🔯বঙাইগাঁৱত কংগ্ৰেছৰ প্ৰতিবাদী কাৰ্যসূচী🔯

🔯বঙাইগাঁৱত কংগ্ৰেছৰ প্ৰতিবাদী কাৰ্যসূচী🔯 

🔯গুজৰাটৰ দলিত সম্প্ৰদায়ৰ নেতা তথা  কংগ্ৰেছ দলৰ বিধায়ক জিগনেশ মেৱানীক বিনাচৰ্তে মুক্তিৰ দাবী🔯 

🔯বিধায়কগৰাকীক পৰিকল্পিতভাৱে গ্ৰেপ্তাৰ কৰি গুজৰাটত কংগ্ৰেছৰ উত্থানক অৱনমিত কৰাৰ চেষ্টা চলাই আছে- দুই কংগ্ৰেছ বিধায়কৰ অভিযোগ🔯

📝বঙাইগাঁওঃ ২৮ এপ্ৰিলঃ গুজৰাটৰ দলিত সম্প্ৰদায়ৰ নেতা তথা  কংগ্ৰেছ দলৰ বিধায়ক জিগনেশ মেৱানীক অসাংবিধানিক ভাৱে গ্ৰেপ্তাৰৰ প্ৰতিবাদত তথা গণতন্ত্ৰ ৰক্ষা কৰা, ক্ষমতাৰ অপব্যৱহাৰ বন্ধ কৰা আৰু অতিশীঘ্ৰে  বিনাচৰ্তে মুকলি কৰি দিয়াৰ দাবীত বঙাইগাঁও জিলা কংগ্ৰেছে বৃহস্পতিবাৰে বঙাইগাঁও জিলা কংগ্ৰেছ কাৰ্যালয়" ৰাজীৱ ভৱন"ৰ সন্মুখত  এক প্ৰতিবাদ কাৰ্যসূচী গ্ৰহণ কৰে ৷ উত্তৰ অভয়াপুৰী সমষ্টিৰ বিধায়ক আব্দুল বাতিন খন্দকাৰ, দক্ষিণ অভয়াপুৰী সমষ্টিৰ বিধায়ক প্ৰদীপ সৰকাৰে অংশগ্ৰহণ কৰা প্ৰতিবাদী কাৰ্যসূচীত কংগ্ৰেছৰ নেতা -কৰ্মীসকলে মোদী চৰকাৰৰ অত্যাচাৰী শাসন বন্ধ কৰক, মিছা কথাত গোচৰ দিয়া নচলিব, মোদী চৰকাৰ হায় হায়, হিমন্ত বিশ্ব মুৰ্দাবাদ, অসম চৰকাৰ নিপাত যাওক, নৰেন্দ্ৰ মোদী গ' বেক, দলিত নেতা জেগনেশ মেৱানীক মুকলি কৰি দিয়ক, বাক স্বাধীনতা হৰণ কৰা নচলিব, গণতন্ত্ৰ ৰক্ষা কৰক আদি বিভিন্ন শ্লোগান দি প্ৰতিবাদ সাব্যস্ত কৰে ৷ ইপিনে প্ৰতিবাদী কাৰ্যসূচীত অংশগ্ৰহণ কৰা উত্তৰ অভয়াপুৰী বিধান সভা সমষ্টিৰ বিধায়ক আব্দুল বাতিন খন্দকাৰে সংবাদ মাধ্যমৰ আগত কয় যে কেন্দ্ৰ আৰু ৰাজ্যত যি বিজেপি চৰকাৰ চলি আছে তেওঁলোকে সংবিধানৰ নামত শপত খাই চৰকাৰ গঠন কৰিছে যদিও ভাৰতৰ সংবিধানক নাকচ তথা ধূলিসাৎ কৰাৰ বাবে অহৰহভাৱে চেষ্টা চলাই আছে সংবিধান প্ৰদত্ত বাক স্বাধীনতাক খৰ্ব কৰি ৷ আমাৰ ইয়াত শিলাদিত্য, সত্যৰঞ্জন বৰাকে ধৰি  কিছুমান