🔯বৰপেটাত ৰঞ্জিত দাস, প্ৰধান মন্ত্ৰী নগৰীয়া আৱাস যোজনাৰ গৃহ উদ্ধোধন

🔯বৰপেটাত ৰঞ্জিত দাস,  প্ৰধান মন্ত্ৰী নগৰীয়া আৱাস যোজনাৰ গৃহ উদ্বোধন

🔯শ্বহীদ নাজিমূল হুছেইনৰ নামত পথ নিৰ্মাণৰ প্ৰস্তাৱ দাখিলৰ নিৰ্দেশ 

📝 ১ আগষ্টঃ বৰপেটা জিলাৰ নগৰ সমূহত প্ৰধান মন্ত্ৰী আৱাস যোজনাৰ অধীনত এতিয়ালৈ ৮০৮৩ জন হিতাধিকাৰী নিৰ্বাচিত কৰা হৈছে। ইয়াৰে ১২৯৮ টা গৃহ ইতিমধ্যে সম্পূৰ্ণ হৈ উঠিছে আৰু বাকীবোৰৰো নিৰ্মাণ কাৰ্য চলি আছে। আজি বৰপেটাৰ মেটুৱাকুছীৰ গজিয়া পথত এটা প্ৰধান মন্ত্ৰী আৱাস যোজনাৰ গৃহ আনুষ্ঠানিকভাৱে উদ্ধোধন কৰি সাংবাদিকৰ সৈতে হোৱা বাৰ্তালাপত এই কথা প্ৰকাশ কৰে ৰাজ্যৰ পঞ্চায়ত আৰু গ্ৰামোন্নয়ন তথা জনস্বাস্থ্য কাৰিকৰী বিভাগৰ মন্ত্ৰী ৰঞ্জিৎ কুমাৰ দাসে। তেওঁ কয় যে প্ৰধান মন্ত্ৰী নগৰীয়া আৱাস যোজনাৰ ৰূপায়ণত বৰপেটা জিলাই উল্লেখযোগ্য সফলতা লাভ কৰিছে। মঞ্জুৰ হোৱা ৮ হাজাৰ হিতাধিকাৰীৰ ভিতৰত ৩,০১০ জনে প্ৰথম কিস্তিৰ ধনো লাভ কৰিছে বুলিও খাদ্য আৰু অসামৰিক যোগান বিভাগৰো দায়িত্বত থকা মন্ত্ৰী গৰাকীয়ে জানিবলৈ দিয়ে। তেওঁ কয় যে প্ৰধান মন্ত্ৰী নৰেন্দ্ৰ মোডীয়ে হিতাধিকাৰী সকলক পোনপটীয়াকৈ ধনৰ আৱন্টন দিয়াৰ ব্যৱস্থা কৰাৰ ফলত এতিয়া আঁচনি সমূহৰ ৰূপায়ন সঠিক দিশেৰে আগবাঢ়িছে আৰু সম্পূৰ্ণ দুৰ্নীতি মুক্ত নিকা প্ৰক্ৰিয়াৰে আগবাঢ়িছে। পৰবৰ্তী পৰ্যায়ত আৰু অধিক লোকক সামৰি লোৱা হ'ব বুলি তেওঁ জানিবলৈ দিয়ে। বৰপেটা জিলাৰ অভিভাবক মন্ত্ৰী গৰাকীয়ে সাংবাদিকৰ প্ৰশ্নৰ উত্তৰত বৰপেটা চহৰৰ সত্ৰৰ অধীনত থকা মাটিৰ গৰাকী সকলকো প্ৰধান মন্ত্ৰী আৱাস যোজনাৰ ঘৰ আৱন্টন দিয়াৰ কথাটো সহানুভূতি সহকাৰে বিবেচনা কৰাৰ বাবে কেবিনেটত আলোচনা কৰিব বুলি উল্লেখ কৰে। উল্লেখযোগ্য যে বৰপেটা চহৰত সত্ৰৰ ভূমিত থকা বাসিন্দা সকলৰ নামত মাটিৰ পট্টা নথকা বাবে ইয়াৰ  পকীঘৰ নথকা দুখীয়া লোকেও এই আচঁনিৰ সুবিধা লাভ কৰিব পৰা নাই। আজিৰ অনুষ্ঠানত জিলা উপায়ুক্ত তেজ প্ৰসাদ ভূচাল, অতিৰিক্ত উপায়ুক্ত নৱজিৎ পাঠক, জিলা তথ্য আৰু জনসংযোগ বিষয়া বিকাশ শৰ্মা আৰু নগৰ পৰিকল্পনা বিভাগৰ উপসঞ্চালকো উপস্থিত আছিল। 

🔯শ্বহীদৰ বাসভৱনত মন্ত্ৰী ৰঞ্জিত দাস

🔯নাজিমূল হুছেইনৰ নামত পথ নিৰ্মাণৰ প্ৰস্তাৱ দাখিলৰ নিৰ্দেশ

মৈৰামাৰাৰ পৰা দঙৰকুছীলৈ যোৱা পথচোৱা প্ৰধানমন্ত্ৰী গ্ৰাম স্বৰগ যোজনা অথবা গ্ৰাম্য আন্ত:গাঠনি উন্নয়ন পুজিৰে নিৰ্মাণ ৰ বাবে প্ৰস্তাৱ দাখিল কৰিবলৈ মন্ত্ৰী ৰঞ্জিত দাসে জিলা উপায়ুক্ত তেজ প্ৰসাদ ভূচালক নিৰ্দেশ দিয়ে। নিৰ্মাণৰ কাম আৰম্ভ হলেই পথটোৰ নাম শ্বহীদ নাজিমূল হুছেইনৰ নামত নামাকৰণ কৰাৰ বাবে স্থানীয় ৰাইজে আগবঢ়োৱা প্ৰস্তাৱতো নীতিগত ভাৱে তেওঁ সন্মতি প্ৰকাশ কৰে। আজি বৰপেটা চহৰৰ দাঁতিকাষৰ কদমগুৰিত মিজোৰাম সীমান্তত অলপতে নিহত হোৱা আৰক্ষী জোৱান নাজিমূল হুছেইনৰ বাসগৃহত উপস্থিত হৈ মন্ত্ৰী গৰাকীয়ে মাতৃ নুৰ নেহাৰ বেগম আৰু ভাতৃ সকলক সাক্ষাৎ কৰে। ইয়াৰে স্থানীয় ৰাইজ আৰু পৰিয়াল বৰ্গৰ ফালৰ পৰা মন্ত্ৰী গৰাকীক এখন স্মাৰক পত্ৰ প্ৰদান কৰে। দাসে উপায়ুক্ত তেজ প্ৰসাদ ভূচাল আৰু আৰক্ষী অধীক্ষক অমিতাভ সিনহাৰ উপস্থিতিত স্মাৰক পত্ৰৰ আটাইবোৰ দিশ ৰাইজৰ সৈতে আলোচনা কৰে আৰু উপযুক্ত ব্যৱস্থা গ্ৰহণৰ আশ্বাস দিয়ে। এই প্ৰসঙ্গতে তেওঁ শ্বহীদ গৰাকীৰ ঘৰৰ সন্মূখেৰে যোৱা পথচোৱা তেওঁৰ নামতে নিৰ্মাণৰ বিষয়টো অধ্যয়ণ কৰি প্ৰস্তাৱ দাখিল কৰিবলৈ উপায়ুক্তক নিৰ্দেশ দিয়েে ৷🔯