🔯গ্ৰেটাৰ বঙাইগাঁও প্ৰেছ ক্লাবত লেখিকা যামিনী দেৱীৰ পৰিৱেশ সম্পৰ্কীয় 'আমাৰ পৃথিৱী আমাৰ পৰিৱেশ' শীৰ্ষক গ্ৰন্থ উন্মোচন🔯

🔯গ্ৰেটাৰ বঙাইগাঁও প্ৰেছ ক্লাবত লেখিকা যামিনী দেৱীৰ পৰিৱেশ সম্পৰ্কীয় 'আমাৰ পৃথিৱী আমাৰ পৰিৱেশ' শীৰ্ষক গ্ৰন্থ উন্মোচন🔯

📝বঙাইগাঁওঃ ২৭ মাৰ্চঃ বঙাইগাঁও চহৰৰ গ্ৰেটাৰ বঙাইগাঁও প্ৰেছ ক্লাবত দেওবাৰে লেখিকা যামিনী দেৱীৰ 'আমাৰ পৃথিৱী আমাৰ পৰিবেশ' শীৰ্ষক গ্ৰন্থখন উন্মোচন কৰা হয়। এই উপলক্ষে গ্ৰেটাৰ বঙাইগাঁও প্ৰেছ ক্লাবত অনুষ্ঠিত এক অনুষ্ঠানত প্ৰেছ ক্লাবৰ সভাপতি ৰঞ্জিত কুমাৰ শৰ্মাই গ্ৰন্থখন উন্মোচন কৰে ৷  গ্ৰন্থখন উন্মোচন কৰি দিয়া চমু বক্তব্যত তেওঁ পৰিৱেশ সম্পৰ্কীয় এই গ্ৰন্থখনে ছাত্ৰ - ছাত্ৰীসকলৰ লগতে পাঠকক পৰিৱেশৰ লগত জড়িত বিভিন্ন বিষয় জনাত অৰিহণা যোগাব বুলি কয় ৷ উল্লেখ্য যে বইটামাৰী উচ্চতৰ মাধ্যমিক বিদ্যালয়ৰ অৰ্থ বিজ্ঞানৰ অৱসৰপ্ৰাপ্ত বিষয় শিক্ষয়িত্ৰী তথা লেখিকা যামিনী দেৱীৰ 'আমাৰ পৃথিৱী, আমাৰ পৰিৱেশ 'গ্ৰন্থখন মূলত এখন পৰিৱেশ ভিত্তিক সংকলিত পুথি ৷ গ্ৰন্থখনত পাঠকে আমাৰ চৌপাশৰ পৰিৱেশৰ ওপৰত বৰ্তমানে আহি পৰা বিভিন্ন ধৰণৰ ভাবুকিৰ উমান পাব ৷ পৰিৱেশৰ ওপৰত সংক্ৰমণ হোৱা বিয়োগাত্মক প্ৰভাৱবোৰৰ পৰা পৰিৱেশক কেনেকৈ ৰক্ষা কৰিব পাৰি সেই বিষয়ে আন্তৰ্জাতিক পৰ্যায়ত গোটেই বিশ্বজুৰি চলি থকা প্ৰয়াসবোৰৰো এক চমু আভাষ লেখিকাই দাঙি ধৰিছে ৷ গ্ৰন্থখনত পৰিৱেশ আৰু আমি, পৰিৱেশ সংৰক্ষণত ভাৰতৰ ভূমিকা, পৰিৱেশ সম্পৰ্কে আমাৰ সচেতনতা, পৰ্যটন উদ্যোগ আৰু সামাজিক পৰিৱেশ উন্নয়ন, সাম্প্ৰতিক কালত পৰিৱেশ আৰু মানুহৰ মাজত পাৰস্পৰিক সম্পৰ্ক, বতৰ,জলবায়ু আৰু অৰ্থনৈতিক পৰিৱেশৰ ওপৰত ইয়াৰ প্ৰভাৱ,জলসম্পদৰ সংকট আৰু সামাজিক পৰিৱেশ, পৰিৱেশ প্ৰদূষণত ই- আৱৰ্জনাৰ নেতিবাচক ভূমিকা আদিকে ধৰি সৰ্বমুঠ ৩৭ টা পৰিৱেশ সম্পৰ্কীয় পৰিচ্ছেদ আছে ৷ প্ৰতিটো পৰিচ্ছেদতে ৰজিতা খোৱাকৈ তথ্য আৰু চিত্ৰৰ সমাহাৰ ঘটিছে ৷ এক কথাত এইখন এখন তথ্যভিত্তিক সচিত্ৰ সকলো শ্ৰেণীৰ পঢ়ুৱৈৰ বাবে সময়োপযোগী পৰিৱেশ সম্পৰ্কীয় পুথি ৷ পৰিচ্ছেদসমূহত পৰিৱেশ প্ৰদূষণৰ কাৰকসমূহ উপস্থাপন কৰাৰ লগতে নিৰাময়ৰ উপায়সমূহো অৱগত কৰিবলৈ চেষ্টা কৰা পৰিলক্ষিত হৈছে ৷ সেইদৰে জলবায়ু পৰিৱৰ্তনৰ ক্ষেত্ৰত সজাগতা সৃষ্টি কৰা কিছু সংখ্যক ব্যক্তিকো পঢ়ুৱৈৰ সৈতে চিনাকি কৰি দিয়া চেষ্টাৰ ত্ৰুটি কৰা নাই যাতে পাঠকে তেওঁলোকৰ কৰ্মৰাজিৰ দ্বাৰা অনুপ্ৰাণিত হৈ ধৰিত্ৰী ৰক্ষাৰ ক্ষেত্ৰত অৰিহণা যোগাব পাৰে ৷ ইয়াৰোপৰি পৰিৱেশ সচেতনতা বৃদ্ধিৰ বাবে বিশ্বৰ বিভিন্ন সংস্থাসমূহে কেতিয়াৰ পৰা কিদৰে চিন্তা- চৰ্চা কৰি আছে আৰু এইক্ষেত্ৰত ভাৰতৰ ভূমিকা কি সেই সম্পৰ্কেও গ্ৰন্থখনত আলোচনা কৰা হৈছে ৷

গ্ৰন্থখনৰ সৰ্বশেষত পাঠকসকলক নিজ নিজ চৌহদতে সিঁচৰিত হৈ থকা অৰ্থনৈতিক আৰু ঔষধি গছবোৰক চিনাকী কৰি দিয়াৰ বাবে গ্ৰন্থখনৰ বকলাত দুটা পৃষ্ঠাত সেইসমূহ গছৰ ৰঙীণ চিত্ৰ সংযোগ কৰা হৈছে ৷ আনকি ক'ভিড - ১৯ য়ে প্ৰাকৃতিক পৰিৱেশ আৰু সামাজিক পৰিৱেশৰ ওপৰত পেলোৱা ইতিবাচক প্ৰভাৱৰ কথাও লেখিকাই দোহাৰিব পাহৰা নাই ৷ মুঠতে গ্ৰন্থখন পৰিৱেশৰ ওপৰত লিখিত ছপা আকাৰত প্ৰকাশ পোৱা এখন ইতিবাচক ,ফলপ্ৰসূ সৰ্বগ্ৰহণযোগ্য হাতপুথি ৷ দুশ পৃষ্ঠাৰ গ্ৰন্থখনৰ মূল্য কেৱল ১০০ টকা ৷ বঙাইগাঁৱৰ চিলাৰায় অফছেট প্ৰিণ্টত ছপা কৰা গ্ৰন্থখন লেখিকাৰ স্বামী তথা ধুবুৰী জিলাৰ ভোলানাথ মহাবিদ্যালয়ৰ বুৰঞ্জী বিভাগৰ অৱসৰপ্ৰাপ্ত অধ্যাপক বংকিম চন্দ্ৰ চক্ৰৱৰ্তীয়ে প্ৰকাশ কৰি উলিয়াইছে ৷ গ্ৰন্থখন বঙাইগাঁও ৰাজহ বিভাগৰ কাৰ্যালয়ৰ ওচৰতে থকা চিলাৰায় অফছেট প্ৰিণ্টৰ পৰা পাঠকে সংগ্ৰহ কৰিব পাৰিব ৷ উল্লেখ্য যে গ্ৰেটাৰ বঙাইগাঁও প্ৰেছ ক্লাবৰ সাধাৰণ সম্পাদক প্ৰণৱ কুমাৰ ডেকাই উদ্দেশ্য ব্যাখ্যা কৰা গ্ৰন্থ উন্মোচনী অনুষ্ঠানত সভাপতিত্ব কৰে প্ৰেছ ক্লাবৰ সভাপতি ৰঞ্জিত কুমাৰ শৰ্মাই ৷ অনুষ্ঠানত গ্ৰন্থখনৰ লেখিকা যামিনী দেৱীয়ে কয় যে সাহিত্যৰ লগত চাৰিটা দিশ জড়িত হৈ থাকে ৷ লেখক, পাঠক, সমাজ আৰু সংগঠক ৷ লেখকে লিখি যায়, পাঠকে পঢ়ে, লেখক আৰু পাঠকে মিলি এখন চিন্তাশীল সমাজৰ সৃষ্টি কৰে ৷ এই তিনিটা দলক একত্ৰিত কৰে সংগঠকে ৷ সংগঠক হ'ল অনুষ্ঠান আয়োজকসকল ৷ প্ৰেছ ক্লাবক সংগঠক আখ্যা দি গ্ৰন্থ উন্মোচনী অনুষ্ঠানটো আয়োজন কৰাৰ বাবে কৃতজ্ঞতা জনায় ৷ লেখিকাগৰাকীয়ে লগতে কয় যে প্ৰায় ৫০ বছৰ পূৰ্বৰে পৰাই বঙাইগাঁও জিলাৰ প্ৰাকৃতিক সৌন্দৰ্যৰ অপূৰ্ব সমাহাৰৰ দৃশ্যৰাজিয়ে তেওঁক আপ্লুত কৰি তুলিছিল ৷ ইয়াৰে নাককাটি, ভূমিশ্বৰ আৰু টুনীয়াৰ নান্দনিক সৌন্দৰ্যই লেখিকা গৰাকীক আপােন পাহৰা কৰি ৰাখিছিল। লগতে  কাকত,আলোচনীত প্রকাশিত পৰিবেশ সম্পকীয় লিখনিয়ে মন মুহিছিল ৷ এনেকুৱা বিনন্দীয়া পৃথিৱীখন ধ্বংস হোৱাৰ কথাটো মনে নামানিছিল আৰু তাৰে পৰাই পৰিৱেশ সম্পকীয় গ্ৰন্থ লিখাৰ উদগনি লাভ কৰিছিল বুলি কয় ৷ অনুষ্ঠানত গ্ৰন্থখনৰ প্ৰকাশক বংকিম চন্দ্ৰ চক্ৰৱৰ্তী, জ্যেষ্ঠ সাংবাদিক তেজেশ ত্ৰিপাঠীয়ে বক্তব্য ৰাখে ৷ অনুষ্ঠানত চিলাৰায় অফছেট প্ৰিণ্টৰ স্বত্বাধিকাৰী গৌতম মজুমদাৰো উপস্থিত থাকে ৷ উল্লেখ্য যে লেখিকা যামিনী দেৱীৰ ইয়াৰ পূৰ্বে প্ৰৱন্ধ, কবিতা, উপন্যাস, গল্প আদিকে ধৰি ৮ খন গ্ৰন্থ প্ৰকাশ পাইছে ৷🔯