🔯বিজেপি - অগপই মিলিজুলি গঠন কৰিলে বঙাইগাঁও পৌৰসভা🔯

🔯বিজেপি - অগপই মিলিজুলি গঠন কৰিলে বঙাইগাঁও পৌৰসভা🔯

🔯বিজেপিৰ পৌৰপতি,অগপৰ উপ পৌৰপতি🔯

 

🔯বিজেপিৰে মিত্ৰতা ওপৰতো আছে, তলতো আছে, এতিয়াও আছে আৰু ভৱিষ্যতেও থাকিব- ফণীভূষণ চৌধুৰী🔯

📝বঙাইগাঁওঃ ১২ এপ্ৰিলঃ দীৰ্ঘদিনীয়া জল্পনা - কল্পনাৰ অন্ত পেলাই অৱশেষত মঙলবাৰে বিজেপি আৰু অগপই মিলিজুলি গঠন কৰিলে বঙাইগাঁও পৌৰসভা ৷ বিজেপি দলৰ সুবোধ চন্দ্ৰ দাসক পৌৰপতি আৰু অগপ দলৰ শৈলেন্দ্ৰ সৰকাৰক উপ - পৌৰপতি হিচাপে নিৰ্বাচিত কৰি আনুষ্ঠানিকভাৱে বঙাইগাঁও পৌৰসভাখন গঠন কৰা হয় ৷ উল্লেখ্য যে বঙাইগাঁও পৌৰসভাৰ নৱ নিৰ্বাচিত আয়ুক্তসকলৰ শপত গ্ৰহণ অনুষ্ঠান মঙলবাৰে আয়োজন কৰা হয় ৷ বঙাইগাঁও পৌৰসভাৰ সভাকক্ষত বিধায়ক তথা পৌৰসভাৰ পদেন সদস্য ফণীভূষণ চৌধুৰী, জিলা উপায়ুক্ত ডাঃ এম এছ লক্ষ্মীপ্ৰিয়া, পৌৰসভা নিৰ্বাচনৰ দায়িত্বত থকা অতিৰিক্ত উপায়ুক্ত পংকজ চমুৱাৰ উপস্থিতিত অনুষ্ঠিত শপত গ্ৰহণ অনুষ্ঠানত ১৬ নম্বৰ ৱাৰ্ডৰ আয়ুক্ত  সুবোধ চন্দ্ৰ দাস আৰু ২৩ নম্বৰ ৱাৰ্ডৰ আয়ুক্ত শৈলেন্দ্ৰ সৰকাৰক পৌৰপতি আৰু উপ পৌৰপতি হিচাপে নিৰ্বাচিত কৰা হয় ৷ শপত গ্ৰহণ অনুষ্ঠানৰ আৰম্ভণিতে অনুষ্ঠানটো পৰিচালনাৰ বাবে অস্থায়ী সভাপতি হিচাপে বিজেপি দলৰ ১৩ নম্বৰ ৱাৰ্ডৰ আয়ুক্ত জয়শ্ৰী বৰদলৈক নিৰ্বাচন কৰা হয় ৷ ইয়াৰ পিচতে জিলা উপায়ুক্ত ডাঃ এম এছ লক্ষ্মীপ্ৰিয়াই অস্থায়ী সভাপতি জয়শ্ৰী বৰদলৈক শপত বাক্য পাঠ কৰায় ৷ আনহাতে সভাপতি বৰদলৈয়ে আন নৱ নিৰ্বাচিত আন ২৫ গৰাকী আয়ুক্তক শপত বাক্য পাঠ কৰোৱায় ৷ অনুষ্ঠানত জিলা প্ৰশাসন তথা পৌৰসভাৰ তৰফৰ পৰা নৱ নিৰ্বাচিত আয়ুক্তসকলক একোখন ফুলাম গামোচা, ডায়েৰী আৰু কলমেৰে আদৰণি জনোৱা হয় ৷ 

