🔯বঙাইগাঁৱত অবৈধ জুৱা খেলৰ বিৰুদ্ধে আৰক্ষীৰ অভিযান🔯

🔯বঙাইগাঁৱত অবৈধ জুৱা খেলৰ বিৰুদ্ধে আৰক্ষীৰ অভিযান🔯 

🔯৯ জন জুৱাৰীক কৰায়ত্তঃ নগদ ৭৫ হেজাৰ টকা, পাঁচখন খেলৰ সামগ্ৰী, ১২ টা মোবাইলসহ বিভিন্ন সামগ্ৰী জব্দ🔯 

📝বঙাইগাঁওঃ ২৪ মাৰ্চঃ পূজা তথা বিভিন্ন উৎসৱ পাৰ্বনৰ অচিলা লৈ বঙাইগাঁও জিলাত ব্যাপকভাৱে চলি অহা জুৱা খেলৰ বিৰুদ্ধে শেহতীয়াভাৱে বঙাইগাঁও জিলা আৰক্ষীয়ে কঠোৰ ভূমিকা গ্ৰহণ কৰিছে ৷ এই অবৈধ জুৱা খেল বন্ধ কৰাৰ বাবে আৰম্ভ কৰিছে অভিযান ৷ আজি বঙাইগাঁও সদৰ থানাৰ অন্তৰ্গত চিৰাং আৰু বঙাইগাঁও জিলাৰ সীমামুৰীয়া দোলাইগাঁৱত সন্ধিয়াৰ ভাগত অবৈধ জুৱা খেলৰ বিৰুদ্ধে বঙাইগাঁও আৰক্ষীৰ এটা দলে অভিযান চলাই জুৱা খেল উৎখাত কৰে ৷ অভিযানকাৰী দলে লগতে ৯ জন জুৱাৰীক কৰায়ত্ত কৰাৰ লগতে জুৱা খেলৰ গুটি, জুৱা খেলত ব্যৱহৃত বিভিন্ন সামগ্ৰী, নগদ ধন, মোবাইল আদি জব্দ কৰে ৷ এই সন্দৰ্ভত বঙাইগাঁও সদৰ থানাৰ ভাৰপ্ৰাপ্ত আৰক্ষী বিষয়া উপেন কলিতাই সংবাদ মাধ্যমক জানিবলৈ দিয়া মতে বঙাইগাঁও আৰক্ষীয়ে শেহতীয়াভাৱে যোৱা এসপ্তাহৰ পৰা বিভিন্ন পূজা, ধৰ্মীয় অনুষ্ঠান আদিৰ অচিলাৰে চলি থকা জুৱা খেলৰ বিৰুদ্ধে তীব্ৰ অভিযান আৰম্ভ কৰা হৈছে ৷ তিনি - চাৰি দিন মান পূৰ্বে জুৱা খেলৰ লগত জড়িত পাঁচজন লোকক গ্ৰেপ্তাৰ কৰি জেললৈ প্ৰেৰণ কৰা হৈছে ৷ বৃহস্পতিবাৰে চিৰাং আৰু বঙাইগাঁও জিলাৰ সীমামুৰীয়া দোলাইগাঁৱত ৷ দৌল উৎসৱৰ অচিলা লৈ প্ৰায় ৩০ খনমান জুৱা খেল চলি আছিল ৷ এই বিষয়ে নিউ বঙাইগাঁও আৰক্ষী পহৰা চকীৰ ভাৰপ্ৰাপ্ত বিষয়া সুকেশ ঘোষে লাভ কৰা তথ্যৰ ভিত্তিত বঙাইগাঁও আৰক্ষীৰ এটা বৃৃহৎ দলে আৰক্ষী অধীক্ষক স্বপ্ননীল ডেকাৰ নেতৃত্বত এই অবৈধ জুৱা খেলৰ বিৰুদ্ধে অভিযান চলায় ৷ সামৰিক আৰু অসামৰিক পোচাকত যোৱা অভিযানকাৰী আৰক্ষীৰ দল উপস্থিত হোৱাৰ লগে লগে জুৱাস্থলীৰ পৰা ছত্ৰভংগ দিয়ে জুৱাৰীৰ লগতে খেলি থকা লোকসকল ৷ তাৰ মাজতে আৰক্ষীয়ে ৯ জন জুৱাৰীক কৰায়ত্ত কৰিবলৈ সক্ষম হয় ৷ লগতে জুৱাস্থলীৰ পৰা পাঁচখন জুৱা খেলৰ ডাবু গুটি, জুৱা খেলত ব্যৱহৃত বিভিন্ন সামগ্ৰী, টিৰ্পাল,  নগদ ৭৫ হেজাৰ টকা, ১২ টা মোবাইল আদি জব্দ কৰে ৷ 

