🔯বঙাইগাঁৱত 'কিষাণ ভাগীদাৰী প্ৰাথমিকতা হামাৰী' কাৰ্যসূচী সন্দৰ্ভত কৃষি বিভাগৰ সংবাদ মেল🔯

🔯বঙাইগাঁৱত 'কিষাণ ভাগীদাৰী প্ৰাথমিকতা হামাৰী' কাৰ্যসূচী  সন্দৰ্ভত  কৃষি বিভাগৰ সংবাদ মেল🔯

🔯কাইলৈ জিলাখনৰ প্ৰতিখন গাঁও পঞ্চায়ততে অনুষ্ঠিত হ'ব গাঁও সভা🔯 

📝বঙাইগাঁওঃ ২৩ এপ্ৰিলঃ আজাদী কা অমৃত মহোৎসৱৰ লগত সংগতি ৰাখি ভাৰত চৰকাৰৰ 'কিষাণ ভাগীদাৰী প্ৰাথমিকতা হামাৰী' কাৰ্যসূচী উপলক্ষে বঙাইগাঁও জিলাটো কৃষি বিভাগৰ উদ্যোগত পি এম কিষাণ হিতাধিকাৰীসকলক কৃষক ঋণ পত্ৰ ( কে চি চি ) প্ৰদানৰ বাবে কাইলৈৰ পৰা ১ মে লৈকে এক সজাগতা কাৰ্যসূচী অনুষ্ঠিত হ'ব ৷ শনিবাৰে বঙাইগাঁও জিলা কৃষি বিষয়াৰ কাৰ্যালয়ত অনুষ্ঠিত এখন সংবাদ মেলত জিলা কৃষি বিষয়া অমৃতলাল নাৰ্জাৰীয়ে এই কথা জনায় ৷ সংবাদ মেলত জিলা কৃষি বিষয়া নাৰ্জাৰীয়ে জানিবলৈ দিয়া মতে 'কিষাণ ভাগীদাৰী প্ৰাথমিকতা হামাৰী' কাৰ্যসূচীৰ অধীনত জিলাখনৰ পি এম কিষাণ হিতাধিকাৰীকলক সজাগ কৰাৰ লগতে কৃষক ঋণ পত্ৰ  প্ৰদানৰ দ্ৰুত প্ৰচাৰৰ উদ্দেশ্যে জিলাখনৰ ৬৫ টা গাঁও পঞ্চায়ত কাৰ্যালয়ত ২৪ এপ্ৰিলত জিলা কৃষি বিভাগৰ ফালৰ পৰা এখনকৈ গাওঁসভা অনুষ্ঠিত কৰা হ'ব । ইতিমধ্যে জিলা কৃষি বিষয়াই পি এম কিষাণ আঁচনিৰ উপযুক্ত তথা বৈধ হিতাধিকাৰীসকলৰ তালিকা সংশ্লিষ্ট খণ্ড উন্নয়ন বিষয়া,  এল ডি এম আৰু নাবাৰ্ডৰ ডি ডি এম লৈ প্ৰেৰণ কৰিছে ৷ ইয়াৰ পিচতে সংশ্লিষ্ট খণ্ড উন্নয়ন বিষয়াই প্ৰেৰিত হিতাধিকাৰীৰ তালিকাখন গাঁও পঞ্চায়ত ভিত্তিত যুগুত কৰি পঞ্চায়ত সচিবসকললৈ কাৰ্যকৰী কৰণাৰ্থে প্ৰেৰণ কৰিব ৷ কৃষি বিভাগৰ বিষয়া তথা কৰ্মচাৰীসকলক ইতিমধ্যে এই অভিযান সাফল্যমণ্ডিত কৰি তুলিবলৈ উক্তদিনা প্ৰতিখন গাঁও পঞ্চায়তৰ লগত সংলগ্ন কৰা হৈছে ৷ এই গাঁও সভাৰ বাবে বৰপেটা লোক সভা সমষ্টিৰ সাংসদৰ লগতে বঙাইগাঁও জিলাৰ তিনিওটা বিধানসভা সমষ্টিৰ বিধায়ককেইগৰাকীক আমন্ত্ৰণ জনাইছে৷ জিলা কৃষি বিষয়াগৰাকীয়ে জানিবলৈ দিয়া মতে এই উলক্ষে জিলা খনৰ চক্ৰভৌম গাঁও পঞ্চায়তৰ গাঁও সভাত বৰপেটা লোক সভা সমষ্টিৰ সাংসদ আব্দুল খালেক,  মূলাগাঁও গাঁও পঞ্চায়তত বঙাইগাঁও বিধান সভা সমষ্টিৰ বিধায়ক ফণীভূষণ চৌধুৰী, পিৰাধৰা গাঁও পঞ্চায়তত দক্ষিণ অভয়াপুৰী বিধান সভা সমষ্টিৰ বিধায়ক প্ৰদীপ সৰকাৰ  আৰু নোৱাপাৰা গাঁও পঞ্চায়তত উত্ৰ অভয়াপুৰী বিধান সভা সমষ্টিৰ বিধায়ক আব্দুল বাতেন খণ্ডকাৰক আমন্ত্ৰণ জনাইছে ৷ সভাত সাংসদ তথা বিধায়কসকল উপস্থিত থাকিব নোৱাৰিলেও তেওঁলোকৰ  প্ৰতিনিধি উপস্থিত থাকিব বুলি জনায় কৃষি বিষয়াগৰাকীয়ে ৷

