🔯আগন্তুক পৌৰসভা নিৰ্বাচনত শাসকীয় বিজেপি দলে মিত্ৰ দলৰ সৈতে বুজাবুজি কৰিহে নিৰ্বাচন খেলিব - ভৱেশ কলিতা

🔯আগন্তুক পৌৰসভা নিৰ্বাচনত শাসকীয় বিজেপি দলে মিত্ৰ দলৰ সৈতে বুজাবুজি কৰিহে নিৰ্বাচন খেলিব - ভৱেশ কলিতা

🔯ৰাজ্যসভা নিৰ্বাচনত ঘোঁৰা কিনিব নালাগে, ঘোঁৰা বিজেপিৰ পৰ্যাপ্ত আছে

🔯ভূপেন বৰাই এতিয়া সাহিত্য সভাৰ পিনে মনোনিৱেশ কৰিলে আমি বেছি ভাল পাম 

🔯আমাৰ বি পি এফৰ লগত মিত্ৰতা হোৱা নাই, মিত্ৰতা আছে ইউ পি পি এলৰ লগতহে

📝বঙাইগাঁওঃ ২৮ জানুৱাৰীঃ আগন্তুক পৌৰসভা নিৰ্বাচনত  শাসকীয় বিজেপি দলে এককভাৱে নিৰ্বাচন খেলাৰ পৰিৱৰ্তে মিত্ৰ দলৰ সৈতে বুজাবুজি কৰিহে নিৰ্বাচন খেলিব বুলি মন্তব্য কৰিছে ৰাজ্যিক বিজেপিৰ সভাপতি ভৱেশ কলিতাই ৷ শুকুৰবাৰে বিয়লিৰ ভাগত বঙাইগাঁও জিলা বিজেপি কাৰ্যালয়ত অনুষ্ঠিত এখন সাংগঠনিক সভাত উপস্থিত থাকি সংবাদ মাধ্যমৰ আগত এই মন্তব্য কৰে ৷ ৰাজ্যিক বিজেপিৰ সভাপতি কলিতাই কয় যে বঙাইগাঁও জিলা বুলিয়ে নহয় সমগ্ৰ অসমতে বিজেপি দলে মিত্ৰ দল বিশেষকৈ অসম গণ পৰিষদৰ লগত বুজাবুজি কৰি নিৰ্বাচন খেলিব ৷ মিত্ৰ দলৰ সৈতে পৌৰ সভা নিৰ্বাচনতো মিত্ৰতা হ'ব বুলি কৈ আগন্তুক যি পৌৰসভা নিৰ্বাচন অনুষ্ঠিত হ'ব তাৰ বাবে বিজেপি দল সম্পূৰ্ণ প্ৰস্তুত আৰু দলটোৰ বঙাইগাঁও জিলা সমিতিও প্ৰস্তুত বুলি কয় ৷ আনহাতে ৰাজ্য সভা নিৰ্বাচন সন্দৰ্ভত কয় যে বিৰোধীয়ে উমৈহতীয়া প্ৰাৰ্থী দিয়ে আৰু কিবা দিয়ে দিব পাৰে ৷ মহাজোঁটো গঠন কৰিছিল কিন্তু গ'ল কোনোবা গুচি ৷ গতিকে ৰাজ্য সভাৰ যি নিৰ্বাচন হ'ব এই নিৰ্বাচনত দুয়োখন আসনতে মিত্ৰ গোষ্ঠীয়ে জয়যুক্ত হ'বলৈ সক্ষম হ'ব ৷ ইপিনে প্ৰাক্তন সাংসদ আৰ পি শৰ্মাই ৰাজ্য সভাৰ নিৰ্বাচনত ঘোঁৰা কিনা বেচা হ'ব বুলি কৰা মন্তব্য সন্দৰ্ভত ৰাজ্যিক বিজেপিৰ সভাপতিগৰাকীয়ে কয় যে মই নাজানো , তেওঁ ঘোঁৰা কিনি পাইছিল নেকি ? মই এদিন তেওঁক ঘোঁৰাত উঠা দেখিছিলো ৷ ঘোঁৰা বেচা কিনা কৰিব নালাগে, ঘোঁৰা আমাৰ পৰ্যাপ্ত আছে ৷ মুখ্যমন্ত্ৰী ডঃ হিমন্ত বিশ্ব শৰ্মাৰ বলিষ্ঠ নেতৃত্বত অসমত যি বিৰামহীন প্ৰগতিৰ যাত্ৰা আৰম্ভ হৈছে আৰু সংস্কাৰমুখী যাত্ৰা হৈ আছে তাত আমাৰ সকলো সৰ্বসাধাৰণ ৰাইজ আপ্লুত আছে ৷ যিদৰে বঙাইগাঁও মেডিকেল কলেজ ঘোষণা কৰি গ'ল, ইয়াতে কেবিনেট হৈ গ'ল ৷ বহু চৰকাৰ দেখিলে, কিন্তু কেতিয়াবা বঙাইগাঁৱত কেবিনেট হৈছিল নে?  সেইদৰে ডিমা হাচাওত কেবিনেট হ'ল, ধেমাজিত কেবিনেট হ'ল, বঙাইগাঁৱত কেবিনেট হ'ল ৷ ইয়াৰ পিচত হয়তো বৰাক ভেলীত কেবিনেট হ'ব ৷ চৰকাৰখন জনতাৰ মাজত গৈছে ৷ আগতে মুখ্যমন্ত্ৰীসকল দিছপুৰত বহি আছিল ৷ এতিয়া আমাৰ মুখ্যমন্ত্ৰী আহি বঙাইগাঁৱত বহি  বঙাইগাঁৱৰ উন্নয়নৰ কথা চিন্তা চৰ্চা কৰি বঙাইগাঁৱৰ ৰাইজৰ লগত থাকি এই অঞ্চলৰ উন্নয়নৰ কথা চিন্তা চৰ্চা কৰে ৷ এই কাৰণে বঙাইগাঁওবাসী ৰাইজে আগন্তুক যিসমূহ নিৰ্বাচন হ'ব সকলোতে বিজেপি আৰু মিত্ৰ গোষ্ঠীক ভোট দিব ৷ 