আৰক্ষীয়ে জুৱাস্থলীৰ পৰা কৰায়ত্ত কৰা জুৱাৰী কেইজন হ'ল বঙাইগাঁও চহৰৰ বাবুপাৰাৰ পৰেশ দাস (৬৬), বিশ্বজিৎ ৰয় (৫০) , খাৰিজা দোলাইগাঁৱৰ ভাৰত মাহাতো (৪৩) , চিৰাং জিলাৰ ঢালিগাঁৱৰ ৰতন ব্ৰহ্ম( ৩৮), লকেন বৰ্মন ( ৪০) , বিজনী ফাগুনাগাঁৱৰ সুৰত ৰায় (৫০) , ভাটো ৰায় (৭৩) , ১ নং ফাগুনাগাৱৰ সম্বাৰুৰাম ৰায় (২৭) আৰু কোকৰাঝাৰ জিলাৰ দোতমাৰ পৰমেশ্বৰ ব্ৰহ্ম (৪৬) ৷ আটকাধীন লোককেইজনৰ বিৰুদ্ধে ইতিমধ্যে আৰক্ষীয়ে এক গোচৰ জুৰু কৰা বুলিও জানিবলৈ দিয়ে ৷ ভাৰপ্ৰাপ্ত আৰক্ষী বিষয়াগৰাকীয়ে জানিবলৈ দিয়া মতে জুৱাৰ বিৰুদ্ধে আৰক্ষীৰ অভিযান অব্যাহত থাকিব আৰু ইতিমধ্য সিদ্ধান্ত গ্ৰহণ কৰা হৈছে ৷ তেওঁ  কয় যে বিভিন্ন সময়ত আৰক্ষীয়ে জুৱা খেল চলি থকাৰ খবৰ পাই উৎখাত কৰিবলৈ যায় যদিও সফল হোৱা নাছিল ৷ কিন্তু বৃহস্পতিবাৰে বিশেষ কৌশলেৰে চলোৱা অভিযান সফল হয় ৷ আৰক্ষী বিষয়াগৰাকীয়ে লগতে পূজা তথা ধৰ্মীয় অনুষ্ঠান আয়োজন কৰা সমিতিসমূহক জুৱা খেলক প্ৰশ্ৰয় নিদিবলৈ আহ্বান জনাছে ৷ উল্লেখ্য যে বঙাইগাঁও জিলা আৰক্ষী প্ৰশাসনৰ নীৰৱ ভূমিকাৰ বাবেই জিলাখনৰ সৰ্বত্ৰে অবৈধ জুৱা খেল চলি অহাৰ অভিযোগ উত্থাপিত হৈ আহিছে ৷ বিশেষকৈ গ্ৰাম্যাঞ্চলত এই জুৱা খেল ব্যাপকভাৱে চলি আহিছে ৷ ইয়াৰ ফলত সামাজিক আৰু শৈক্ষিক পৰিৱেশ বিনষ্ট হৈ পৰিছে যদিও প্ৰশাসনৰ তৰফৰ পৰা কোনো পদক্ষেপ গ্ৰহণ কৰা দেখা পোৱা হোৱা নাছিল ৷ শেহতীয়াভাৱে জুৱাৰ বিৰুদ্ধে কিছু তৎপৰতা দেখুৱা পৰিলক্ষিত হৈছে যদিও কিমান কঠোৰ হয় সেয়া সময়ত স্পষ্ট হ'ব ৷🔯