🔯বঙাইগাঁও-উত্তৰ শালমাৰা ৰাজ্যিক ঘাইপথৰ বাখালগাঁৱত নিশা ভয়ংকৰ পথ দুৰ্ঘটনা🔯

🔯বঙাইগাঁও-উত্তৰ শালমাৰা ৰাজ্যিক ঘাইপথৰ বাখালগাঁৱত নিশা ভয়ংকৰ পথ দুৰ্ঘটনা

🔯বাহনৰ ভিতৰতে জীৱন্তে অগ্নিদগ্ধ হৈ এজনৰ কৰুণ মৃত্যু, গুৰুতৰভাৱে আহত চাৰিজন

📝বঙাইগাঁওঃ ১৭ ফেব্ৰুৱাৰীঃ বঙাইগাঁও জিলাৰ উত্তৰ শালমাৰা আৰক্ষী পহৰা চকীৰ অন্তৰ্গত বঙাইগাঁও-উত্তৰ শালমাৰা ৰাজ্যিক ঘাইপথৰ বাখালগাঁৱত বুধবাৰৰ নিশা এক ভয়ংকৰ পথ দুৰ্ঘটনা সংঘটিত হয় ৷ নিশা প্ৰায় ১ বজাত তীব্ৰবেগী দুখন বাহনৰ মাজত সংঘটিত মুখামুখি সংঘৰ্ষত নিমিষতে জ্বলি উঠে দুয়োখন বাহন ৷ ফলত অগ্নিদগ্ধ হৈ এখন বাহনৰ ভিতৰতে এজন আৰোহীযে জীৱন্তে কৰুণ মৃত্যুক আকোঁৱালি ল'বলগীয়া হয়৷ নিহত লোকজন ঢালিগাওঁ খোলাবান্ধাৰ প্ৰহ্লাদ পাঠকৰ পুত্ৰ নয়ন পাঠক(২৮)বুলি পিচত চিনাক্ত  কৰা হয় ৷ অন্যহাতে দুৰ্ঘটনাটোত আনখন বাহনৰ চাৰিজন আৰোহী আহত হয় ৷ প্ৰাপ্ত বাতৰি মতে বঙাইগাঁও চহৰৰ পৰা উত্তৰ শালমাৰা দিশলৈ গৈ থকা এমএল-০৮জি ৯৫৮৬ ( ML 08G 9586) নম্বৰৰ ছুইফ্ট ডিজিআৰ আৰু উত্তৰ শালমাৰা দিশৰ পৰা বঙাইগাঁও অভিমুখী এএছ-০১ জে চি ০৪২১ (AS 01 JC 0421) নম্বৰৰ ওৱাগনাৰৰ মাজত সংঘটিত  মুখামুখি সংঘৰ্ষৰ পিছতে দুয়োখন বাহন দপদপাই জ্বলি উঠে ৷ ফলত বঙাইগাঁৱৰ দিশৰ পৰা উত্তৰ শালমাৰাৰ দিশে গৈ থকা ছুইফ্ট ডিজিআৰত থকা ৪ জন আৰোহী বাহনৰ ভিতৰৰ পৰা ওলাই আহিবলৈ সক্ষম হয় যদিও গুৰুতৰভাৱে আহত হয়৷ 

আহত আৰোহী কেইজন ক্ৰমে কাৰ্তিক কোঁচ (২৭), মনোজ কোঁচ(৩২), ৰাজেশ গাম (৩৫) অৰু দিবাকৰ শ্বাহ (৩৬) আৰু  আটাইকেইজন আৰোহীৰ ঘৰ মেঘালয়ৰ পশ্চিম গাৰোপাহাৰত বুলি জানিব পৰা গৈছে ৷ বঙাইগাঁৱত বিয়া খাই ঘৰলৈ ওভতি গৈ থকাৰ সময়তে বাখলগাঁৱত নিশা সংঘটিত হৈছিল এই অঘটন ৷ কিন্তু দুৰ্ভাগ্যজনক আৰু অতি মৰ্মান্তিক যে উত্তৰ শালমাৰা দিশৰ পৰা বঙাইগাঁও চহৰ অভিমুখে আহি থকা ওৱাগনাৰৰ ভিতৰত থকা আৰোহীজন বাহিৰলৈ ওলাই আহিবলৈ সক্ষম নহ'ল আৰু জীৱন্তে অগ্নিদগ্ধ হৈ বাহনৰ ভিতৰতে কৰুণ মৃত্যুক আকোঁৱালি লয় ৷ সন্দেহ কৰা হৈছে যে দুৰ্ঘটনাৰ ফলত হয়তো গুৰুতৰভাৱে আহত হৈছিল আৰোহীজন আৰু যাৰ বাবে বাহিৰলৈ ওলাই আহিবলৈ সক্ষম নহ'ল ৷ পথদুৰ্ঘটনা সংঘটিত হোৱাৰ পিছত ঘটনাস্থলীত স্থানীয় ৰাইজ সমবেত হৈ আহত সকলক উদ্ধাৰ কৰি চিকিৎসালয়লৈ প্ৰেৰণৰ ব্যৱস্থা কৰে ৷ লগতে স্থানীয় ৰাইজে জুই নুমুৱাবলৈকো চেষ্টা কৰে যদিও ওচৰত পানী অথবা বালি আদি নথকাত সক্ষম নহ'ল ৷ দুৰ্ঘটনাৰ খবৰ পাই ঘটনাস্থলীত আৰক্ষী উপস্থিত হয় আৰু অগ্নি নিৰ্বাপক বাহিনীক খবৰ দিয়ে ৷ পিচত বঙাইগাঁও আৰু অভয়াপুৰীৰ পৰা অহা অগ্নিনিৰ্বাপক বাহিনীৰ দলে ৰাজপথত দাও দাওকৈ জ্বলি থকা বাহনৰ জুই নিৰ্বাপিত কৰিবলৈ সক্ষম হয় ৷ আৰক্ষীয়ে নিশাই দুৰ্ঘটনাত পতিত হৈ ৰাজপথতে জ্বলি ধ্বংসপ্ৰাপ্ত বাহন দুখন আৰু মৃৃৃৃতদেহ উদ্ধাৰ কৰি যাৱতীয় ব্যৱস্থা গ্ৰহণ কৰে ৷ উল্লেখ্য যে মৃত আৰোহীজনৰ পৰিচয় প্ৰথম অৱস্থাত উদ্ধাৰ কৰিব পৰা হোৱা নাছিল যদিও পিচত চিনাক্ত কৰা হয় ৷🔯