মানুহ আছে, তেওঁলোকে কিমান বেয়া বেয়া কথা কয় ৷ কিন্তু তেওঁলোকৰ বিৰুদ্ধে মুখ্যমন্ত্ৰীৰ ব্যৱস্থা লোৱাৰ সময় নাই ৷ গুজৰাটৰ কোনোবা এজনে কিবা এটা টুইটাৰত লিখিছে কোৱাও নাই, তাকে লৈ তেওঁ ইমানে সৰৱ হৈ গ'ল যে গুজৰাটৰ পৰা গ্ৰেপ্তাৰ কৰি লৈ আহিবলগীয়া হ'ল ৷ সংবিধানক আপুনি সন্মান কৰা শিকক ৷ আপুনি সাংবিধানিক পদত আছে, সংবিধানৰ নামত শপত খাই আছে ৷ সংবিধানে আমাক যি বাক স্বাধীনতাৰ অধিকাৰ দিছে সেয়া ৰক্ষা কৰক ৷ আপুনি সংবিধানৰ বিৰুদ্ধে গৈ যি কাম কৰিব আমি কংগ্ৰেছ দলে তাৰ প্ৰতিবাদ কৰিমেই ৷ ক্ষমতা চিৰস্থায়ী নহয় ৷ যিদিনাখন আপুনি ক্ষমতাৰ পৰা যাব যাতে এই সমাজৰ পৰিৱেশ এনেকুৱা ৰচনা কৰি নাযায় যে আপোনাৰ ওপৰতে আকৌ বেলেগ চৰকাৰে আহি এনেকুৱা ধৰণৰ পদক্ষেপ ল'বলৈ বাধ্য হয় ৷ গতিকে তেওঁক আমি অনুৰোধ জনাইছো তেওঁ যাতে সংবিধানত যিবিলাক বাক স্বাধীনতাই কওক, গণতান্ত্ৰিক অধিকাৰে কওক আমাৰ যিবিলাক মৌলিক অধিকাৰ আছে সেইবোৰ ব্যক্তি এজনে পালন কৰাৰ ক্ষেত্ৰত বা উপভোগ কৰাৰ ক্ষেত্ৰত যাতে তেওঁ কোনো ধৰণে বাধা আৰোপ নকৰে ৷ বিধায়কগৰাকীয়ে লগতে কয় যে জিগনেশ মেৱানী হ'ল এগৰাকী দলিত নেতা ৷ বিজেপি চৰকাৰ দলিত, অনুসূচিত জাতি, অনুসূচিত জনজাতি, সংখ্যালঘু বিৰোধী ৷ কিন্তু গুজৰাটৰ পৰা এজন দলিত নেতাক গ্ৰেপ্তাৰ কৰি আনি পুনৰ তাক প্ৰমাণ কৰিলে ৷ বিধায়ক জিগনেশ মেৱানীৰ গুজৰাটত এটা প্ৰভাৱ আছে ৷ গুজৰাটত নিৰ্বাচন আহি আছে ৷ বিজেপিৰ অৱস্থা বেয়া ৷ গতিকে এই নেতাগৰাকীক যদি গ্ৰেপ্তাৰ কৰি দূৰত ৰখা হয় তাৰ বাবে এটা সুপৰিকল্পিতভাৱে এনে কৰা হৈছে ৷ দলিতসকলে বিজেপি চৰকাৰক বেয়া পায় আৰু সেই দলিত ভোটখিনি যাতে একগোট কৰি জিগনেশ মেৱানীয়ে কংগ্ৰেছৰ পক্ষত ভোটদান কৰাব নোৱাৰে তাৰ বাবে এটা সুপৰিকল্পিত ব্যৱস্থা হিচাপে তেওঁক গ্ৰেপ্তাৰ কৰি গুজৰাটৰ পৰা অসমলৈ লৈ অহা হৈছে ৷ 

