🔯বঙাইগাঁৱৰ মাজগাঁৱত নিশা গুলীবিদ্ধ ড্ৰাগছ ব্যৱসায়ী🔯

🔯বঙাইগাঁৱৰ মাজগাঁৱত নিশা গুলীবিদ্ধ  ড্ৰাগছ ব্যৱসায়ী🔯

🔯আৰক্ষীক আক্ৰমণ কৰি গাড়ীৰ পৰা নামি পলাবলৈ ধৰাৰ সময়তে আৰক্ষীয়ে কৰিলে গুলি চালনা🔯

🔯আহত দুজন আৰক্ষীৰ লোকো🔯

📝বঙাইগাঁওঃ ১৯ মাৰ্চঃ ড্ৰাগছৰ বিৰুদ্ধে বঙাইগাঁও আৰক্ষীয়ে অভিযান অব্যাহত ৰখাৰ সময়তে শুকুৰবাৰে নিশা আৰক্ষীৰ গুলিত এজন ড্ৰাগছ ব্যৱসায়ী গুৰুতৰভাৱে আহত হয় ৷ আৰক্ষীৰ বাহনৰ পৰা জপিয়াই পলাবলৈ চেষ্টা কৰাত আৰক্ষীয়ে ড্ৰাগছ ব্যৱসায়ীজনৰ ভৰিলৈ লক্ষ্য কৰি গুলি চালনা কৰাত গুলিবিদ্ধ হয় ড্ৰাগছ ব্যৱসায়ীজন ৷ আৰক্ষীৰ গুলিত আহত ড্ৰাগছ ব্যৱসায়ীজন মহম্মদ হুছেইন (২০) বুলি আৰক্ষীয়ে প্ৰকাশ কৰিছে ৷ এই ঘটনাত আৰক্ষীৰ দুজন লোকো কিছু পৰিমাণে আহত হয় ৷ আহত দুজন নিউ বঙাইগাঁও আৰক্ষী পহৰা চকীৰ ভাৰপ্ৰাপ্ত আৰক্ষী বিষয়া সুকেশ ঘোষ আৰু কনিষ্টবল হীৰেন দাস ৷ ঘটনা সন্দৰ্ভত বঙাইগাঁও জিলাৰ আৰক্ষী অধীক্ষক স্বপ্ননীল ডেকাই সংবাদ মাধ্যমক জানিবলৈ দিয়া মতে বঙাইগাঁও সদৰ থানাৰ অন্তৰ্গত মাজগাঁৱত শুকুৰবাৰৰ নিশা ৯-৩৫ বজাত এই গুলি চালনাৰ ঘটনাটো সংঘটিত হয় ৷ তেওঁ প্ৰকাশ কৰা মতে বঙাইগাঁৱৰ নিউবঙাইগাঁৱৰ ভাওলাগুৰিত (বদি বাজাৰ) ভাড়াঘৰত থাকি ধুবুৰীৰ মহম্মদ হুছেইনে(২০)  ড্ৰাগছৰ বেহা চলাই আহিছিল ৷ পিচত আৰক্ষীয়ে ড্ৰাগছৰ ব্যৱসায়ৰ সৈতে জড়িত থকা মহম্মদ হুছেইনক ১৭ টা কন্টেইনাত ৰখা প্ৰায় ২২.০৯ গ্রাম ওজনৰ সন্দেহযুক্ত হেৰ'ইন আৰু এখন পালছাৰ বাইকসহ শুকুৰবাৰে গ্ৰেপ্তাৰ কৰি ( বঙাইগাঁও সদৰ থানাত পিএছ গোচৰ নং ১৫৫/২২, ধাৰা ২২(এ)/২৯ এনডিপিএছ আইন) সোধ -পোচ অব্যাহত ৰাখিছিল ৷ ড্ৰাগছ ব্যৱসায়ীজনে আৰক্ষীৰ আগত দিয়া স্বীকাৰোক্তি মতে এজন লগৰীয়াই ধুবুৰীৰ পৰা ড্ৰাগছ লৈ যোগীঘোপাৰ ফালে আহিব ৷ অভিযুক্তৰ ভাষ্যৰ ভিত্তিত তদন্তকাৰী বিষয়া তথা নিউ বঙাইগাঁও