🔯বঙাইগাঁৱৰ কাকৈজানা সংৰক্ষিত বনাঞ্চলক বন্যপ্রাণী অভয়াৰণ্যলৈ উন্নীতকৰণৰ বিৰোধিতা কৰি জিলা উপায়ুক্তক কাষৰীয়া গাঁৱৰ ৰাইজৰ স্মাৰক পত্ৰ প্ৰদান

🔯বঙাইগাঁৱৰ কাকৈজানা সংৰক্ষিত বনাঞ্চলক বন্যপ্রাণী অভয়াৰণ্যলৈ উন্নীতকৰণৰ বিৰোধিতা কৰি জিলা উপায়ুক্তক কাষৰীয়া গাঁৱৰ ৰাইজৰ স্মাৰক পত্ৰ প্ৰদান

🔯২০০৬ ৰ অধীনত কাকৈজানা সংৰক্ষিত বনাঞ্চলক কমিউনিটি ফৰেষ্ট ৰিচোৰ্ছ (CFR) হিচাবে ৰূপান্তৰৰ দাবী

📝বঙাইগাঁওঃ ২ ফেব্ৰুৱাৰীঃ বঙাইগাঁও জিলাৰ কাকৈজানা সংৰক্ষিত বনাঞ্চলক বন্যপ্রাণী অভয়াৰণ্যলৈ উন্নীত কৰাৰ বিৰোধিতা কৰিছে সংৰক্ষিত বনাঞ্চলখনৰ কাষৰীয়া গাঁৱৰ ৰাইজে ৷ এই সন্দৰ্ভত পাৰ্শ্বৱতী বগৰীগুৰী ৰাভাপাৰা গাঁৱৰ ৰাইজে 'কাকৈজানা সংৰক্ষিত বনাঞ্চল'ক বন্যপ্রাণী অভয়াৰণ্যলৈ উন্নীতকৰণৰ বিৰোধিতা কৰি বুধবাৰে বঙাইগাঁও জিলাৰ উপায়ুক্তক এখন স্মাৰকপত্ৰ প্ৰদান কৰে ৷ স্মাৰকপত্ৰত কাকৈজানা সংৰক্ষিত বনাঞ্চলৰ সংলগ্ন বগুৰীগুৰি ৰাভাপাৰা গাঁৱৰ বাসিন্দাসকলে উল্লেখ কৰা মতে বিগত ২৫ বছৰতকৈ অধিককাল ধৰি তেওঁলোকে কাকৈজানা সংৰক্ষিত বনাঞ্চলৰ উদ্ভিদ আৰু বন্যপ্রাণীৰ সংৰক্ষণ কৰি অহাৰ সমান্তৰালভাৱে সংৰক্ষিত বনাঞ্চলখন পুনৰুজ্জীৱিত কৰাৰ বাবে নিষ্ঠা আৰু আন্তৰিক প্রচেষ্টা অব্যাহত ৰখাৰ বাবেই বনাঞ্চলখনত বনৰ পৰিমাণ ৫ শতাংশৰ পৰা ৭০ শতাংশলৈ বৃদ্ধি পাইছে ৷ লগতে তেওঁলোকে ইতিবাচক পদক্ষেপ গ্ৰহণ কৰাৰ ফলশ্ৰুতিতে বনাঞ্চলখনত প্রাপ্ত সােণালী বান্দৰৰ সংখ্যাও ১০০ তকৈ কমৰ পৰা বৃদ্ধি পাই ৬০০ ৰ অধিক হৈছে ৷ লক্ষ্যণীয় যে বনাঞ্চল সংলগ্ন গাঁওবাসীয়ে বনাঞ্চলত খৰি কটা এৰি অন্যান্য পৰিৱৰ্তিত জীৱিকা গ্ৰহণৰ বাবে কঠোৰভাৱে চেষ্টা কৰি আহিছে  আৰু এই ক্ষেত্ৰত সফলো হৈছে ৷ তেওঁলোকৰ এনে প্ৰচেষ্টাৰ ফলতেই পাহাৰৰ জান-জুৰি সমূহ আকৌ প্রৱাহিত হ’বলৈ আৰম্ভ কৰি তেওঁলোকৰ কৃষিপথাৰ সমূহতাে জলসিঞ্চনৰ বাবে সহায়ক হোৱাৰ কথা উল্লেখ কৰিছে ৷  স্মাৰকপত্ৰত কেৱলমাত্র সংৰক্ষণৰ দৃষ্টিকোণেৰে নহয়, নৈতিক দৃষ্টিকোণৰ পৰাও হেনো এই বনাঞ্চলৰ লগত গাওঁবাসীৰ সহাৱস্থানৰ সম্পর্ক আছে বুলি উল্লেখ কৰি বনাঞ্চলৰ ভিতৰত থকা কিছু অঞ্চলকো তেওঁলোকে থান হিচাপে পৱিত্ৰ জ্ঞান কৰে আৰু ইয়াৰ পৱিত্ৰতা ৰক্ষার্থে পূজা পাতল কৰি আহিছে বুলি কয় ৷ এই বনাঞ্চলকেই তেওঁলোকৰ পালনকর্তা হিচাবে বিবেচনা কৰি ইয়াৰে মৌ, নানা ধৰণৰ ভেষজ, বাঁহ, বেত, শুকান কাঠখৰি,খেৰ,বন্য শাক পাচলি, কাঠফুলা, মাছ, কেঁকোৰা ইত্যাদিৰ দৰে কিছু গৌণ বনজ সম্পদ সংগ্ৰহৰ মাধ্যমে তেওঁলোকৰ স্বাভাৱিক জীৱন অব্যাহত ৰাখিবলৈ কেৱল প্রথাগত তথা ঐতিহ্যগত কামৰ বাবেহে বনাঞ্চল খনক সদব্যৱহাৰ কৰে ৷ লগতে সংৰক্ষণৰ প্ৰচেষ্টাই ইয়াক বহনক্ষম তথা কৃষি আৰু স্থানীয় অর্থনীতিৰ মেৰুদণ্ড হিচাবে গঢ়ি তােলাৰ লগতে জলচক্ৰৰ পুনৰুজ্জীৱনৰ মাধ্যমেৰে এই বনাঞ্চলে জলবায়ুৰ পৰিবৰ্তনৰ বিৰুদ্ধেও যুঁজ দি অহাৰ কথা ব্যক্ত কৰিছে ৷ 

