🔯সভা,সমাবেশ আদিৰ বাবে বঙাইগাঁও জিলা দুৰ্যোগ ব্যৱস্থাপনা প্ৰাধিকৰণৰ সংশোধিত নতুন নিৰ্দেশনা

🔯সভা,সমাবেশ আদিৰ বাবে বঙাইগাঁও জিলা দুৰ্যোগ ব্যৱস্থাপনা প্ৰাধিকৰণৰ সংশোধিত নতুন নিৰ্দেশনা 

🔯সভা-সমাৱেশ আদিত ১০০ জন পৰ্যন্ত সম্পূৰ্ণ টিকা লোৱা লোকহে থাকিব পাৰিব উপস্থিত

🔯এদিনতে আক্ৰান্ত ১৩১ জন 

📝বঙাইগাঁওঃ ১৮ জানুৱাৰীঃ বঙাইগাঁও জিলাত মঙলবাৰে ১৩১গৰাকী লোকৰ দেহত কোভিড-১৯ ৰ সংক্ৰমণ ধৰা পৰিছে । যোৱা কেইদিন মানৰ পৰা জিলাখনত ক্ৰমশঃ কোভিড-১৯ মহামাৰীৰ নতুন প্ৰজাতি অমিক্ৰণৰ সংক্ৰমণ বৃদ্ধি হোৱালৈ চাই মঙলবাৰে বঙাইগাঁও জিলা দুৰ্যোগ ব্যৱস্থাপনা প্ৰাধিকৰণে জিলাখনত সভা-সমাৱেশ আদি অনুষ্ঠিত কৰাত পূৰ্ৱৰ  নিৰ্দেশনাৰ সংশোধন কৰি নতুন নিৰ্দেশনা জাৰি কৰিছে। সেই অনুসৰি বন্ধ স্থান বা মুকলি ঠাইত ব্যক্তিগত বা ৰাজহুৱা অনুষ্ঠান পতাত আৰু চৰকাৰী কাৰ্যালয়ৰ লগত জড়িত বা ধৰ্মীয় অনুষ্ঠান পাতিলে তাত বা  সভা-সমাৱেশ আদিত ১০০ জন পৰ্যন্ত সম্পূৰ্ণ টিকা লোৱা লোকেহে উপস্থিত থাকিব পাৰিব। বঙাইগাঁও জিলাৰ আৰক্ষী অধীক্ষক, উত্তৰ শালমাৰা মহকুমাৰ মহকুমাধিপতি, বঙাইগাঁৱৰ সদৰ মহকুমাধিপতি আৰু সংশ্লিষ্ট চক্ৰ বিষয়াসকলে এই নিৰ্দেশনা কাৰ্যকৰী কৰাটো নিশ্চিত কৰিব। অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ আন আন নিৰ্দেশনাসমূহো জিলাখনত পৰৱৰ্তী নিৰ্দেশনা নিদিয়া পৰ্যন্ত বলবৎ থাকিব। উক্ত নিৰ্দেশনা উলংঘা কৰিলে অসম কোভিড-১৯ নিয়ামক- ২০২০, ৰাষ্ট্ৰীয় দুৰ্যোগ ব্যৱস্থাপনা আইন-২০০৫,  মহামাৰী আইন-১৮৯৭ আৰু দেশৰ অন্যান্য প্ৰাসংগিক বিধিৰ অধীনত বিহিত ব্যৱস্থা গ্ৰহণ কৰা হ'ব বুলি বঙাইগাঁও জিলা দুৰ্যোগ ব্যৱস্থাপনা প্ৰাধিকৰণৰ তৰফৰ পৰা জনোৱা হৈছে। ইপিনে জিলাখনত দিনে দিনে কোভিডৰ সংক্ৰমণে ভয়াৱহ ৰূপ ধাৰণ কৰিছে ৷ কেৱল মঙলবাৰৰ দিনটোতে নতুনকৈ ১৩১ গৰাকী লোকৰ দেহত কোভিড - ১৯ ৰ সংক্ৰমণ ধৰা পৰিছে ৷ ইয়াকে ধৰি জিলাখনত বৰ্তমান কোভিডত আক্ৰান্ত সক্ৰিয় ৰোগীৰ সংখ্যা ৪৬৩ গৰাকীলৈ বৃদ্ধি পাইছে ৷ আক্ৰান্তসকলৰ ভিতৰত ২০ গৰাকী ইনষ্টিটিউচনেল কোৱাৰেণ্টাইনত আৰু ৪৪৩ গৰাকী হোম কোৱাৰেণ্টাইনত আছে ৷ মঙলবাৰে জিলাখনত মুঠ ৩,৬৬৬ গৰাকী ব্যক্তিক কোভিড পৰীক্ষা কৰা হয়৷ আনহাতে সুস্থ হৈ উঠিছে ৪৪ গৰাকী ব্যক্তি ৷ জিলাখনত ১ জানুৱাৰীৰ পৰা মঙলবাৰলৈকে মুঠ আক্ৰান্তৰ সংখ্যা বদ্ধি পাই ৫৯০ গৰাকী হৈছে ৷ জিলাখনৰ বিভিন্ন ঠাইত কোভিডৰ সংক্ৰমণ বৃদ্ধ্ি পোৱাৰ ফলত ঘোষণা কৰা হৈছে মাইক্ৰ কণ্টেইনমেণ্ট জ'ন ৷🔯