🔯চিৰাঙত সাংবাদিক নিগ্ৰহৰ ঘটনা

🔯চিৰাঙত সাংবাদিক নিগ্ৰহৰ ঘটনা

🔯বৃহত্তৰ বঙাইগাঁও প্ৰেছ ক্লাবৰ গৰিহণাঃদোষী আৰক্ষী কনিষ্টবলক কঠোৰ শাস্তিৰ দাবী সাংবাদিক সংগঠনৰ

📝বঙাইগাঁওঃ ৭ ফেব্ৰুৱাৰীঃ চিৰাং জিলাৰ বাসুগাঁৱত আজি এগৰাকী সাংবাদিকক আৰক্ষীয়ে ৰাজহুৱাস্থানত প্ৰহাৰ কৰা ঘটনাকলৈ সাংবাদিক মহলত তীব্ৰ প্ৰতিক্ৰিয়াৰ সৃষ্টি হৈছে ৷ বাসুগাওঁ আৰক্ষীৰ দ্বাৰা প্ৰহৃত হোৱা সাংবাদিকগৰাকী হ'ল প্ৰতিদিন টাইম আৰু অসমীয়া প্ৰতিদিনৰ সাংবাদিক জয়ন্ত দেৱনাথ ৷ দিনৰ প্ৰায় ডেৰমান বজাত সাংবাদিক নিগ্ৰহৰ ঘটনাটো সংঘটিত হয় ৷ জানিব পৰা মতে সাংবাদিকগৰাকীয়ে হেলমেট পৰিধান নকৰাকৈ মটৰ চাইকেল চলোৱা আৰক্ষী কনিষ্টবল এজনক হেলমেট পৰিধান নকৰাকৈ কিয় মটৰ চাইকেল চলাইছে বুলি প্ৰশ্ন কৰাটোৱে আছিল দোষ ৷ সাংবাদিকগৰাকী বাসুগাঁওস্থিত ভাৰতীয় ষ্টেট বেংকৰ শাখা কাৰ্যালয়ৰ সমীপত কৰ্তব্যৰত অৱস্থাত থকাৰ সময়ে বাসুগাঁও আৰক্ষী থানাৰ কনিষ্টবল প্ৰদীপ সাহাই হেলমেট নিপিন্ধাকৈ মটৰ চাইকেল চলোৱা প্ৰত্যক্ষ কৰি কনিষ্টবলজনক কিয় হেলমেট পৰিধান কৰা নাই বুলি প্ৰশ্ন কৰে ৷  আৰক্ষীয়েই হেলমেট পৰিধান নকৰা লোকক জৰিমনা বিহে , গতিকে তেনে অৱস্থাত আৰক্ষীৰ লোকেই যদি হেলমেট পৰিধান নকৰাকৈ মটৰ চাইকেল চলাই চৰকাৰৰ আইন অমান্য কৰে  সাধাৰণ লোকে কিয় নকৰিব? এই কথা কোৱাৰ পিচতে আৰক্ষী কনিষ্টবল প্ৰদীপ সাহা খঙত অগ্নিশৰ্মা হৈ পৰে আৰু সাংবাদিক জয়ন্ত দেৱনাথক ৰাজহুৱাকৈ প্ৰহাৰ কৰাৰ লগতে অশ্লীল শব্দৰে গালি - গালাজ কৰি অপদস্থ কৰে ৷ অতি আশ্চৰ্যৰ বিষয় এয়ে যে আৰক্ষী কনিষ্টবলজনে সাংবাদিকগৰাকীক গুৰিওৱাৰ লগতে প্ৰহাৰ কৰি থকা সময়ত উক্ত স্থানত থকা লোকৰ সহায় বিচাৰে যদিও সকলোৱে কেৱল প্ৰত্যক্ষদৰ্শী হৈ সমগ্ৰ ঘটনা চাই ৰয় ৷ এই ঘটনাকলৈ ইতিমধ্যে সাংবাদিক মহলত তীব্ৰ প্ৰতিক্ৰিয়াৰ সৃষ্টি হৈছে ৷ সাংবাদিকক প্ৰহাৰ কৰি নিজৰ বীৰত্ব প্ৰদৰ্শন কৰা আৰক্ষীৰ এনে কাণ্ডক গৰিহণা দিছে সচেতন মহলে ৷ ঘটনা সন্দৰ্ভত সাংবাদিকৰাকীয়ে আৰক্ষী কনিষ্টবলজনৰ বিৰুদ্ধে থানাত এজাহাৰ দাখিল কৰিছে ৷কনিষ্টবলজনে সাংবাদিকগৰাকীক প্ৰহাৰ কৰাৰ লগতে  চশমা, মোবাইল আৰু হেলমেট ভাঙি পেলোৱা বুলিও উল্লেখ কৰিছে ৷ ইপিনে  প্ৰতিদিন টাইম আৰু অসমীয়া প্ৰতিদিনৰ সাংবাদিক জয়ন্ত দেৱনাথক বাসুগাঁও আৰক্ষীয়ে প্ৰহাৰ কৰা আৰু অশ্লীল শব্দৰে অপদস্থ কৰা দুষ্কৰ্মক গৰিহণা দিছে বৃহত্তৰ বঙাইগাঁও প্ৰেছ ক্লাবে৷ অভিযুক্ত আৰক্ষীজনৰ বিৰুদ্ধে বিহিত ব্যৱস্থা লোৱাৰ বাবে বৃহত্তৰ বঙাইগাঁও প্ৰেছ ক্লাবে দাবী জনাইছে ৷ 

