🔯প্রধানমন্ত্ৰী নৰেন্দ্ৰ মোদী নেতৃত্বাধীন কেন্দ্ৰীয় চৰকাৰৰ জনকল্যাণমূলক আঁচনিয়ে দুখীয়া জনসাধাৰণৰ আৰ্থ-সামাজিক দিশত আমূল পৰিৱৰ্তন আনিছেঃ মন্ত্ৰী ৰণজিৎ কুমাৰ দাস🔯

🔯প্রধানমন্ত্ৰী নৰেন্দ্ৰ মোদী নেতৃত্বাধীন কেন্দ্ৰীয় চৰকাৰৰ জনকল্যাণমূলক আঁচনিয়ে দুখীয়া জনসাধাৰণৰ আৰ্থ-সামাজিক দিশত আমূল পৰিৱৰ্তন আনিছেঃ  মন্ত্ৰী ৰণজিৎ কুমাৰ দাস🔯

🔯বঙাইগাঁৱৰ কাৰণে নতুন পাষ্টাৰপ্লেন প্ৰস্তুত কৰাৰ সিদ্ধান্ত গ্ৰহণ কৰিছো

📝বঙাইগাঁওঃ ৩১ মে': প্রধানমন্ত্ৰী নৰেন্দ্ৰ মোদী নেতৃত্বাধীন কেন্দ্ৰীয় চৰকাৰে বিগত ৮ বছৰত ৰূপায়ণ কৰা জনকল্যাণ আঁচনি সমূহে দেশৰ আৰ্থ-সামাজিক উন্নয়নৰ দিশত আমূল পৰিৱৰ্তন আনিছে আৰু ইয়াৰ জৰিয়তে দেশৰ কোটি কোটি দুখীয়া-দৰিদ্ৰ জনসাধাৰণ উপকৃত হৈছে। কোনো যোগ্য হিতাধিকাৰীয়ে যাতে জনকল্যাণমূলক আঁচনিৰ সুফল লাভৰ পৰা বঞ্চিত নহয় সেয়া নিশ্চিত কৰাৰ বাবে চৰকাৰে ব্যৱস্থা লৈছে। আজি বঙাইগাঁৱত পঞ্চায়ত আৰু গ্ৰামোন্নয়ন, জনস্বাস্থ্য কাৰিকৰী, খাদ্য অসামৰিক যোগান আৰু গ্ৰাহক পৰিক্ৰমা, সাধাৰণ প্রশাসন বিভাগৰ মন্ত্ৰী ৰণজিৎ কুমাৰ দাসে এই মন্তব্য কৰে। উল্লেখ্য যে৷আজি হিমাচল প্ৰদেশৰ চিমলাত অনুষ্ঠিত ‘গৰিব কল্যাণ সন্মিলন’ৰ পৰা প্ৰধানমন্ত্ৰী নৰেন্দ্ৰ মোদীয়ে দেশব্যাপী জনকল্যাণমূলক আঁচনি সমূহৰ হিতাধিকাৰীসকলৰ সৈতে ভার্চুয়েলী মত-বিনিময় কৰিছিল। প্রধানমন্ত্ৰীৰ এই কাৰ্যসূচীৰ সৈতে ভার্চুয়েল মাধ্যমৰে সংযোগ কৰি দেশ তথা ৰাজ্যৰ অন্যান্য জিলাৰ লগতে বঙাইগাঁৱটো অনুষ্ঠিত হোৱা ‘গৰিব কল্যাণ সন্মিলন’ত মুখ্য অতিথিৰূপে অংশ গ্ৰহণ কৰি মন্ত্ৰী ৰণজিৎ কুমাৰ দাসে প্রধানমন্ত্ৰী নৰেন্দ্ৰ মোদী নেতৃত্বাধীন চৰকাৰে জনকল্যাণমূলক আঁচনি ৰূপায়ণৰ জৰিয়তে দেশৰ আৰ্থ-সামাজিক উন্নয়নৰ দিশত কেনেদৰে আমূল পৰিৱৰ্তন সাধন কৰিছে তাৰ আভাস দাঙি ধৰে। মন্ত্ৰী দাসে বৰ্তমানৰ কেন্দ্ৰীয় চৰকাৰৰ সফলতাৰ কেইটামান উদাহৰণ দাঙি ধৰি কয় যে দেশৰ ৯.৫ কোটিৰো অধিক পৰিয়ালক টেপৰ যোগেৰে বিশুদ্ধ খোৱা পানীৰ সংযোগ দিয়া হৈছে, পিএম কিষাণ সন্মান নিধি আঁচনিৰ অধীনত ১১.৭৮ কোটি কৃষকে বছৰি ৬ হেজাৰ টকাকৈ লাভ কৰিছে, প্রধানমন্ত্ৰী আৱাস যোজনাৰ অধীনত ৩ কোটিৰো অধিক পৰিয়ালে আৱাসগৃহ লাভ কৰিছে, মহিলা হিতাধিকাৰীলৈ ৯.