🔯বঙাইগাঁৱৰ হোটেল ৰাজপ্লেচত আছাৰ গুৰুত্বপূৰ্ণ সভা🔯

🔯বঙাইগাঁৱৰ হোটেল ৰাজপ্লেচত আছাৰ গুৰুত্বপূৰ্ণ সভা🔯

🔯ৰাজনীতি কৰক কোনো কথা নাই , কিন্তু আমাৰ সংস্কৃতি, ইতিহাস আৰু পৰিচয়ৰ ওপৰত যাতে কোনেও ৰাজনীতি নকৰে সেইটো আমি সকিয়াই দিছো🔯

🔯আদিবাসী জাতীয় মঞ্চক জাতিগত প্রমাণ পত্ৰ প্ৰদানৰ কৰ্তৃত্ব প্ৰদানৰ দাবী🔯

📝বঙাইগাঁওঃ ১৭ মাৰ্চঃ ৰাজনীতি কৰক কোনো কথা নাই ৷ কিন্তু আমাৰ সংস্কৃতি, ইতিহাস আৰু পৰিচয়ৰ ওপৰত যাতে কোনেও ৰাজনীতি নকৰে সেইটো আমি সকিয়াই দিছো ৷ এই মন্তব্য কৰিছে সদৌ অসম আদিবাসী ছাত্ৰ সন্থা (আছা) ৰ সভাপতি প্ৰদীপ নাগে ৷ বৃহস্পতিবাৰে সদৌ অসম আদিবাসী ছাত্ৰ সন্থাৰ কেন্দ্ৰীয় সমিতিৰ নেতৃত্বত বঙাইগাঁও চহৰৰ ৰাজপ্লেচ হোটেলৰ সভাকক্ষত নামনি অসমৰ পাঁচখন জিলাৰ প্ৰতিনিধিৰ উপস্থিতিত  অনুষ্ঠিত এখন গুৰুত্বপূৰ্ণ সভাৰ পিচত সংবাদ মাধ্যমৰ আগত সভাপতিগৰাকীয়ে এই মন্তব্য কৰে ৷ এই সভাত মূলত জাতিৰ প্ৰমাণ পত্ৰ প্ৰদানৰ বিষয়টোৰ লগতে জনজাতিকৰণ আদি বিষয়ৰ ওপৰত আলোচনা হয় ৷ আছাৰ সভাপতি প্ৰদীপ নাগে কয় যে যোৱা ১৫ মার্চত কেবিনেট সিদ্ধান্ত অনুসৰি আদিবাসীসকলৰ জাতিগত প্রমাণ পত্র প্রদান কৰা কৰ্তৃত্ব চাহ জনগােষ্ঠী সম্মিলনীক প্ৰদান কৰা হ'ব বুলি চৰকাৰে ঘোষণা কৰিছে ৷ কিন্তু আমাৰ কথা হ'ল চৰকাৰে চাহ জনগোষ্ঠী সন্মিলনীৰ জৰিয়তে আদিবাসীসকলক জাতিৰ প্ৰমাণ পত্ৰ অৰ্থাৎ অ বি চি চাৰ্টিফিকেট প্ৰদান কৰিব বিচৰা সিদ্ধান্ত আমি আছাই কেতিয়াও মানি নলও ৷ যদি চাহ জনগোষ্ঠী সন্মিলনীৰ জৰিয়তে প্ৰদান কৰিব পাৰে, তেতিয়াহলে কিয় আদিবাসী জনগোষ্ঠী সন্মিলনী গঠন কৰি জাতিৰ প্ৰমাণ পত্ৰ প্ৰদানৰ কতৃত্ব দিব নোৱাৰে? চৰকাৰে এনে সিদ্ধান্ত গ্ৰহণ কৰাৰ পূৰ্বে আদিবাসী জাতীয় মঞ্চ, আদিবাসী সাহিত্য সভাৰ সৈতে কিয় আলোচনা নকৰিলে ৷ যদি কৰিছে কিয় চৰকাৰে স্পষ্টিকৰণ নিদিলে সেয়া আমাৰ প্ৰশ্ন ৷ আমি আজি দুখ পাইছো ৷ কাৰণ ধুবুৰীৰ পৰা শদিয়ালৈকে মুণ্ডা, ওৰাং, খাড়িয়া , চানতাল আদিবাসী লোকসকলক থকাৰ পিচতো এই জাতিটোক চিনি পাইও নিচিনাৰ ভাও ধৰাত আমি বহু দুখ পাইছো ৷ সেয়ে এই সভাত আলোচনা হৈছে যদিহে চৰকাৰে আদিবাসীসকলক এইদৰে অৱহেলা কৰি থাকে তেতিয়াহলে আমিও অসমত জংগী আন্দোলন কৰিবলৈ বাধ্য হ'ম ৷ চৰকাৰৰ সিদ্ধান্তত ক্ষুদ্ধ আছাৰ সভাপতি নাগে লগতে কয় যে  যদি আমাক বাৰে বাৰে চাহ জনগোষ্ঠীৰ নামতে জাতিগত প্ৰমাণ পত্ৰ প্ৰদান কৰি থাকে, তেতিয়াহলে আমি বুজি উঠিম যে আমাক আদিবাসীসকলক জনজাতিকৰণ নিদিয়াৰ এয়া এক বৃহৎ ষড়যন্ত্ৰ ৷ কাৰণ চৰকাৰৰ যদি আদিবাসীসকলক জনজাতিকৰণ দিয়াৰ ইচ্ছা আছিল, তেতিয়াহলে আমাৰ যিটো আদিবাসীৰ পৰিচয় সেই পৰিচয়টোক কিয় আনফালে নিব বিচাৰিছে ৷ ইয়াৰ জৰিয়তে আমাৰ আদিবাসীসকলৰ মৌলিক অধিকাৰ খৰ্ব কৰিব বিচৰা হৈছে ৷ ট্ৰাইবেল মানে আদিবাসী, আদিবাসী মানে ট্ৰাইবেল ৷ সেয়ে কোনোবাই যদি আমাৰ মৌলিক অধিকাৰৰ পৰা আমাক বঞ্চিত কৰিব বিচাৰে, তেতিয়াহলে আমি আইনৰ আশ্ৰয় ল'ম ৷ আমাক কিয় চাহ জনগোষ্ঠী হিচাপে পৰিচয় দিব বিচৰা হৈছে, তাৰ বাবে আইনৰ সহায় ল'ম ৷ আমাৰ ইতিহাস আছে, সংস্কৃতি আছে, সাজ- পাৰ আছে, ভাষা আছে ৷ তাৰ পিচতো আমাক জোৰকৈ চাহ জনগোষ্ঠী বনাব বিচৰা হৈছে ৷ চাহ এটা ট্ৰেড হয়, এটা ব্যৱসায় হয় ৷ গতিকে সেই ব্যৱসায়ী চাহ জনগোষ্ঠীৰ নামটো কিয় আমাক দিব ? চাহ এডাল গছ হয়,  চাহ উৎপাদন হয় ৷ সেই চাহৰ নামেৰে আমাক কিয় পৰিচয় দিয়া হ'ব ৷ আমাৰ জাতিৰ পৰিচয়  আছে ৷ আমি মুণ্ডা, ওৰাং, খাড়িয়া , চানতাল , পৰজা, গড় ,ভূমিজ আদিৰ লোক হয় ৷ ইয়াৰ পিচতো কিয় আমাক চাহ জনগোষ্ঠী বুলি পৰিচয় দিব বিচৰা হৈছে বুলিও প্ৰশ্ন উত্থাপন কৰে ৷ লগতে কয় যে চাহ বাগিছাসমূহত কেৱল আদিবাসীসকলেই কাম নকৰে ৷ তাত অসমীয়া, বড়ো, নেপালী আদিয়েও কাম কৰে ৷ কিন্তু তেওঁলোকৰ জাতিৰ প্ৰমাণ পত্ৰতটো চাহ জনগোষ্ঠী বুলি লিখা নাথাকে ৷ গতিকে আমাৰ আদিবাসীসকলৰ ক্ষেত্ৰতহে কিয় চাহ জনগোষ্ঠী বুলি পৰিচয় দিয়া হ'ব এয়া এক ৰহস্যৰ বিষয় ৷ 