ইপিনে বনাঞ্চলৰ দাঁতিকাষৰীয়া গাওঁবােৰে যৌথ বন ব্যৱস্থাপনাৰ (JFMC) অধীনত থকা অঞ্চল সমূহত বনজ সম্পদ সংৰক্ষণৰ হিতে ভাল কাম কৰিছে আৰু  বনাঞ্চলৰ লগত এই সমিতি সমূহৰ এক আন্তৰিকতাৰ সম্পর্ক গঢ়লৈ উঠা বুলিও স্মাৰক পত্ৰত উল্লেখ কৰিছে ৷ সেয়ে  বন্যপ্রাণী সুৰক্ষা আইন ১৯৭২ ৰ অধীনত কঠোৰ আইন আৰােপ কৰি কাকৈজানা সংৰক্ষিত বনাঞ্চলক বন্যপ্রাণী অভয়াৰণ্যলৈ উন্নীত কৰিলে ৰাইজে যুগে যুগে পালন কৰি অহা প্রথাগত তথা ঐতিহ্যগত কামৰ ওপৰত হস্তক্ষেপৰ মাধ্যমেৰে বনাঞ্চলৰ ওপৰত তেওঁলোকৰ সম্প্রদায়ৰ মালিকানা হেৰুৱাই যােৱাৰ উপক্ৰম হ'ব বুলি শংকা প্ৰকাশ কৰিছে ৷ বনাঞ্চলখনৰ এনে এক পৰিস্থিতিত তেওঁলোকে এনে কোনাে অপৰিপক্ক সিদ্ধান্ত বহন কৰিব পৰা অৱস্থাত নাই য'ত কেৱল তেওঁলোকৰ বিশ্বাসযােগ্যতাক বিনষ্ট কৰাই নহয়, বৰং এই বনাঞ্চলৰ সংৰক্ষণৰ সমগ্ৰ প্ৰক্ৰিয়াটোকেই ধ্বংস কৰিব বুলিও স্মাৰকপত্ৰত উল্লেখ কৰিছে ৷ তদুপৰি স্মাৰকপত্ৰত বনাঞ্চলৰ প্ৰাথমিক হিতাধিকাৰী হিচাবে বনাঞ্চলখনৰ দীৰ্ঘম্যদী সংৰক্ষণৰ উদ্দেশ্যেৰে তেওঁলোকে বন্যপ্রাণী অভয়াৰণ্যৰ প্ৰচলিত ধাৰণাৰ সলনি ৰাইজৰ সক্রিয় অংশ গ্রহণেৰ সহ-পৰিচালিত ব্যৱস্থা নিশ্চিত কৰাৰ অৰ্থে বন অধিকাৰ আইন ২০০৬ ৰ অধীনত সংৰক্ষিত বনাঞ্চল খনক কমিউনিটি ফৰেষ্ট ৰিচোৰ্ছ (CFR) হিচাবে ৰূপান্তৰৰ দাবী জনাইছে ৷🔯