আনহাতে কংগ্ৰেছ দলৰ সভাপতি ভূপেন বৰাই নিজকে ফায়াৰ বিগ্ৰেড বুলি কৈ য'তেই বিজেপিয়ে জুই লগাব তাতেই তেওঁ জুই নুমুুুুৱাব বুলি কৰা মন্তব্য সন্দৰ্ভত বিজেপিৰ ৰাজ্যিক সভাপতি কলিতাই কয় যে তেওঁ বোলে এতিয়া কবিতা লিখা কৰিছে ৷ তেওঁৰ এতিয়া কবিতা লিখাৰ সময় হৈছে ৷ ৰাজনীতিত এতিয়া তেওঁক জনতা জনাৰ্দনে গুৰুত্ব নিদিয়ে ৷ ঠেঙাল কছাৰী পৰিষদতো তৃতীয় স্থান পাবলৈ সক্ষম হৈছে তেওঁৰ নিজৰ সমষ্টিতে ৷ এইটোৱে কি সূচায় ? গতিকে সময় পাইছে কবিতা লিখক ৷ সাহিত্যৰ পূজাৰী হওঁক, সাহিত্যসেৱী হওঁক ৷ তেওঁলৈ মই শুভেচ্ছা দিছো ৷ গ্ৰন্থ লিখক ৷ আমি আছো জনতা জনাৰ্দনৰ সেৱাৰ কাৰণে ৷ তেওঁ এতিয়া সাহিত্য সভাৰ পিনে মনোনিৱেশ কৰিলে আমি বেছি ভাল পাম ৷ যিহেতু কবিতা লিখা আৰম্ভ কৰিছে সেয়ে তেওঁ সাহিত্য সভালৈকে যাব বোধয়? ইপিনে বি টি আৰ ৰ ৰাজনৈতিক সমীকৰণ সন্দৰ্ভত ৰাজ্যিক সভাপতিগৰাকীয়ে কয় যে বৰ্তমানৰ মুখ্যমন্ত্ৰীগৰাকীৰ নেতৃত্বত সুন্দৰকৈ চৰকাৰখন চলি আছে ৷ বিধান সভা নিৰ্বাচনৰ সময়ত মহাজোঁট গঠন কৰিছিল ৷ মহাজোঁটে এইবাৰ চৰকাৰ গঠন কৰিব বুলি কৈছিল ৷ অশুভ শক্তিৰ মিলন হৈছিল ৷ সেই  বামপন্থী, কোনো দিনে একো কৰিব নোৱাৰে, কেৱল হাল্লা চিল্লা কৰি ঘুৰি ফুৰে ৷ এআইইউডিএফ, যি অসম আৰু অসমীয়াৰ বিৰোধী ৷ লগতে কংগ্ৰেছ দল ৷ অসম ভূমিক বাংলাদেশীৰ চৰনীয়া পথাৰ কৰিব খোজে তেওঁলোকে ৷ তাৰ লগতে আকৌ বি পি এফো লগ লাগিছে ৷ বি পি এফে বুজি পালে যে আমাৰ মহা ভুল হৈ গ'ল ৷ হিমালয় সদৃশ ভুল হৈ গ'ল ৷ সেই কাৰণে বি পি এফে মহাজোঁটৰ পৰা ওলাই আহিল ৷ এতিয়া মুখ্যমন্ত্ৰী ডঃ হিমন্ত বিশ্ব শৰ্মাৰ নেতৃত্বত যি বিৰামহীন প্ৰগতিৰ যাত্ৰা, সংস্কাৰমুখী যাত্ৰা এই যাত্ৰাত বি পি এফ দলেও সমভাগী আৰু সহযোগী হ'ব বিচাৰিছে ৷ সেয়ে বিধানসভাত তেওঁলোকে শাসকীয় পক্ষৰ লগত বহাৰ বাবে চিন্তা চৰ্চা কৰিছে ৷ আমাৰ বি পি এফৰ লগত মিত্ৰতা হোৱা নাই ৷ আমাৰ মিত্ৰতা আছে ইউ পি পি এলৰ লগত ৷ প্ৰমোদ বড়ো আমাৰ বি টি চি ৰ নেতা ৷ প্ৰমোদ বড়োৰ লগত আমাৰ চৰকাৰ আছে আৰু চৰকাৰ পাঁচ বছৰ চলিব ৷ দল হিচাপে আমাৰ হাগ্ৰামা মহিলাৰীৰ সৈতে কোনো মিত্ৰতা হোৱা নাই ৷ তেওঁলোকৰ বিধায়কসকল আমাক বিধান সভাৰ মজিয়াত আমাৰ শাসকীয় পক্ষক সমৰ্থন দিছে ৷ কেৱল ৰাজ্য সভা নিৰ্বাচনতে নহয় বৰং বিধান সভাত যি ইছ্যুই নহওক সমৰ্থন কৰি যাব ৷ কিন্তু দল হিচাপে নহয় ৷ বিধায়ক কেইজন আমাৰ লগত আছে বুলি কয় ৷🔯