🔯চামতাৰ বিশিষ্ট শিক্ষাবিদ তথা বাওঁপন্থী নেতা ৰজনী ভূঞাৰ মৃত্যুত অঞ্চলজুৰি শোক🔯

🔯চামতাৰ বিশিষ্ট শিক্ষাবিদ তথা বাওঁপন্থী নেতা ৰজনী ভূঞাৰ মৃত্যুত অঞ্চলজুৰি শোক🔯

📝দিগন্ত বৰ্মনঃ নলবাৰীঃ ১০ মাৰ্চঃ পশ্চিম নলবাৰী অঞ্চলৰ  চামতাৰ ৰূপীয়াবাথান কায়স্থ চুবুৰী নিৱাসী তথা চামতা উচ্চতৰ মাধ্যমিক বিদ্যালয়ৰ অৱসৰপ্ৰাপ্ত গণিত বিষয়ৰ শিক্ষক, সমাজকৰ্মী, বামপন্থী নেতা ৰজনী ভূঞা(৮০)ৰ ১০ মাৰ্চৰ দুপৰীয়া নলবাৰী চহৰৰ এখন ব্যক্তিগত খণ্ডৰ চিকিৎসালয়ত হৃদৰোগত আক্ৰান্ত হৈ বিয়োগ ঘটাত চামতাকে ধৰি বৃহত্তৰ পশ্চিম নলবাৰী অঞ্চলত শোকৰ ছাঁ পৰিছে ৷ গণিত বিষয়ৰ বিদগ্ধ পণ্ডিত ভূঞাই চামতা উচ্চতৰ মাধ্যমিক বিদ্যালয়ৰ পৰা হাইস্কুলীয়া শিক্ষা শেষ কৰি কটন মহাবিদ্যালয়ৰ পৰা বিজ্ঞানৰ স্নাতক ডিগ্ৰী লাভ কৰিছিল ৷ ভূঞাই ককয়া হাইস্কুলত কেইমাহমান শিক্ষকতা কৰাৰ পিছত তেওঁ নিজে শিক্ষাগ্ৰহণ কৰা চামতা উচ্চতৰ মাধ্যমিক বিদ্যালয়ত নিগাজিকৈ শিক্ষকতা কৰিবলৈ লয় ৷ ২০০০ চনৰ ৩১ আগষ্টত শিক্ষকতা চাকৰিৰ পৰা অৱসৰ গ্ৰহণ কৰা ভূঞা মাৰ্ক্সবাদী কমিউনিষ্ট পাৰ্টীৰ এগৰাকী সদস্য হৈয়ো সকলোৰে প্ৰিয়ভাজন আছিল ৷ বৃহত্তৰ চামতা অঞ্চলৰ বিভিন্ন শৈক্ষিক, সামাজিক, সাংস্কৃতিক অনুষ্ঠান-প্ৰতিষ্ঠানৰ লগত জড়িত ভূঞাই চামতাৰ ৰূপকোঁৱৰ কলা পৰিষদৰ সভাপতি, উপ-সভাপতিৰ পদো অলংকৃত কৰিছিল ৷ ৰূপকোঁৰ কলা পৰিষদৰ বৰ্তমানৰ উপদেষ্টা ভূঞাই ২০০৭ চনৰ পৰা একেৰাহে ১২ বছৰ কাল চামতাৰ নৱজ্যোতি জাতীয় বিদ্যালয়ত শিক্ষকতা কৰিছিল ৷ বিগত পাঁচ বছৰ ধৰি হৃদৰোগত আক্ৰান্ত হৈ ঘৰতে চিকিৎসাধীন হৈ থকা ভূঞা বুধবাৰে নিশা গুৰুতৰভাৱে অসুস্থ হোৱাত বৃহস্পতিবাৰে পুৱাই তেওঁক নলবাৰী চহৰৰ সাৰথি নামৰ চিকিৎসালয়খনত ভৰ্তি কৰাই চিকিৎসা কৰা হয় যদিও দুপৰীয়া ১২-৫০ বজাত চিকিৎসালয়তে তেওঁ শেষ নিশ্বাস