লগতে আৰক্ষীৰ এনেধৰণৰ দাদাগিৰি বন্ধ কৰাৰ বাবে বিভাগটোৰ মুৰব্বীলৈ আহ্বান জনাইছে ৷ সেইদৰে বাসুগাঁও আৰক্ষীৰ দ্বাৰা সাংবাদিকগৰাকীক প্ৰহাৰৰ ঘটনাক তীব্ৰ গৰিহণা দিছে জাফাৰ কেন্দ্ৰীয় সমিতিৰ লগতে চিৰাং জিলা সমিতিয়ে ৷ এক প্ৰেছ বাৰ্তাত জাফাৰ কেন্দ্ৰীয় সভাপতি অভিদ্বিপ চৌধুৰী আৰু চিৰাং জিলা সমিতিৰ সভাপতি সুনীল শৰ্মা আৰু সম্পাদক আব্দুল মালেক আহমেদে এই ঘটনাক তীব্ৰ ভাষাৰে গৰিহণা দি দোষী আৰক্ষী কনিষ্টবলজনৰ বিৰুদ্ধে কঠোৰ শাস্তি প্ৰদানৰ দাবী জনাইছে ৷ ইতিমধ্যে জাফাই আৰক্ষী কনিষ্টবলৰ শাস্তিৰ দাবীত অহা কালি মঙলবাৰে চিৰাং জিলা সদৰ কাজলগাঁৱত পুৱা দহ বজাত ক'লাবেজ পৰিধান কৰি এঘন্টীয়া মৌন প্ৰতিবাদী অৱস্থান ধৰ্মঘট কাৰ্যসূচী গ্ৰহণ কৰাৰ সিদ্ধান্ত গ্ৰহণ কৰিছে ৷ আনহাতে চিৰাং জিলা প্ৰেছ ক্লাবৰ সম্পাদক জয়ন্ত দেৱনাথৰ ওপৰত আৰক্ষীৰ আক্ৰমণৰ ঘটনাক  বিজনী প্ৰেছ ক্লাবেও তীব্ৰ গৰিহণা দিছে ৷ লগতে  দোষী আৰক্ষী কনিষ্টবল প্ৰদীপ সাহাক  কঠোৰ শাস্তি বিহিবলৈ দাবী জনাইছে ৷ সেইদৰে চিৰাং জিলা সাংবাদিক সন্থাৰ সাধাৰণ সম্পাদক তথা প্ৰতিদিন টাইমৰ সাংবাদিক জয়ন্ত দেৱনাথক বাসুগাঁও আৰক্ষীৰ দ্বাৰা প্ৰহাৰৰ ঘটনাক বিজনী জাৰ্নেলিষ্ট ফ'ৰামে তীব্ৰ গৰিহণা দিয়াৰ লগতে ন্যায়িক তদন্তৰ দাবী জনাইছে ৷ ইপিনে শেহতীয়াভাৱে জানিব পৰা মতে সাংবাদিকগৰাকীক প্ৰহাৰৰ ঘটনাৰ সৈতে জড়িত থকাৰ অভিযোগত কনিষ্টবল প্ৰদীপ সাহা আৰু এল আৰ বৰ্মনক আৰক্ষী অধীক্ষকে তাৎক্ষণিকভাৱে ৰিজাৰ্ভ ক্ল'জ কৰিছে ৷ আনহাতে আহত সাংবাদিকগৰাকীয়ে চিকিৎসা গ্ৰহণ কৰিবলগীয়া হৈছে ৷🔯