১৭ কোটি ৰন্ধন গেছৰ সংযোগ, ক’ৰোণা মহামাৰীৰ সময়ত ২০ কোটিৰো অধিক মহিলালৈ আৰ্থিক সাহায্য আৰু ৮০ কোটি লোকলৈ বিনামূলীয়া ৰেচন আগবঢ়োৱা হৈছে। মন্ত্ৰী গৰাকীয়ে প্রধানমন্ত্ৰী সুৰক্ষা বীমা যোজনা, মুদ্রা যোজনা, উজ্জ্বলা যোজনা, আয়ুষ্মান ভাৰত, পিএম স্বনিধি আদি আঁচনিসমূহৰ জৰিয়তে দেশৰ কোটি কোটি হিতাধিকাৰী উপকৃত হোৱা বুলি সভাত কয় ৷ পঞ্চায়ত আৰু গ্ৰামোন্নয়ন বিভাগৰ মন্ত্ৰী দাসে অসমত প্ৰধানমন্ত্ৰী আৱাস যোজনা-গ্রামীণৰ কাম-কাজৰ এক আভাস দাঙি ধৰি কয় যে, বিগত ২০২১-২২ বিত্তীয় বৰ্ষত কেন্দ্রীয় চৰকাৰে ৰাজ্যখনক ১২ লাখ দুই হেজাৰ গৃহৰ অনুমোদন দিছিল। এনে গৃহৰ নিৰ্মাণৰ প্ৰক্ৰিয়া আৰম্ভ হৈছে আৰু ৫ লাখৰো অধিক হিতাধিকাৰীক প্রথম কিস্তিৰ পুঁজি প্ৰদান কৰা হৈছে। পিএমএৱাই-জিৰ বাবে এতিয়ালৈকে বর্তমানে ১২,৬৭৩ কোটি টকা পোৱা গৈছে বুলি মন্ত্ৰীগৰাকীয়ে সভাত কয় ৷ প্রধানমন্ত্ৰী আৱাস যোজনা-গ্রামীণৰ পুৰণি লক্ষ্যৰ ৭,৬৭,২২২ টা গৃহৰ ভিতৰত প্ৰায় ৫,৫০,০০০ টা গৃহৰ নিৰ্মাণ সম্পূৰ্ণ হোৱা বুলি উল্লেখ কৰি মন্ত্ৰী দাসে কয় যে, অহা আগষ্ট মাহৰ ভিতৰত বাকী অসম্পূৰ্ণ গৃহ সমূহ সম্পূৰ্ণ কৰি তোলা হ’ব। বঙাইগাঁও জিলাৰ প্ৰসংগ উল্লেখ কৰি মন্ত্ৰী দাসে কয় যে, প্রধানমন্ত্রী আৱাস যোজনা-গ্ৰামীণৰ অধীনত বঙাইগাঁও জিলাত পূৰ্বতে অনুমোদন পোৱা ১৫,০৪৮ টা গৃহৰ ইতিমধ্যে ১০৭৮৯ টা গৃহৰ নিৰ্মাণ সম্পূৰ্ণ হৈছে। তদুপৰি, জিলাখনে নতুনকৈ ৪৫,৯৫৫ টা প্ৰধানমন্ত্ৰী আৱাস যোজনা-গ্রামীণৰ গৃহৰ অনুমোদন পাইছে আৰু পৰ্যায়ক্রমে নিৰ্মাণ প্ৰক্ৰিয়া আৰম্ভ কৰা হৈছে। তেওঁ লগতে কয় যে, বঙাইগাঁৱত পিএমএৱাই-জিৰ ৬৬১ গৰাকী ভূমিহীন হিতাধিকাৰী আছে আৰু সম্প্ৰতি ইয়াৰে ৩১৮ টা এনে গৃহহীন পৰিয়ালক ৬ টা ক্লাষ্টাৰেৰে সামৰি লোৱা হৈছে ৷

ইয়াৰ গৃহ নিৰ্মাণৰ কামো শীঘ্ৰে আৰম্ভ হ'ব বুলি তেওঁ কয়। অসমৰ এনে ২৩ টা ক্লাষ্টাৰ ভিতৰত বঙাইগাঁৱতে সর্বাধিক ক্লাষ্টাৰ ৰূপায়ণ কৰা হ’ব বুলি মন্ত্ৰী দাসে সভাত উল্লেখ কৰে। উল্লেখ্য যে, আজিৰ অনুষ্ঠানত মন্ত্ৰী দাসে জিলাখনৰ কেইবাগৰাকী পিএমএৱাই-জিৰ হিতাধিকাৰীক আনুষ্ঠানিকভাৱে গৃহৰ অনুমোদন পত্ৰ প্ৰদান কৰে। হিমাচল