আৰক্ষী পহৰা চকীৰ ভাৰপ্ৰাপ্ত আৰক্ষী বিষয়া সুকেশ ঘোষৰ নেতৃত্বত এটি আৰক্ষীৰ দলে ড্ৰাগছ ব্যৱসায়ী মহম্মদ হুছেইনক লগত লৈ যোগীঘোপাৰ দিশে আনজন ড্ৰাগছ ব্যৱসায়ীক কৰায়ত্ত কৰাৰ বাবে যায় ৷ কিন্তু বহু সময় ধৰি অপেক্ষা কৰি থকাৰ পিচতো ড্ৰাগছ ব্যৱসায়ীজন আহি নোপোৱাত আৰক্ষীৰ দলটো বঙাইগাঁৱৰ দিশে উভতি আহিবলৈ লয় ৷ হোলী উপলক্ষে বাহনৰ চলাচল কম হোৱাৰ বাবে হয়তো ড্ৰাগছ ব্যৱসায়ীজন আহিব নোৱাৰিলে বুলি আৰক্ষীয়ে সন্দেহ কৰিছে ৷ ইপিনে শনিবাৰে ড্ৰাগছ ব্যৱসায়ীজনক আদালতত যিহেতু হাজিৰ কৰাব সেই বাবে আচামীজনৰ স্বাস্থ্য পৰীক্ষাটো একেবাৰে বাটতে পোৱা বঙাইগাঁও অসামৰিক চিকিৎসালয়ত কৰি যাব বুলি আৰক্ষীৰ দলটোৱে সিদ্ধান্ত লৈ বঙাইগাঁওলৈ উভতি আহি থকা অৱস্থাতে মাজগাঁৱৰ নিৰ্জন এলেকাত হঠাতে অভিযুক্ত ড্ৰাগছ ব্যৱসায়ী মহম্মদ হুছেইনে কনিষ্টবল হীৰেন দাসক আক্ৰমণ কৰে আৰু আৰক্ষীৰ গাড়ীৰ পৰা জাপ মাৰি নামি পলায়নৰ চেষ্টা কৰে ৷ পিচত তদন্তকাৰী আৰক্ষী বিষয়া সুকেশ ঘোষেও ড্ৰাগছ ব্যৱসায়ীজনক পলোৱাত বাধা প্ৰদানৰ চেষ্টা চলায় যদিও আৰক্ষী বিষয়াজনক আক্ৰমণ কৰি পলায়ণ কৰে ৷ এনে অৱস্থাত অভিযুক্ত ড্ৰাগছ ব্যৱসায়ীজনক পলায়ণত বাধা দিবলৈ আৰক্ষী বিষয়াজনে প্ৰথমে এজাঁই শুন্যলৈ গুলি চালনা কৰে ৷ কিন্তু তৎস্বত্বেও অভিযুক্ত ড্ৰাগছ ব্যৱসায়ীজন থমকি নৰৈ ইতিমধ্যে পথ অতিক্ৰম কৰি আনফালে গৈছিল ৷ শেষত উপায়ন্তৰ হৈ আৰক্ষী বিষয়াগৰাকীয়ে অভিযুক্ত ড্ৰাগছ ব্যৱসায়ীজনক কৰায়ত্ত কৰিবলৈ সোঁ-ভৰিৰ আঁঠুৰ তলত লক্ষ্য কৰি এজাঁই গুলি চালনা কৰাত ড্ৰাগছ ব্যৱসায়ী মহম্মদ হুছেইন আহত হয় ৷ পিচত লগে লগে আহত মহম্মদ হুছেইনক নিকটৱৰ্তী মাজগাঁৱস্থিত বঙাইগাঁও অসামৰিক চিকিৎসালয়ত ভৰ্তি কৰা হয় ৷ লগতে এই ঘটনাত আহত আৰক্ষী বিষয়া সুকেশ ঘোষ আৰু কনিষ্টবল হীৰেন দাসকো চিকিৎসালয়ত ভৰ্তি কৰা হয় ৷ 

