🔯বঙাইগাঁৱত জেহাদী গ্ৰেপ্তাৰঃ বৰপেটাত আনচাৰুল্লাহ বাংলা টিমৰ সদস্যই বাহৰ পাতি দিছিল দুটা দলক প্ৰশিক্ষণ🔯

🔯বঙাইগাঁৱত জেহাদী গ্ৰেপ্তাৰঃ বৰপেটাত আনচাৰুল্লাহ বাংলা টিমৰ সদস্যই বাহৰ পাতি দিছিল দুটা দলক প্ৰশিক্ষণ🔯

🔯যোগীঘোপাৰ পলাতক হামিদুল ইছলামৰ গেৰেজত আৰক্ষীৰ অভিযান🔯 

🔯জেহাদ সম্পৰ্কীয় পুস্তিকা, সাতটা বেংক একাউণ্টৰ বহী আদি জব্দ🔯

📝বঙাইগাঁওঃ ২৪ এপ্ৰিলঃ ৰাজ্যখনৰ বিভিন্ন জিলাত ক্ৰমাৎ জেহাদী সংগঠনে নিজৰ কাৰ্য কলাপ বিস্তাৰ কৰাৰ বাবে যে উঠি পৰি লাগিছে সেয়া পোহৰলৈ আহিব ধৰিছে ৷ ৰাজ্যখনৰ  বৰপেটা জিলাৰ পিচত এইবাৰ বঙাইগাঁও জিলাতো জেহাদী সংগঠনে শ্লীপাৰ চেল গঠনৰ জৰিয়তে সাংগঠনিক কাৰ্য -কলাপ বিস্তাৰৰ বাবে লাগি পৰাৰ তথ্য পোহৰলৈ আহিছে ৷ কেৱল সেয়াই নহয় বৰং জেহাদী সংগঠনৰ সৈতে যোগাযোগ ৰক্ষা কৰি চলি আহিছে বিভিন্নজনে ৷ ত্ৰিপুৰাৰ আগৰতলাৰ পৰা বঙাইগাঁও আৰক্ষীয়ে নিজৰ জিম্মালৈ আনি ছয়দিন ধৰি জেৰা কৰা বাংলাদেশৰ নিষিদ্ধ সংগঠন আনচাৰুল্লাহ বাংলা টিম ( এবিটি) ৰ সদস্যৰ স্বীকাৰোক্তিত এই তথ্য পোহৰলৈ আহিছে ৷ আনচাৰুল্লাহ বাংলা টিমৰ সদস্যৰ স্বীকাৰোক্তিৰ ভিত্তিতে অৱশেষত বঙাইগাঁও আৰক্ষীয়ে জিলাখনৰ মাণিকপুুৰ থানাৰ অন্তৰ্গত ৩ নং ভাণ্ডাৰাৰ পৰা চৈয়দ আহমেদ ( ২৫)  নামৰ জেহাদী সংগঠনৰ সৈতে জড়িত যুৱকজনক গ্ৰেপ্তাৰ কৰিবলৈ সক্ষম হৈছে ৷ উল্লেখ্য যে ত্ৰিপুৰাৰ আগৰতলাৰ পৰা বঙাইগাঁও আৰক্ষীয়ে ১৮ এপ্ৰিলত নিজৰ জিম্মালৈ আনিছিল আনচাৰুল্লাহ বাংলা টিমৰ তিনি সদস্য ক্ৰমে  আব্দুল কাছেম, ইমৰাণ হুছেইন আৰু হামিদ আলীক ৷ বঙাইগাঁও আৰক্ষীয়ে ছয়দিনৰ বাবে নিজৰ জিম্মালৈ অনাৰ পিচতে বিগত ছয়দিন ধৰি অব্যাহত ৰখা মাৰাথান জেৰাত বহু তথ্য লাভ কৰিবলৈ সক্ষম হৈছে আৰক্ষীয়ে ৷ আজি বঙাইগাঁও জিলাৰ আৰক্ষী অধীক্ষক স্বপ্ননীল ডেকাই সংবাদ মেলত জানিবলৈ দিয়া  মতে আগৰতলাৰ পৰা বঙাইগাঁও আৰক্ষীৰ জিম্মালৈ অনা আনচাৰুল্লাহ বাংলা টিমৰ সদস্য ইমৰাণ হুছেইনে আৰক্ষীৰ জেৰাত বিভিন্ন তথ্য প্ৰকাশ কৰিছে ৷ জেহাদী ইমৰাণ হুছেইনে আৰক্ষীক দিয়া স্বীকাৰোক্তি অনুসৰি বিগত বৰ্ষৰ ডিচেম্বৰ মাহত আনচাৰুল্লাহ বাংলা টিমৰ সদস্যজনে অসমলৈ অহিছিল ৷ ইমৰাণ হুছেইনে