🔯অগপৰ ফণীভূষণ চৌধুৰীৰ বঙাইগাঁৱৰ আঞ্চলিকতাবাদৰ অক্ষত দুৰ্গত পৰিল বিজেপিৰ হাতোৰা , খহিল দুৰ্গ🔯

🔯অগপৰ ফণীভূষণ চৌধুৰীৰ বঙাইগাঁৱৰ আঞ্চলিকতাবাদৰ অক্ষত দুৰ্গত পৰিল বিজেপিৰ হাতোৰা , খহিল দুৰ্গ🔯

🔯বিজেপিৰ দখললৈ নিলে বঙাইগাঁও পৌৰসভাঃ অগপ থাকিল দ্বিতীয় স্থানত🔯

🔯ৰাজপথত আনন্দ - উল্লাস বিজেপি নেতা- কৰ্মীৰ🔯

🔯কংগ্ৰেছ দলৰ একমাত্ৰ প্ৰাৰ্থীগৰাকীৰ লগতে অগপৰ দুগৰাকী প্ৰাৰ্থীয়েও বিজেপি দলক সমৰ্থন আগবঢ়োৱাৰ সম্ভাৱনা🔯 

📝বঙাইগাঁওঃ ৯ মাৰ্চঃ অৱশেষত অগপৰ ফণীভূষণ চৌধুৰীৰ বঙাইগাঁৱৰ আঞ্চলিকতাবাদৰ অক্ষত দুৰ্গত বিজেপিৰ হাতোৰা পৰিল ৷ বিজেপিৰ হাতোৰাৰ কোৱত খহিল দুৰ্গ ৷ ইয়াৰ লগে লগে দৰ্পচূৰ্ণ হ'ল অগপৰ ৷ লগতে এটা কথা স্পষ্ট হৈ পৰিল যে বঙাইগাঁওবাসী ৰাইজে সঁচাকৈ যেন পৰিৱৰ্তন বিচাৰিবলৈ আৰম্ভ কৰিছে ৷ ইয়াৰ প্ৰথম পদক্ষেপ হিচাপে বঙাইগাঁও পৌৰসভা নিৰ্বাচনত বঙাইগাঁও চহৰবাসী ৰাইজে প্ৰত্যাখ্যান কৰিলে বিধায়ক ফণীভূষণ চৌধুৰীৰ অগপ দলক ৷ ইয়াৰ বিপৰীতে আদৰিলে পৰিৱৰ্তন আৰু উন্নয়নৰ শ্লোগানেৰে ৰাইজৰ ওচৰ চপা অগপৰে মিত্ৰদল বিজেপিক ৷ উল্লেখ্য যে ২৫ টা ৱাৰ্ডযুক্ত বঙাইগাঁও পৌৰসভা নিৰ্বাচনৰ আজি ঘোষিত ফলাফল অনুসৰি বিজেপিয়ে অকলে পৌৰসভা গঠনৰ বাবে প্ৰয়োজন হোৱা ১৩ খন আসন লাভ কৰাৰ বিপৰীতে অগপৰ দুৰ্গত ১১ খন ( এখন বিনা প্ৰতিদ্বন্দ্বিতাৰে জয়ী হৈছে) আসন লাভ কৰি দ্বিতীয় স্থানত থাকিল অগপ ৷ আনহাতে কংগ্ৰেছ দলে লাভ কৰিলে এখন আসন ৷ এক কথাত ক'বলৈ গলে একপ্ৰকাৰ অগপৰ দখলৰ পৰা বিজেপিয়ে বঙাইগাঁও পৌৰসভাখন আজুৰি নিজৰ দখললৈ আনিলে ৷ উল্লেখ্য যে ৷ বঙাইগাঁও পৌৰসভাৰ ২৩ নম্বৰ ৱাৰ্ডত অসম গণ পৰিষদৰ শৈলেন্দ্ৰ সৰকাৰে বিনা প্ৰতিদ্বন্দ্বিতাৰে বিজয়ী হোৱাৰ পৰিপ্ৰেক্ষিতত এইবেলি ২৪ টা ৱাৰ্ডত নিৰ্বাচন অনুষ্ঠিত হৈছিল।আসন বুজাবুজিৰ ক্ষেত্ৰত অগপই বিজেপি দলক গুৰুত্ব নিদি কেৱল পাঁচটা ৱাৰ্ডহে বিজেপি দলক এৰি দিবলৈ বিচৰাত ক্ষুদ্ধ হৈ পৰা বিজেপি দলে অকলশৰীয়াকৈ নিৰ্বাচন খেলাৰ সিদ্ধান্ত গ্ৰহণ কৰি ২৪ টা ৱাৰ্ডত প্ৰাৰ্থী প্ৰক্ষেপ কৰে ৷ প্ৰথম অৱস্থাৰ পৰাই যুদ্ধংদেহী মনোভাৱেৰে নিৰ্বাচনী ৰণত নামি পৰা বিজেপি দলে অৱশেষত অগপক হৰুৱাই পৌৰসভা দখল কৰি নিজৰ শক্তি দেখুওৱাৰ লগতে দলটোক গুৰুত্ব নিদিয়াৰ প্ৰতিশোধ পূৰণ কৰে৷ আজি ঘোষিত ফলাফল অনুসৰি বিজেপি দলে  লাভ কৰা মুঠ ১৩ খন আসনৰ ভিতৰত ২ নম্বৰ ৱাৰ্ডত সৰস্বতী সৰকাৰ , ৬ নম্বৰ ৱাৰ্ডত শম্পা দাস, ৭ নম্বৰ ৱাৰ্ডত নিবেদীতা সৰকাৰ, ৮ নম্বৰ ৱাৰ্ডত ডলী পাঠক,  ৯ নম্বৰ ৱাৰ্ডত চিত্তৰঞ্জন সৰকাৰ, ১০ নম্বৰ ৱাৰ্ডত স্বপন ঘোষ,  ১১ নম্বৰ ৱাৰ্ডত স্বপ্না দাস, ১২ নম্বৰ ৱাৰ্ডত তুলসী ঘোষ, ১৩ নম্বৰ ৱাৰ্ডত জয়শ্ৰী বৰদলৈ, ১৪ নম্বৰ ৱাৰ্ডত কবিতা ৰায়,  ১৬ নম্বৰ ৱাৰ্ডত সুবোধ চন্দ্ৰ দাস, ১৭ নম্বৰ ৱাৰ্ডত মহিলা বৰ্মন আৰু ২৫ নম্বৰ ৱাৰ্ডত অৰ্পণা ভৌমিকে অগপ দলৰ প্ৰাৰ্থীসকলক পৰাজিত কৰি বিজয়ী হৈছে ৷ আনহাতে অগপ দলে লাভ কৰা ১১খন আসনৰ ভিতৰত ১ নম্বৰ ৱাৰ্ডত অভিজিৎ ৰায়,৩ নম্বৰ ৱাৰ্ডত বিধুভূষণ সৰকাৰ, ৫ নম্বৰ ৱাৰ্ডত খৰ্গেশ্বৰ ৰায়, ১৫ নম্বৰ ৱাৰ্ডত গৌতম বিশ্বাস, ১৮ নম্বৰ ৱাৰ্ডত অলিভিয়া ৰায়, ১৯ নম্বৰ ৱাৰ্ডত সমিত দাস, ২০ নম্বৰ ৱাৰ্ডত অঞ্জুমণি পাটগিৰী কলিতা, ২১ নম্বৰ ৱাৰ্ডত ধনঞ্জয় ৰায়, ২২ নম্বৰ ৱাৰ্ডত নীলেশ্বৰ বৰ্মন, ২৩ নম্বৰ ৱাৰ্ডত শৈলেন্দ্ৰ সৰকাৰ ( বিনা প্ৰতিদ্বন্দ্বিতাৰে বিজয়ী) আৰু ২৪ নম্বৰ ৱাৰ্ডত হিৰু বাগ্দী বিজয়ী হৈছে ৷ ইপিনে ৪ নম্বৰ ৱাৰ্ডৰ পৰা পুনৰ বিজয়ী হৈছে কংগ্ৰেছ দলৰ প্ৰাৰ্থী ৷ ৱাৰ্ডটোৰ পৰা কংগ্ৰেছ দলৰ প্ৰাৰ্থী মাম্পী ঘোষ বিজয়ী হৈছে ৷ উল্লেখ্য যে বঙাইগাঁও জিলা উপায়ুক্ত কাৰ্যালয় প্ৰাংগণত হোৱা ভোট গণনাৰ ঘোষিত ফলাফল যেতিয়াই বিজেপিৰ পক্ষত যায় তেতিয়াই গান্ধী ময়দানত সমবেত হৈ থকা বিজেপি নেতা- কৰ্মীসকল উৎফুল্লিত হৈ পৰে ৷ ভোট গণনা শেষ হোৱাৰ পিচতে বিজেপি দলৰ জিলা সভানেত্ৰী হিমানী অধিকাৰী, বিটিচিৰ স্বাস্থ্য বিভাগৰ কাৰ্যবাহী সদস্য অৰূপ কুমাৰ দেকে ধৰি নেতা- কৰ্মীসকল, বিজয়ী প্ৰাৰ্থী তথা প্ৰাৰ্থীসকলৰ সমৰ্থকসকলে গালে - মুখে আবিৰ সানি, ফটকা ফুটাই তথা ড্ৰাম বজাই নাচি বাগি আনন্দত আত্মহাৰা হৈ পৰে ৷ লগতে গান্ধী ময়দানৰ পৰা বৰপাৰাস্থিত জিলা বিজেপিৰ কাৰ্যালয়লৈ সমদল কৰি আহে ৷ গোটেই পথচোৱাত বিজেপি জিন্দাবাদ আদি বিভিন্ন শ্লোগান দি পৰিৱেশ উত্তাল কৰি তোলে ৷ বিজেপিৰ বিজয়ীৰ হৰ্ষোল্লাসত যেন কঁপি উঠিল অগপৰ ভেঁটি ৷ জিলা বিজেপিৰ কাৰ্যালয়তো একেই পৰিৱেশ ৷ কাৰণ বিজেপি দলে প্ৰথমবাৰৰ বাবে বঙাইগাঁৱত খোপনি পুতিবলৈ সক্ষম হোৱাটো দলটোৰ বাবে হৈ পৰিছে আনন্দৰ বতৰা ৷ এই ফলাফলৰ পিচতে আগলৈ দলটোৱে বঙাইগাঁও বিধান সমষ্টিটোও যে দখলৰ বাবে উঠি পৰি লাগিব সেয়াও ইংগিত দিছে দলৰ নেতা - কৰ্মীসকলে ৷ 