ইপিনে গুৰুতৰভাৱে আহত ড্ৰাগছ ব্যৱসায়ীজনক বঙাইগাঁও অসামৰিক চিকিৎসালয়ত চিকিৎসা প্ৰদান কৰা হয় যদিও উন্নত চিকিৎসাৰ বাবে চিকিৎসকে বৰপেটা চিকিৎসা মহাবিদ্যালয় হাস্পতাললৈ ৰেফাৰ কৰে ৷ পিচত নিশাই এম্বুলেঞ্চেৰে নিৰাপত্তাসহ আহত মহম্মদ হুছেইনক বৰপেটা চিকিৎসা মহাবিদ্যালয় হাস্পতাললৈ প্ৰেৰণ কৰা হয় ৷ ইপিনে ঘটনাৰ খবৰ পোৱাৰ পিচতে জিলাৰ আৰক্ষী অধীক্ষক স্বপ্ননীল ডেকা, অতিৰিক্ত আৰক্ষী অধীক্ষক লুনা সোনোৱালসহ আৰক্ষীৰ দল ঘটনাস্থলীত উপস্থিত হৈ ঘটনাস্থলী পৰিদৰ্শন কৰে ৷ পথৰ দাঁতিত থকা গছ এজোপাৰ তলৰ ঘটনাস্থলীত এটা খালী কাৰ্টিজ আৰু তেজ পৰি আছিল ৷ একেদৰে পশ্চিম অসম সংমণ্ডলৰ আৰক্ষী উপ মহা পৰিদৰ্শক দিলীপ কুমাৰ দে উপস্থিত হৈ ঘটনাস্থলী পৰিদৰ্শন কৰি ঘটনাৰ বুজ লয় ৷ লগতে তেওঁলোকে বঙাইগাঁও অসামৰিক চিকিৎসালয়ত উপস্থিত হৈ আহতসকলৰ বুজ লয় ৷ ঘটনা সন্দৰ্ভত পশ্চিম অসম সংমণ্ডলৰ আৰক্ষী উপ মহাপৰিদৰ্শক দিলীপ কুমাৰ দেও একেখিনি কথাকে জানিবলৈ দিয়ে ৷ উল্লেখ্য যে অসম আৰক্ষীয়ে ৰাজ্যজুৰি ড্ৰাগছৰ বিৰুদ্ধে অভিযান অব্যাহত ৰাখিছে যদিও ড্ৰাগছৰ বেহা বৰ্তমানো অব্যাহত আছে ৷ আনহাতে বঙাইগাঁৱত আৰক্ষীৰ গুলিত আচামী আহত হোৱা এয়া দ্বিতীয়টো ঘটনা ৷ ইয়াৰ পূৰ্বে অবৈধ  চুপাৰীৰ বেহাৰ সৈতে জড়িত থকাৰ অভিযোগত বঙাইগাঁও আৰক্ষীয়ে গোলাঘাটৰ পৰা গ্ৰেপ্তাৰ কৰা আব্দুল হান্নান আলী ওৰফে বাবলুয়ে আৰক্ষীক আক্ৰমণ কৰি পলায়ণৰ চেষ্টা চলাওতে আৰক্ষীৰ গুলিত আহত হৈছিল ৷ ইপিনে আৰক্ষীৰ জিম্মাৰ পৰা ঠায়ে ঠায়ে অপৰাধীয়ে পলায়ণৰ চেষ্টা চলোৱা বিষয়টোৱে আৰক্ষীৰ গাফিলতিৰ দিশটোকে উদঙাই দিয়া বুলি সচেতন মহলে মন্তব্য কৰিছে ৷🔯