ডিচেম্বৰ মাহত আগৰতলাৰ পৰা প্ৰথমে বৰপেটা জিলালৈ আহিছিল ৷ বৰপেটা জিলাত দুটাকৈ দলৰ প্ৰশিক্ষণ হৈছিল ৷ হাউলীৰ মাজৰ ঢাকালিয়াপাৰা নামৰ গাঁওখনত ৭ দিন বাহৰ পাতি থাকি প্ৰশিক্ষণ শিবিৰৰ জৰিয়তে জেহাদী কাৰ্য কলাপৰ বাবে শ্লীপাৰ চেল গঠনৰ বাবে নতুন সদস্যক প্ৰশিক্ষণৰ ব্যৱস্থা কৰিছিল ৷ ঢাকালিয়াপাৰাত দুটাকৈ দলক প্ৰশিক্ষণ দিয়া হৈছিল অতি গোপনে ৷ কিন্তু এই দুটা দলত কিমানজনকৈ সদস্য আছিল সেই বিষয়ে আৰক্ষীয়ে এতিয়াও সঠিত তথ্য লাভ কৰা নাই ৷ এই তথ্যখিনি ইতিমধ্যে বঙাইগাঁও আৰক্ষীয়ে বৰপেটা আৰক্ষীক যোগান ধৰিছে ৷ এই প্ৰশিক্ষণ শিবিৰত মূলত যুৱকসকলক জেহাদৰ প্ৰতি আকৰ্ষিত কৰাৰ বাবে বিভিন্ন প্ৰশিক্ষণ প্ৰদান কৰিছিল ৷ স্থানীয় যুৱককলৈ শ্লীপাৰ চেল গঠন কৰি প্ৰয়োজনত ব্যৱহাৰৰ বাবে সাজু কৰি তোলাই হৈছে এই প্ৰশিক্ষণৰ মূল উদ্দেশ্যে ৷ হাউলীৰ  ঢাকালিয়াপাৰা গাঁৱত  ইমৰাণ হুছেইনৰ লগতে বিভিন্নজন আহি সাত দিন ধৰি বাহৰ পাতি আছিল ৷ ইতিমধ্যে বৰপেটা আৰক্ষীয়ে দুজন ব্যক্তিক কৰায়ত্ত কৰিছে ৷ কিছুদিন পূৰ্বে বৰপেটা আৰক্ষীয়ে যি ৬ জনক কৰায়ত্ত কৰিছে , তাৰে দুজন ইয়াৰ লগত জড়িত আছিল বুলিও জানিবলৈ দিয়ে আৰক্ষী অধীক্ষকগৰাকীয়ে ৷ ইপিনে বৰপেটা জিলাৰ পৰা আনচাৰুল্লাহ বাংলা টিমৰ সদস্য৷ ইমৰাণ হুছেইনে বঙাইগাঁও জিলাত প্ৰৱেশ কৰি জিলাখনৰ মাণিকপুৰ থানাৰ অন্তৰ্গত ৩ নং ভাণ্ডাৰাৰ চৈয়দ আহমেদৰ ঘৰত দুদিনৰ আশ্ৰয় গ্ৰহণ কৰিছিল ৷ বঙাইগাঁও আৰক্ষীয়ে ইমৰাণ হুছেইনৰ স্বীকাৰোক্তিৰ ভিত্তিত চৈয়দ আহমেদ ( ২৫) ক শুকুৰবাৰে গ্ৰেপ্তাৰ কৰি দুদিনৰ বাবে আৰক্ষীৰ জিম্মালৈ আনি জেৰা কৰে ৷ চৈয়দ আহমেদৰ জোটাৰ দোকান আছে ৷ বঙাইগাঁও জিলাৰ ভাণ্ডাৰাত জেহাদী সদস্যজনে যাতে বিভিন্ন পক্ষৰ নজৰত নপৰে তাৰ বাবে আশ্ৰয় গ্ৰহণ কৰিছিল ৷ তাৰোপৰি  ভাণ্ডাৰৰ পৰা গ্ৰেপ্তাৰ কৰা চৈয়দ আহমেদ আৰু আগৰতলাৰ ইমৰাণ হুছেইন পূৰ্বৰে পৰা চিনাকী ৷ উত্তৰ প্ৰদেশৰ দেওবন্দত দুয়ো একেলগে পঢ়া - শুনা কৰিছিল ৷ সেই সূত্ৰে দুয়োৰে মাজত সম্পৰ্ক স্থাপন হৈছিল ৷ দুয়োৱে ৱাটচাপযোগে কথা বতৰা পতাৰ লগতে কিছুমান আপত্তিজনক নথি পত্ৰ আদান প্ৰদান কৰাৰো তথ্য লাভ কৰিছে আৰক্ষীয়ে ৷ চৈয়দ আহমেদে