পিনে শপত গ্ৰহণ অনুষ্ঠানত নৱ নিৰ্বাচিত আয়ুক্তসকলক আদৰণি জনাই তেওঁলোকক উদ্দেশ্যি ৰখা বক্তব্যত বিধায়ক ফণীভূষণ চৌধুৰীয়ে কয় যে জনসাধাৰণে যিহেতু বহু আশা - আকাংক্ষাৰে জনপ্ৰতিনিধি হিচাপে নিৰ্বাচন কৰি পঠিয়াইছে, সেয়ে জনসাধাৰণৰ সেই আশা - আকাংক্ষাক যাতে বাস্তৱায়িক কৰিব পাৰি তাক গুৰুত্ব দিব লাগিব ৷ ইতিমধ্যে বিগত সময়ত কৰা কিছু কাম কাজে আমাক যথেষ্ঠখিনি আগবঢ়াই নিছে ৷ সেয়ে এই ধাৰাটো আমি অব্যাহত ৰাখিব লাগিব ৷ তাৰ বাবে আমি ব্যতিক্ৰমী কাম কাজ কৰিব লাগিব আন পৌৰসভাতকৈ ৷ বিধায়কগৰাকীয়ে লগতে কয় যে মই বিধায়ক হিচাপে নিৰ্বাচিত হোৱাৰ পূৰ্বে অগপ দলৰ ব্যক্তি আছিলো ৷ কিন্তু মই নিৰ্বাচিত হোৱাৰ পিচত অগপ দলৰ নিৰ্বাচিত প্ৰতিনিধি নহও ৷ মই হলো বঙাইগাঁও সমষ্ঠিৰ প্ৰতিনিধি ৷ ইয়াত বিভিন্ন ৰাজনৈতিক মতাদৰ্শৰ মানুহ থাকিব, বিভিন্ন অৰাজনৈতিক মতাদৰ্শৰ মানুহ থাকিব ৷ গতিকে মই তেনেকুৱা প্ৰতিজন মানুহৰে প্ৰতিনিধি ৷ গতিকে এই মনোভাৱটো আমি জনপ্ৰতিনিধিসকলে লোৱাতো উচিত ৷ ৱাৰ্ড এটাৰ কাম- কাজখিনি কৰোতে সকলোকৰে প্ৰতি সমান দৃষ্টি দি কৰিলেহে ৰাইজৰ আশা - আকাংক্ষাখিনি পূৰণ কৰিব পাৰিম ৷ আনহাতে জিলা উপায়ুক্ত ডাঃ এম এছ লক্ষ্মীপ্ৰিয়াই নিজৰ বক্তব্যত কয় বঙাইগাঁও পৌৰসভাৰ এখন মাষ্টাৰ প্লেন আছে ৷ সেয়ে আয়ুক্তসকলে মাষ্টাৰপ্লেনখনক ভিত্তি কৰি লৈহে উন্নয়ন কৰিব লাগিব ৷ এটা ৱাৰ্ডক উন্নয়ন কৰিবলৈ গৈ যাতে আন এটা ৱাৰ্জত সমস্যাৰ সৃষ্টি নহয় তাৰ প্ৰতি নৱ নিৰ্বাচিত আয়ুক্তসকলক আহ্বান জনায় ৷ বিজ্ঞানসন্মতভাৱে মাষ্টাৰপ্লেনখন তৈয়াৰ কৰা হৈছে বুলি কৈ চহৰৰ পৰিসৰ বৃদ্ধি হৈ আছে বুলিও কয় ৷ সেয়ে সকলোকে বঙাইগাঁও চহৰখন যাতে দেশৰ ভিতৰত এখন সুন্দৰ চহৰ হিচাপে পৰিগণিত হয় তাৰ আশা ব্যক্ত কৰে ৷ শপত গ্ৰহণ অনুষ্ঠানত জিলা বিজেপিৰ সভানেত্ৰী হিমানী অধিকাৰী, সাধাৰণ সম্পাদক শংকৰ বিশ্বাসকে ধৰি দলীয় নেতা- কৰ্মীৰ লগতে অগপ দলৰো নেতা - কৰ্মী উপস্থিত থাকে ৷ 