ৰাজনীতি কৰক কোনো কথা নাই ৷ কিন্তু আমাৰ সংস্কৃতি, ইতিহাস আৰু পৰিচয়ৰ ওপৰত যাতে কোনেও ৰাজনীতি নকৰে সেইটো আমি সকিয়াই দিছো ৷ সভাপতিগৰাকীয়ে পুনৰ কয় যে তেওঁলোক চাহ জনগােষ্ঠী নহয় আৰু তেওঁলোকৰ জাতিৰ পৰিচয় আদিবাসী মুণ্ডা, ওৰাং, খাড়িয়া , চানতাল , পৰজা, গড়  ইত্যাদি হােৱা উচিত বুলি বহুবাৰ স্মাৰক পত্ৰ প্ৰদান কৰা স্বত্তেও আদিবাসীসকলৰ জাতিগত প্রমাণ পত্র প্রদান কৰা কৰ্তৃত্ব চাহ জনগােষ্ঠী জাতীয় সন্মিলনীক প্ৰদান কৰা হৈছে ৷ যাৰ জৰিয়তে আদিবাসী সকলৰ পৰিচয়, অস্তিত্ব সংকটত ৷ সেয়ে অসম চৰকাৰে আদিবাসী সকলৰ জাতিগত প্রমাণ পত্ৰ প্ৰসংগত কেবিনেটত পুনৰ আলােচনা কৰি সুকীয়াভাৱে আদিবাসীসকলৰ জাতিগত প্রমাণ পত্ৰ প্ৰদান কৰা কৰ্তৃত্ব আদিবাসী জাতীয় মঞ্চক প্রদান কৰিবলৈকো দাবী উত্থাপন কৰিছে আছাই ৷ উল্লেখ্য যে ছাত্ৰ সংগঠনটোৰ সভাপতি প্রদীপ নাগৰ সভাপতিত্বত অনুষ্ঠিত সভাৰ উদ্দেশ্য ব্যাখ্যা কৰি ভাৰপ্রাপ্ত সম্পাদক নােৱাছ বাৰ্লাই কয় যে ইষ্টিফান গোটৰ সদস্যসকলে ২০১৬ চনৰ ২৫ জুলাইত সদৌ অসম আদিবাসী ছাত্ৰ সন্থাৰ (আছা ) মূলসুঁতিৰ পৰা আঁতৰি অন এটা গােট গঠন কৰিছিল যদিও ২০১৬ চনৰ পৰাই তেওঁলোকক মূখ্য ধাৰালৈ উভতি আহিবলৈ কেইবাবাৰাে আহ্বান জনোৱা হৈছিল । শেহতীয়াভাৱে  তেওঁলোকে অহা ২০ মার্চত পানেৰী চাহ বাগিছাত  বৈঠকত মিলিত হৈ মূলসূঁতিত উভতি অহাৰ সম্মতি প্ৰকাশ কৰিছে ৷ গতিকে তেওঁলোকক মূলসূঁতিলৈ উভতি অহাৰ বাবে আদৰণি জনায় ৷ ছবছৰৰ পিছত ইষ্টিফান গোটৰ সদস্যসকল মূল সুঁতিলৈ উভতি অহাৰ বাবে সন্মতি প্ৰকাশ কৰাত আছাৰ নেতৃত্ব আনন্দিত হৈছে আৰু তেওঁলোকক উষ্ম আদৰণি জনোৱাৰ লগতে জাতিৰ হকে যৌথভাৱে কাম কৰিবলৈ আহ্বান জনায় ৷ সভাত বঙাইগাঁও, চিৰাং, কোকৰাঝাৰ, ধুবুৰী আদি জিলাৰ আছাৰ প্ৰতিনিধিসকলৰ লগতে কেন্দ্ৰীয় সমিতিৰ ভালেকেইগৰাকী বিষয়ববীয়াও উপস্থিত আছিল ৷🔯