গোপনে আনচাৰুল্লাহ বাংলা টিমৰ সদস্য ইমৰাণ হুছেইনৰ সৈতে যোগাযোগ ৰাখি আহিছিল ৷ সেইদৰে জেহাদী সংগঠন আনচাৰুল্লাহ বাংলা টিমৰ সদস্যজনৰ স্বীকাৰোক্তিৰ ভিত্তিতে বঙাইগাঁও আৰক্ষীয়ে শনিবাৰে নিশা যোগীঘোপাত এক অভিযান চলায় ৷ বঙাইগাঁও জিলাৰ উপ আৰক্ষী অধীক্ষক মণিকান্ত চমুৱাৰ নেতৃত্বত ইতিমধ্যে পলাতক হৈ থকা আচামী হামিদুল ইছলামৰ গেৰেজত এই অভিযান চলায় ৷ হামিদুল ইছলামৰ গৃহত পূৰ্বে 'এনআইএ ৰ দলে অভিযান চলাইছিল যদিও গেৰেজত চলোৱা হোৱা নাছিল অভিযান ৷ বঙাইগাঁও আৰক্ষীয়ে পলাতক হৈ থকা হামিদুল ইছলামৰ গেৰেজত চলোৱা অভিযানত ধৰ্মীয়, আনচাৰ আৰু জেহাদ সম্পৰ্কীয় তিনিখন পুস্তিকা,ভাৰতীয় টেষ্ট বেংক, বন্ধন বেংক, এইছ ডি এফ চি বেংক, নৰ্থ ইষ্ট স্মল ফাইনেন্স বেংক,  মিলিজুলি আত্মসহায়ক গোটকে ধৰি ৬ টা বেংক একাউণ্টৰ বহী, আধাৰ কাৰ্ডকে ধৰি বিভিন্ন নথি - পত্ৰ জব্দ কৰে ৷ আৰক্ষীয়ে আৰু কিছু তথ্য লাভ কৰিছে যদিও সেইখিনি তদন্তৰ খাতিৰত প্ৰকাশ কৰাৰ পৰা বিৰত থাকে ৷

এজন সাধাৰণ মটৰ মেকানিকৰ ৭ টা কৈ বেংকৰ একাউণ্ট আৰু এনে ধৰণৰ নথি পত্ৰ ৰখাৰ যুক্তি নাথাকে বুলি কৈ আৰক্ষী অধীক্ষকগৰাকীয়ে বেংকৰ একাউণ্টসমূহ ভালকৈ পৰীক্ষা কৰি চোৱা হ'ব বুলি কয় ৷ এই বেংকৰ একাউণ্টৰ যোগেদি ক'ৰ ক'ৰ পৰা ধন আহিছে বা কিমান ধনৰ লেন - দেন হৈছে এই তথ্যসূহ পৰীক্ষা কৰিব আৰক্ষীয়ে ৷ উল্লেখ্য যে পলাতক হৈ থকা হামিদুল ইছলামৰ ঘৰ যোগীঘোপাৰ পাল্লীৰতলত ৷ আৰক্ষী অধীক্ষকগৰাকীয়ে লগতে কয় যে জেহাদী সংগঠনত অসমৰ স্থানীয় যুৱকক জড়িত কৰাৰ যিটো তেওঁলোকৰ ষড়যন্ত্ৰ সেইটো ইতিমধ্যে আৰম্ভ কৰিছে ৷ বৰপেটাতো স্থানীয় যুৱকক জেহাদী সংগঠন আনচাৰুল্লাহ বাংলা টীমৰ সৈতে জড়িত কৰা আৰম্ভ কৰিছে আৰু বঙাইগাঁও জিলাতো আৰম্ভ কৰিছে ৷ ইতিমধ্যে যোগীঘোপাৰ হামিদুল ইছলাম পলাতক হৈ আছে আৰু আমি বিচাৰি আছো ৷ হামিদুলক কৰায়ত্ত কৰিব পাৰিলে আৰু তথ্য পোহৰলৈ আহিব ৷ অৱশ্যে আৰক্ষী অধীক্ষকগৰাকীয়ে কয় যে বঙাইগাঁও জিলাৰ সৰ্বত্ৰ অঞ্চলতে জেহাদীয়ে খোপনী পুতিবলৈ সক্ষম হোৱা নাই ৷ কেৱল জিলাখনৰ কিছু স্পৰ্শকাতৰ অঞ্চলত সক্ৰিয়তা ধৰা পৰিছে ৷ তাৰ ভিতৰত ভাণ্ডাৰা, যোগীঘোপা অঞ্চল অন্যতম ৷ আৰু