ইপিনে এই ফলাফলৰ পিচতে বঙাইগাঁও অগপ কাৰ্যালয়ত বিৰাজ কৰিছে নিমাও মাও পৰিৱেশ ৷ আঞ্চলিকতাবাদী ৰাজনীতিৰ দুৰ্গত বিজেপিৰ এই মোক্ষম আঘাতক বিধায়ক ফণীভূষণ চৌধুৰীয়ে অনাগত দিনত কি দৰে গ্ৰহণ কৰি ৰণ কৌশল প্ৰস্তুত কৰি ভেঁটা দিবলৈ চেষ্টা কৰে, সেয়া হ'ব লক্ষণীয় ৷ কিন্তু আজিৰ দিনটোত বিজেপিয়ে বঙাইগাঁৱত নিজৰ শক্তি দেখুৱাবলৈ সক্ষম হ'ল আৰু বিজেপিক বিধায়ক ফণীভূষণ চৌধুৰীয়ে যে ৰুধিব নোৱাৰিলে সেয়া প্ৰমাণিত হ'ল ৷ আনহাতে ১১ টা ৱাৰ্ডযুক্ত অভয়াপুৰী পৌৰসভাও দখল কৰিলে বিজেপিয়ে ৷ বিজেপিয়ে ৮ খন, অগপই ২ খন আৰু কংগ্ৰেছ দলে লাভ কৰিছে ১ খন আসন ৷  ইপিনে বিজেপিৰ তৰফৰ পৰা জানিবলৈ দিয়া মতে কংগ্ৰেছ আৰু অগপ দলৰ তিনিগৰাকী বিজয়ী প্ৰাৰ্থীয়েও বিজেপিক সমৰ্থন আগবঢ়োৱাৰ বাবে যোগাযোগ কৰি আছে ৷ জিলা বিজেপিৰ  সভানেত্ৰী হিমানী অধিকাৰীয়ে জানিবলৈ দিয়া মতে বঙাইগাঁও পৌৰসভা নিৰ্বাচনত কংগ্ৰেছ দলৰ পৰা বিজয়ী হোৱা ৪ নম্বৰ ৱাৰ্ডৰ একমাত্ৰ প্ৰাৰ্থীগৰাকীৰ লগতে অগপৰ দুগৰাকী প্ৰাৰ্থীয়ে বিজেপি দলক সমৰ্থন আগবঢ়োৱাৰ সম্ভাৱনা আছে আৰু আলোচনা চলি আছে ৷ অতি কম সময়ৰ ভিতৰতে এই বিষয়টো চূড়ান্ত হ'ব ৷ যদিহে এয়া হয় তেন্তে পৈৰসভাত শক্তি বৃদ্বি পাব বিজেপিৰ ৷🔯