ইপিনে 'কিষাণ ভাগীদাৰী প্ৰথমিকতা  হামাৰী ' ৰ অধীনত ২৫ এপ্ৰিলৰ পৰা ১ মে লৈ অনুষ্ঠিত হ'ব 'ফচল বীমা পাঠশালা ' অভিযান ৷ প্ৰতিটো উন্নয়ন খণ্ড সামৰি  অনুষ্ঠিত হ'বলগীয়া ফচল বীমা পাঠশালা অভিযান সফল কৰি তুলিবলৈ  বঙাইগাঁও জিলা কৃষি বিষয়াই ইতিমধ্যে এগ্ৰিকালচাৰ  ইনচুৰেঞ্চ  কোম্পানী ইণ্ডিয়া লিমিটেড ( Agriculture Insurance Company India Ltd.) ৰ বিষয়াবৰ্গৰ লগত বিশদ আলোচনা কৰিছে  ৷ সেই অনুসৰি ২৫ এপ্ৰিলত জিলাখনৰ মাণিকপুৰ গাঁও পঞ্চায়তত, ২৬ এপ্ৰিলত কীৰ্তনপাৰা গাওঁ পঞ্চায়তত, ২৭ এপ্ৰিলত জিলাখনৰ গাঁও পঞ্চায়ত কাৰ্যালয়ত, ২৮ এপ্ৰিলত শংকৰঘোলা গাঁও পঞ্চায়তত, ২৯ এপ্ৰিলত টাপাট্টাৰী খণ্ড উন্নয়ন বিষয়াৰ কাৰ্যালয়ত,  ৩০ এপ্ৰিলত বিদ্যাপুৰ গাঁও পঞ্চায়তত আৰু ১ মে'ত বইটামাৰী গাঁও পঞ্চায়তত এই ফচল বীমা পাঠশালা অনুষ্ঠিত হ'ব ৷ উক্ত পাঠশালাত এগ্ৰিকালচাৰ  ইনচুৰেঞ্চ  কোম্পানী ইণ্ডিয়া লিমিটেডৰ বিষয়াই প্ৰধানমন্ত্ৰী ফচল বীমা যোজনাৰ শস্য বীমাকৰণৰ নীতি নিৰ্দেশনা, অৰ্হতা আৰু আবেদন প্ৰণালী সম্পৰ্কে বিভিন্ন দিশ কৃষকসকলক অৱগত কৰিব ৷ উল্লেখ্য যে ২৭ এপ্ৰিলত সমগ্ৰ দেশজুৰি কৃষকসকলৰ  সৈতে অন লাইনযোগে ভাৰতৰ প্ৰধানমন্ত্ৰীয়ে ফচল বীমা সম্পৰ্কে ভাৱ বিনিময় কৰিব ৷ এই ভাৱ বিনিময় অনুষ্ঠান বঙাইগাঁও জিলাৰ প্ৰতিটো গাঁও পঞ্চায়তৰ অন্তৰ্গত সমূহীয়া  সেৱা কেন্দ্ৰৰ যোগেদি  উপলব্ধ হ'ব ৷ এই সন্দৰ্ভত জিলা কৃষি বিভাগে যাৱতীয় কাৰ্যব্যৱস্থা হাতত লোৱা বুলিও জিলা কৃষি বিষয়াগৰাকীয়ে জানিবলৈ দিয়ে ৷ সংবাদ মেলত নাবাৰ্ডৰ জিলা প্ৰৱন্ধক আলাৰাম দেউৰী , লিড বেংকৰ জিলা প্ৰৱন্ধক হেমৎ  ইছলাৰী, উত্তৰ শালমাৰা মহকুমাৰ এচ ডি এ অ পৰেশ ৰায় আদি উপস্থিত থাকে🔯