কিছু অঞ্চলৰ তথ্য লাভ কৰিছে যদিও সেয়া প্ৰকাশ কৰাৰ পৰা বিৰত থাকে আৰক্ষী অধীক্ষকগৰাকী ৷ লগতে পৰৱৰ্তী সময়ত আৰক্ষীয়ে তাৰ ওপৰত কাম কৰিব বুলিও জনায় ৷ কাৰণ এই সন্দৰ্ভত তদন্ত চলি থাকিব বুলিও কয় ৷ আৰক্ষী অধীক্ষকগৰাকীয়ে সংবাদ মেলত প্ৰকাশ কৰা মতে ইতিমধ্যে আগৰতলাৰ পৰা বঙাইগাঁও আৰক্ষীয়ে নিজৰ জিম্মালৈ অনা তিনি আনচাৰুল্লাহ বাংলা টিমৰ সদস্যৰ ছয় দিনৰ ম্যাদ আজি শেষ হৈছে আৰু জিম্মাত নলয় বুলিও কয় ৷ ইতিমধ্যে নিয়া, পশ্চিম বংগ আৰক্ষী, আই বি আদি তদন্তকাৰী সংস্থাৰ তৰফৰ পৰা তিনি আনচাৰুল্লাহ বাংলা টিমৰ সদস্যক সোধ -পোচ কৰি থকা বুলি জনায় ৷ ইপিনে ত্ৰিপুৰা আগৰতলাৰ পৰা বঙাইগাঁও আৰক্ষীয়ে নিজৰ জিম্মালৈ অনা তিনি আনচাৰুল্লাহ বাংলা টিমৰ সদস্য  আব্দুল কাছেম, ইমৰাণ হুছেইন আৰু হামিদ আলীৰ লগতে ভাণ্ডাৰাৰ পৰা গ্ৰেপ্তাৰ কৰা জেহাদী চৈয়দ আহমেদক আজি আদালতত হাজিৰ কৰোৱাত আদালতে চাৰিওজনকে জেল হাজোতলৈ প্ৰেৰণ কৰে ৷ উল্লেখ্য যে আনচাৰুল্লাহ বাংলা টিম ( এবিটি) বাংলাদেশৰ নিষিদ্ধ সংগঠন আৰু আল কায়দাৰে আছে সম্পৰ্ক ৷ এই সংগঠনটোৱে আল কায়দাৰ হৈ কাম কৰি আহিছে ৷ কিন্তু কিছুদিন পূৰ্বে ত্ৰিপুৰাত বঙাইগাঁও আৰক্ষীয়ে স্থানীয় আৰক্ষীৰ সহযোগত ৮ এপ্ৰিলত কৰায়ত্ত কৰিছিল আনচাৰুল্লাহ বাংলা টিমৰ তিনি সদস্য আব্দুল কাছেম, ইমৰাণ হুছেইন আৰু হামিদ আলীক ৷ জেহাদী সংগঠনটোৰ এইসকল সদস্যই বৰপেটা,  বঙাইগাঁও জিলাত বাহৰ পাতি থাকি জিলাখনত নিজৰ সাংগঠনিক ভেটি মজবুত কৰি তোলাৰ বাবে অতি গোপনে কাম কাজ চলাই গৈছিল ৷ বঙাইগাঁও আৰক্ষীয়ে ত্ৰিপুৰাত স্থানীয় আৰক্ষীৰ সহযোগত কৰায়ত্ত কৰা তিনি জেহাদীক যোগীঘোপা থানাত ৰুজু হোৱা ৫৬ / ২২ নং গোচৰৰ ভিত্তিত ছয়দিনৰ বাবে নিজৰ জিম্মালৈ আনি জেৰা আৰম্ভ কৰাৰ পিচতে এতিয়া পোহৰলৈ আহিছে জিলাখনটো যে জেহাদীয়ে গোপনে খোপনী পুতিবলৈ চেষ্টা কৰি আহিছে আৰু সাংগঠনিক ভেঁটি মজবুট কৰিবলৈ উঠি পৰি লাগিছে ৷ কিন্তু বৰপেটাত জেহাদী কৰায়ত্ত হোৱাৰ পিচতে সেইসকলৰ স্বীকাৰোক্তিত বঙাইগাঁও জিলাতো যে জেহাদী কাৰ্য - কলাপ চলি আছে সেয়া পোহৰলৈ আহে ৷ ফলত ততাতৈয়াকৈ এই জেহাদীৰ বিৰুদ্ধে অভিযানত নামি পৰিছে বঙাইগাঁও আৰক্ষী ৷🔯