ইপিনে সংবাদ মাধ্যমৰ আগত বিধায়ক চৌধুৰীক পৌৰসভাত বিজেপি - অগপৰ মিত্ৰতা সন্দৰ্ভত প্ৰশ্ন কৰাত কয় যে বিজেপিৰে অগপৰ মিত্ৰতা আছিলেই ৷ পৌৰসভা নিৰ্বাচনত বুজাবুজিৰ নহল বাবে ইয়াত বেলেগে বেলেগে নিৰ্বাচন খেলিছো ৷ মিত্ৰতা ওপৰতো আছে, তলতো আছে, এতিয়াও আছে আৰু ভৱিষ্যতেও থাকিব ৷ ইয়াত আমি একেলগে আগবাঢ়িম আৰু বঙাইগাঁও চহৰখনক দেশৰ ভিতৰতে যাতে এখন সুন্দৰ চহৰ হিচাপে গঢ়ি তুলিব পাৰো তাৰ বাবে আমি নিশ্চয় চিন্তা চৰ্চা কৰিম ৷ আনহাতে নৱ নিৰ্বাচিত পৌৰপতি সুবোধ চন্দ্ৰ দাসে কয় যে তেওঁ বঙাইগাঁও চহৰৰ কৃত্ৰিম বানৰ সমস্যা সমাধান কৰা, ৱাৰ্ডসমূহৰ ৰাস্তা - ঘাটৰ উন্নয়ন কৰা, খোৱাপানীৰ সুব্যৱস্থা গঢ়ি তোলা আৰু পাৰ্কিঙৰ সমস্যা সমাধানত প্ৰথমে গুৰুত্ব প্ৰদান কৰিব বুলি কয় ৷ উল্লেখ্য যে বিজেপি আৰু অগপ দলে পৃথকে পৃথকে পৌৰসভা নিৰ্বাচনত অৱতীৰ্ণ হৈছিল যদিও পৌৰসভাখন মিলিজুলি গঠন কৰাত পৌৰসভা নিৰ্বাচনৰ সময়ত দুই দলৰ মাজত গঢ়ি উঠা শত্ৰুতা এতিয়া পুনৰ মিত্ৰতালৈ পৰ্যৱেক্ষিত হ'ল ৷ পিচে বিজেপিৰ নেতা - কৰ্মীসকল শীৰ্ষ নেতৃত্বৰ এই সিদ্ধান্তকলৈ উৎফুল্লিত নহয় ৷ বৰং নিৰাশহে হৈ পৰিছে ৷ কাৰণ ২৫ টা ৱাৰ্ডযুক্ত বঙাইগাঁও পৌৰসভাৰ ১৩ টা ৱাৰ্ড বিজেপিয়ে অকলেই দখল কৰি সংখ্যা গৰিষ্ঠতা লাভ কৰিছিল ৷ ফলত এককভাৱে বিজেপিয়ে পৌৰসভা গঠন কৰাৰ বাবে আগবাঢ়িছিল যদিও শেষ মুহূৰ্তত দলৰ নেতৃত্বৰ সিদ্ধান্তই দলৰ কৰ্মীসকলক নিৰাশ কৰে ৷ পৌৰসভা নিৰ্বাচনত বিজেপিয়ে ১৩ টা , অগপই ১১ টা আৰু কংগ্ৰেছে ১ টা ৱাৰ্ড  দখল কৰিছিল ৷ শপত গ্ৰহণ অনুষ্ঠানত ২৫ গৰাকী আয়ুক্তই উপস্থিত আছিল ৷ আনহাতে অভয়াপুৰী পৌৰসভা বিজেপি দলে অকেলে গঠন কৰে ৷ 🔯