প্ৰদেশৰ চিমলাৰ অনুষ্ঠানত প্ৰধানমন্ত্ৰী নৰেন্দ্ৰ মোদীয়ে প্ৰদান কৰা ভাষণ ভার্চুয়েল মাধ্যম যোগে আজিৰ সভাত উপস্থিত সকলোৱে চোৱা আৰু শুনাৰ সুযোগ পায়। আনহাতে, শিৱসাগৰ জিলাত অনুষ্ঠিত গৰিব কল্যাণ সন্মিলনত মুখ্যমন্ত্ৰী ড° হিমন্ত বিশ্ব শৰ্মাই দিয়া ভাষণো উপস্থিত ৰাইজে ভার্চুয়েল মাধ্যমৰ জৰিয়তে চোৱা আৰু শুনাৰ সুবিধা পায়। বঙাইগাঁও মহাবিদ্যালয়ৰ খেল পথাৰত অনুষ্ঠিত আজিৰ এই অনুষ্ঠানৰ আৰম্ভণিতে বঙাইগাঁও জিলাৰ উপায়ুক্ত নবদ্বীপ পাঠকে আদৰণি ভাষণ দিয়াৰ লগতে জিলাখনত ৰূপায়ণ কৰি থকা বিভিন্ন কেন্দ্ৰীয় আঁচনিৰ অধীনত দুখীয়া জনসাধাৰণে লাভ কৰা সুবিধাসমূহৰ এক চমু খতিয়ান দাঙি ধৰে। অনুষ্ঠানত প্ৰাক্তন মন্ত্ৰী তথা  বঙাইগাঁৱৰ বিধায়ক ফণীভূষণ চৌধুৰী, উত্তৰ অভয়াপুৰী সমষ্টিৰ বিধায়ক আব্দুল বাতিন খন্দকাৰ, পঞ্চায়ত আৰু গ্ৰামোন্নয়ন আয়ুক্ত বিক্ৰম কৈৰী, কৃষি বিভাগৰ আয়ুক্ত সচিব ওম প্রকাশ, বঙাইগাঁও জিলা পৰিষদৰ মুখ্য কাৰ্যবাহী বিষয়া নাদিৰা জেছমিন, বঙাইগাঁও জিলাৰ আৰক্ষী অধীক্ষক স্বপ্ননীল ডেকা, বঙাইগাঁও জিলা পৰিষদৰ সভাপতি বিজয় সিংহ, কমতাপুৰ স্বায়ত্ব শাসিত পৰিষদৰ মুখ্য কাৰ্যবাহী পাৰিষদ গকুল বৰ্মন, বঙাইগাঁও জিলা বিজেপিৰ সভানেত্ৰী হিমানী অধিকাৰী, বঙাইগাঁও পৌৰসভাৰ পৌৰপতি সুবোধ চন্দ্ৰ দাস, অভয়াপুৰী পৌৰসভাৰ পৌৰপতি ৰমেন্দ্ৰ নাৰায়ণ বনিক্য, পঞ্চায়ত আৰু গ্ৰামোন্নয়ন বিভাগৰ অতিৰিক্ত আয়ুক্ত ৰাতুল পাঠক আৰু প্ৰাক্তন বিধায়ক ভূপেন ৰয়কে ধৰি বিশিষ্ট নাগৰিক, জিলা প্ৰশাসনৰ বিষয়াসকল আৰু অন্যান্য লোক উপস্থিত থাকে ৷ 

ইপিনে অনুষ্ঠানৰ শেষত সংবাদ মাধ্যমৰ আগত মন্ত্ৰী ৰঞ্জিত কুমাৰ দাসে কয় যে দেশৰ প্ৰধানমন্ত্ৰী নেতৃত্বাধীন কেন্দ্ৰীয় চৰকাৰৰ আজি দ্বিতীয় কাৰ্যকালৰ তৃতীয় বৰ্ষপূতি ৷ তেওঁ কাৰ্যভাৰ গ্ৰহণ কৰাৰ পিচত দেশৰ দুখীয়া লোকসকলৰ কাৰণে যি কল্যাণময় আঁচনিৰ কাম কৰিলে সেই কাৰণে তেওঁ আজি গৰীব কল্যাণ সন্মিলনীৰ আয়োজন কৰিছিল ৷ এই সন্মিলন দেশৰ প্ৰতিখন জিলাৰ লগতে অসমৰো প্ৰতিখন জিলাত আমি এই অনুষ্ঠান আয়োজন কৰি যিসকল হিতাধিকাৰী আছে অথবা গৰীব লোক আছে তেওঁলোকক মাতি আনি তেওঁলোকৰ মনৰ কথা শুনিলো আৰু লগতে আমি প্ৰধানমন্ত্ৰী