৰতৰ ৰাষ্ট্ৰীয় ঘাইপথ প্ৰাধিকৰণৰ বিষয়া,পাণ্ডুত থকা ভাৰতৰ আভ্যন্তৰীণ জলপথ প্ৰাধিকৰণৰ বিষয়া  অভয়াপুৰীত থকা ৰাষ্ট্ৰীয় ঘাইপথ বিভাগৰ কাৰ্যবাহী অভিযন্তা, ৰাজ্যিক ঘাইপথ বিভাগৰ কাৰ্যবাহী অভিযন্তা, এপিডিচিএলৰ বঙাইগাঁৱৰ উপ-মহাপ্ৰবন্ধক, সামাজিক বনানীকৰণৰ বঙাইগাঁৱৰ সংমণ্ডল বিষয়া, আই উপত্যকা বন সংমণ্ডল বিষয়া, উত্তৰ-পূৱ ৰে'লৱেৰ ৰঙিয়া সংমণ্ডলৰ বিষয়া , লোকনিৰ্মাণ টেৰিটৰিয়েল পথ বিভাগৰ কাৰ্যবাহী অভিযন্তা, অতিৰিক্ত উপায়ুক্ত(ৰাজহ) আৰু বঙাইগাঁও জিলা উপায়ুক্ত কাৰ্যালয়ত থকা মাল্টি ল'জিষ্টিক পাৰ্ক বিশেষ টাস্ক ফোৰ্চৰ সমূহ সদস্যৰ উপস্থিতিত অনুষ্ঠিত সভাত জিলা উপায়ুক্তগৰাকীয়ে কয় যে উক্ত বিভাগসমূহৰ ধ্বজাবাহী আঁচনিসমূহৰ কাম কৰাৰ ক্ষেত্ৰত যিবিলাক আন্ত:বিভাগীয় বিষয় আছে সেইবিলাক পৰস্পৰে আলোচনা কৰি সমাধান কৰিব লাগে যাতে আঁচনিসমূহৰ কাম ক্ষীপ্ৰভাৱে কৰিব পাৰে ৷ 

তেওঁ লগতে কয় যে আঁচনিসমূহৰ বাবে  মাটি অধিগ্ৰহণৰ ক্ষেত্ৰত মাটিৰ মালিকৰ ওজৰ-আপত্তি, আঁচনিসমূহৰ কাম বাধাগ্ৰস্ত কৰা বৈদ্যুতিক খুঁটা আঁতৰোৱা বা অসুবিধাজনক ঠাইত থকা গছবিলাক কটা, মাটিৰ মূল্য সোনকালে আদায় দিয়া আদি কাম শীঘ্ৰে সমাধান কৰিব লাগে যাতে ধ্বজাবাহী আঁচনিৰ কাম বাধাগ্ৰস্ত হৈ নাথাকে ৷ উপায়ুক্তগৰাকীয়ে মাটিৰ বিষয়সমূহ সংশ্লিষ্ট চক্ৰ বিষয়াৰ লগত আলোচনামৰ্মে সমাধান কৰিবলৈকো কয় ৷ একেদৰে লজিষ্টিক পাৰ্কৰ কামৰ বাবেও সকলো ব্যৱস্থা কৰিব লাগে বুলি উপায়ুক্তগৰাকীয়ে সভাত কয়।🔯