ত্যাগ কৰে ৷ বৃহত্তৰ পশ্চিম নলবাৰী অঞ্চলৰ অতি জনপ্ৰিয় গণিত শিক্ষক, সৰবৰহী সমাজকৰ্মী ভূঞাক সকলোৱে ভূঞা চাৰ, ৰজনী ভূঞা চাৰ বুলিয়ে জনিছিল ৷ ভূঞাৰ বিয়োগৰ খবৰ বিয়পি পৰাৰ লগে লগে অজস্ৰ গুণমুগ্ধ লোকেৰে তেওঁৰ চোতাল ভৰি পৰে ৷ ভূঞাৰ শৱদেহ চামতা উচ্চতৰ মাধ্যমিক বিদ্যালয়, নৱজ্যোতি জাতীয় বিদ্যালয়, চামতাৰ ৰূপকোঁৱৰ কলা পৰিষদলৈ নিয়া হয় আৰু তাতে সংশ্লিষ্ট অনুষ্ঠান প্ৰতিষ্ঠানসমূহে পুষ্পাঞ্জলি দি শ্ৰদ্ধা জনায় ৷ পিছত ভূঞাৰ চোতালত তেখতৰ শৱদেহত পুষ্পাঞ্জলি আৰু কমিউনিষ্ট পাৰ্টীৰ পতাকা দি শ্ৰদ্ধা নিবেদন কৰে পাৰ্টীৰ জিলা নেতা ৰাজেন বৰুৱা, জিলা সমিতিৰ সম্পাদক উমেশ দত্তই ৷ পাৰ্টীৰ পশ্চিম নলবাৰী আঞ্চলিক সমিতিৰ সম্পাদক গিৰীশ বৰ্মন, নেতা অনন্ত বৰ্মন, আঞ্চলিক সমিতিৰ সম্পাদক কৰুণা কলিতা, নলবাৰী জিলা কৃষক সভাৰ পৰা ধীৰেণ বৰ্মন, চি আই টি ইউৰ নলবাৰী জিলা সভাপতি নৃপেন কলিতা, সম্পাদক অনিল মহন্ত, গণতান্ত্ৰিক মহিলা সমিতিৰ পৰা ৰীণা দেৱী, গণতান্ত্ৰিক যুৱ ফেডাৰেচনৰ পশ্চিম নলবাৰী আঞ্চলিক সমিতিৰ পৰা বিজয় হুজুৰীয়েও শেষ শ্ৰদ্ধা নিবেদন কৰে ৷ সেইদৰে ধৰ্মপুৰ-ক্ষেত্ৰী ধৰ্মপুৰ কৃষক সভাৰ হৰমোহন বৰ্মন, নতুন সাহিত্য পৰিষদৰ ৰাজনৈতিক সাংগঠনিক সম্পাদক খগেন বৰ্মন, পকোৱা আঞ্চলিক কৃষক সভাৰ পৰা সনাতন শৰ্মা, ৰূপকোঁৱৰ কলা পৰিষদৰ সম্পাদক চন্দ্ৰকান্ত বৰ্মন, নৱজ্যোতি জাতীয় বিদ্যালয়ৰ পৰা দীপক দত্ত, মৃণাল বৰ্মন, পশ্চিম নলবাৰী প্ৰেছ ক্লাবৰ পৰা ৰাজেন বৈশ্য, অতুল ভৃঞাই পুষ্পাঞ্জলি দি শ্ৰদ্ধা জনায় ৷ বিয়লি প্ৰায় ৪-৩০ বজাত অজস্ৰ গুণমুগ্ধৰ উপস্থিতিত ঘৰৰ ওচৰৰ নিজৰ জমিত ভূঞাৰ নশ্বৰ দেহৰ শেষকৃত্য সম্পন্ন কৰা হয় ৷ মৃত্যুৰ সময়ত ভূঞাই এজন পুত্ৰ, এজনী বিবাহিত কন্যাসহ বহুতো আত্মীয়-স্বজন আৰু গুণমুগ্ধক ইহ সংসাৰত এৰিথৈ যায় ।🔯