আৰু মুখ্যমন্ত্ৰীৰ লগতো পোনপটীয়া সংযোগ স্থাপন কৰিছো ৷ ইতিমধ্যে প্ৰধানমন্ত্ৰী নৰেন্দ্ৰ মোদীৰ নেতৃত্বত দেশত প্ৰধানমন্ত্ৰী আৱাস যোজনা , জল জীৱন আঁচনি, মুদ্ৰা লোনকে আদি কৰি বিভিন্ন আঁচনিৰ জৰিয়তে যিখিনি সফলতা লাভ কৰিলে, ইয়াৰ ফলস্বৰূপে ভাৰতবৰ্ষত পূৰ্বে দুখীয়া লোকৰ সংখ্যা যি ২২ শতাংশ আছিল সেয়া  বিভিন্ন জনকল্যাণমূলক আঁচনি ৰূপায়ণ কৰাৰ বাবে বৰ্তমান কমি ১২ শতাংশ হৈছে ৷ এই দহ শতাংশ কমি যোৱাৰ মূলত কাৰণ হ'ল সেই লোকসকল ৰাজ্য চৰকাৰ অথবা কেন্দ্ৰীয় চৰকাৰৰ পৰা উপকৃত হৈছে ৷ এইটো আমি আগন্তক দিনত নিৰলসভাৱে কৰি যাব লাগিব ৷ কাৰণ কিয়নো ভাৰতবৰ্ষত আমি এখন বৈষম্যহীন সমাজ, ধনী - দুখীয়াক এক কৰি এখন বৈষম্যহীন সমাজ গঢ়ি তুলিব লাগিব ৷ তেতিয়াহে আমি আগন্তুক দিনত ভাৰতবৰ্ষক ৰাষ্ট্ৰ গুৰু হিচাপে বা বিশ্ব গুৰু হিচাপে প্ৰতিষ্ঠা কৰিব পাৰিম ৷ তেনেকুৱা কৰিব লাগিলে ৰাজ্যৰ লগতে জিলাসমূহো আগুৱাই নিব লাগিব ৷ আমাৰ বঙাইগাঁও জিলাটো ইতিমধ্যে প্ৰধানমন্ত্ৰী আৱাস যোজনাৰ ১৫ হাজাৰ ঘৰ আৱণ্টত দিছিলো আৰু তাৰ ভিতৰত প্ৰায় ১১ হাজাৰ ঘৰ সম্পূৰ্ণ হৈছে  আৰু চাৰি হাজাৰ ঘৰৰ কাম চলি আছে ৷ ইয়াৰ উপৰিও বঙাইগাঁও জিলাত পুনৰ নতুনকৈ ৪৫,৯৫৫ টা ঘৰৰ অনুমোদন দিছো আৰু ইয়াৰ ভিতৰত ৬৭০০ হিতাধিকাৰীক এই অনুষ্ঠানৰ জৰিয়তে প্ৰথম কিস্তিৰ ধন মোকলাই দিছো ৷ আমি আশা ৰাখিছো যে আগন্তুক দিনত বঙাইগাঁও জিলাত প্ৰধানমন্ত্ৰী আৱাস যোজনা ,জল জীৱন মিছনকে আদি কৰি ভাৰত চৰকাৰৰ যিসমূহ আঁচনি আছে সেই আঁচনিৰ জৰিয়তে ৰাইজে উপকৃত হ'ব ৷ এই ক্ষেত্ৰত জনপ্ৰতিনিধিসকলে সহায় - সহযোগ কৰি আহিছে ৷ বঙাইগাঁৱৰ ক্ষেত্ৰত বিধায়ক ফনীভূষণ চৌধুৰী আৰু সমাজ সেৱক আদিয়ে সহায় - সহযোগ কৰি আছিল ৷ আগন্তুক দিনত বঙাইগাঁওখনত যাতে আগুৱাই নিব পাৰো তাৰ কাৰণে প্ৰয়াস ৰাখিছো আৰু সোমবাৰে বঙাইগাঁও পৌৰসভাৰ ৱাৰ্ড কমিচনাৰসকলৰ সৈতে বিধায়ক ফনীভূষণ চৌধুৰী আৰু জিলা উপায়ুক্তৰ উপস্থিতিত বৈঠকত মিলিত হৈ বঙাইগাঁৱৰ কাৰণে এখন নতুন পাষ্টাৰপ্লেন প্ৰস্তুত কৰাৰ কথা ভাবিছো ৷ পূৰ্বৰ যি মাষ্টাৰপ্লেন আছিল সেয়া প্ৰায় ২৫ বছৰ পুৰণি ৷ সেয়ে আমি নতুনকৈ মাষ্টাৰপ্লেন প্ৰস্তুত কৰাৰ কাৰণে সিদ্ধান্ত গ্ৰহণ কৰিছো🔯