 দক্ষিণ অভয়াপুৰী বিধান সভা সমষ্টিৰ বিধায়ক প্ৰদীপ সৰকাৰে কয় যে সাধাৰণ টুইটৰ কাৰণে যে এনেকুৱা পৰিস্থিতি হ'ব আমি ভবা নাছিলো ৷ বিগত সময় চোৱাত বিজেপি চৰকাৰৰ মন্ত্ৰী - বিধায়কসকলে ইয়াতকৈ ভয়াৱহ মন্তব্য কৰিছে ৷ তেনেক্ষেত্ৰত তেওঁলোককো গ্ৰেপ্তাৰ কৰিব লাগিছিল ৷ ব্যৱস্থা গ্ৰহণ কৰিব লাগিছিল চৰকাৰে ৷ কিন্তু তেওঁলোকৰ ক্ষেত্ৰত বিজেপি চৰকাৰে তেনেকুৱা পদক্ষেপ লোৱা নাই ৷ অতি লজ্বাজনক কথা যে গুজৰাটৰ এজন দলিত সম্প্ৰদায়ৰ বিধায়কগৰাকীয়ে সাধাৰণ এটা টুইট কৰিছিল আৰু টুইটটো ডিলিটো কৰিছে ৷ কিন্তু সেই টুইটৰ বিৰুদ্ধে অসম চৰকাৰে কোকৰাঝাৰ আৰক্ষীক গুজৰাটলৈ পঠিয়াই গ্ৰেপ্তাৰ কৰি আনিলে আৰু তাৰ পিচত বিধায়কগৰাকী জামিন পালে যদিও আন এটা গোচৰত বৰপেটা আৰক্ষীয়ে গ্ৰেপ্তাৰ কৰিলে ৷ আকৌ শুনি আছো যে ইয়াৰ পিচত গোৱালপাৰা আৰক্ষীয়েও গ্ৰেপ্তাৰ কৰিব ৷ তাৰ মানে এইটো এটা পৰিকল্পিত ৷ ইয়াৰ এটাই কাৰণ যে গুজৰাটৰ নিৰ্বাচন আহি আছে আৰু সেই নিৰ্বাচনৰ প্ৰতি লক্ষ্য ৰাখি এই পদক্ষেপ ল'বলৈ বিজেপি চৰকাৰ বাধ্য হৈছে ৷ কাৰণ বিগত গুজৰাট বিধান সভা নিৰ্বাচনত কংগ্ৰেছ দলে ভাল প্ৰতিদ্বন্দ্বিতা আগবঢ়াইছিল ৷ অলপৰ কাৰণে চৰকাৰ গঠন কৰিব নোৱাৰিলে ৷ এইবেলি গুজৰাটৰ সৰ্বসাধাৰণ ৰাইজ কংগ্ৰেছমুখী হৈছে ৷ বিশেষকৈ দলিত সম্প্ৰদায়ৰ লোকসকল কংগ্ৰেছমুখী হৈছে ৷ জিগনেশ মেৱানী হ'ল গুজৰাটৰ দলিত সম্প্ৰদায়ৰ এজন দক্ষ নেতা আৰু ভাল প্ৰভাৱ আছে ৷ সেয়ে চক্ৰান্তমূলকভাৱে তেওঁক নিৰ্বাচনৰ পৰা কেনেকৈ আতৰাই ৰাখিব পাৰে তাৰ বাবে এটাৰ পিচত আন এটা ভিত্তিহীন গোচৰ জাপি দি আগন্তুক গুজৰাটৰ নিৰ্বাচনত যাতে তেওঁ প্ৰচাৰ চলাব নোৱাৰে গ্ৰেপ্তাৰ কৰি ৰাখিব বিচাৰিছে ৷ আমি এই কাৰ্যক চৰকাৰক ধিক্কাৰ দিছো আৰু বিনাচৰ্তে মুকলি কৰি দিব লাগে বুলি দাবী জনায় ৷ বিধায়কদ্বয়ে গুজৰাটৰ দলিত সম্প্ৰদায়ৰ নেতা তথা  কংগ্ৰেছ দলৰ বিধায়ক জিগনেশ মেৱানীক অসম আৰক্ষীয়ে এক পৰিকল্পিতভাৱে গ্ৰেপ্তাৰ কৰি গুজৰাটত কংগ্ৰেছৰ উত্থানক অৱনমিত কৰাৰ চেষ্টা চলাই আছে বুলি অভিযোগ কৰি দলিত সম্প্ৰদায়ৰ নেতাগৰাকীক অতিশীঘ্ৰে মুক্তি কৰি দিবলৈ দাবী জনায়৷ প্ৰতিবাদী কাৰ্যসূচীত জিলা কংগ্ৰেছৰ সভাপতি মৃণাল অধিকাৰী, মহিলা কংগ্ৰেছৰ সভানেত্ৰী সাৰদা ৰায় চৌধুৰী, প্ৰদেশ কংগ্ৰেছৰ সম্পাদক জ্যোতিৰ্ময় বৈশ্যকে ধৰি নেতা- কৰ্মীসকল উপস্থিত থাকে ৷🔯