🔯বঙাইগাঁও জিলাত কোভিডত দুদিনত দুগৰাকী ব্যক্তিৰ মৃত্যু

🔯বঙাইগাঁও জিলাত কোভিডত দুদিনত দুগৰাকী ব্যক্তিৰ মৃত্যু 

🔯একেদিনাই ১০৮ গৰাকী ব্যক্তিৰ দেহত ধৰা পৰিল কোভিড- ১৯ 

🔯জিলাখনত বৰ্তমান আক্ৰান্ত সক্ৰিয় ৰোগীৰ সংখ্যা ৫৮৮ গৰাকীলৈ বৃদ্ধি 

📝বঙাইগাঁওঃ ২০ জানুৱাৰীঃ বঙাইগাঁও জিলাত কোভিডৰ সংক্ৰমণে জটিল ৰূপ ধাৰণ কৰিছে ৷ জিলাখনত বিগত কিছুদিনৰ পৰা দৈনিক শতাধিক ব্যক্তিৰ দেহত কোভিড- ১৯ ৰ সংক্ৰমণ ধৰা পৰিছে ৷ ইয়াৰ মাজতে বুধবাৰ আৰু বৃহস্পতিবাৰে জিলাখনত দুগৰাকী ব্যক্তিৰ কোভিডত মৃত্যু হৈছে৷ ৷ বুধবাৰে জিলাখনৰ অভয়াপুৰী ৩ নং ৱাৰ্ডৰ হিতেন্দ্ৰ নাৰায়ণ দাস (৪৯) নামৰ ব্যক্তিগৰাকীৰ কোভিডত মৃত্যু হোৱাৰ পিছত বৃহস্পতিবাৰে বঙাইগাঁও অসামৰিক চিকিৎসালয়ত চিকিৎসাধীন হৈ থকা অৱস্থাত ময়েন বালা ৰবি দাস ( ৫৬) নামৰ মহিলাগৰাকীৰ মৃত্যু হয় ৷ মৃত মহিলাগৰাকীৰ ঘৰ বঙাইগাঁৱৰ খাৰিজা দোলাইগাঁৱত বুলি জানিব পৰা গৈছে ৷ ইপিনে জিলাখনত বৃহস্পতিবাৰৰ দিনটোত নতুনকৈ ১০৮ গৰাকী লোকৰ দেহত কোভিড - ১৯ ৰ সংক্ৰমণ ধৰা পৰিছে ৷ ইয়াকে ধৰি জিলাখনত বৰ্তমান কোভিডত আক্ৰান্ত সক্ৰিয় ৰোগীৰ সংখ্যা ৫৮৮ গৰাকীলৈ বৃদ্ধি পাইছে ৷ আক্ৰান্তসকলৰ ভিতৰত ২১ গৰাকী ইনষ্টিটিউচনেল কোৱাৰেণ্টাইনত আৰু ৫৬৭ গৰাকী হোম কোৱাৰেণ্টাইনত আছে ৷ বৃহস্পতিবাৰে জিলাখনত মুঠ ২,৪৬৬ গৰাকী ব্যক্তিক কোভিড পৰীক্ষা কৰা হয়৷ আনহাতে সুস্থ হৈ উঠিছে ৪৪ গৰাকী ব্যক্তি ৷ জিলাখনত ১ জানুৱাৰীৰ পৰা বৃহস্পতিবাৰলৈকে মুঠ আক্ৰান্তৰ সংখ্যা বদ্ধি পাই ৮১০ গৰাকী হৈছে ৷ আনহাতে জিলাখনত বৃহস্পতিবাৰে ১৫ - ১৭ বছৰ বয়সৰ ১৫৯ পালি ভেকচিন, ১৮- ৪৪ বছৰ বয়সৰ ১,২১৫ পালি ভেকচিন, ৪৫ বছৰ ওপৰৰ বয়সৰ ৩৬৩ পালি আৰু সূৰক্ষাসূচক ৩৯৭ পালি ভেকচিনকে ধৰি মুঠ ২,১৪০ পালি ভেকচিন প্ৰদান কৰা হয় ৷ জিলাখনত বৰ্তমানলৈকে সকলো মিলাই মুঠ ৯,৯৫৪৬৫ পালি ভেকচিন প্ৰদান কৰিছে স্বাস্থ্য বিভাগে ৷ আনহাতে জিলাখনৰ বিভিন্ন ঠাইত কোভিডৰ সংক্ৰমণ বৃদ্ধি পোৱাৰ ফলত কোভিড মহামাৰীৰ সংক্ৰমণ ৰোধৰ বাবে আক্ৰান্ত ব্যক্তিসকলৰ আৱাস গৃহক অভিকেন্দ্ৰ  হিচাপে লৈ চাৰিওফালৰ এলেকাক সামৰি ঘোষণা কৰা হৈছে মাইক্ৰ কণ্টেইনমেণ্ট জ'ন ৷🔯