🔯বঙাইগাঁৱত অসমৰ বিশিষ্ট লেখক-সাংবাদিক ভূপেন্দ্ৰ চন্দ্ৰ দাসৰ ওপজাদিন উদ্‌যাপন🔯

🔯বঙাইগাঁৱত অসমৰ বিশিষ্ট  লেখক-সাংবাদিক ভূপেন্দ্ৰ চন্দ্ৰ দাসৰ ওপজাদিন উদ্‌যাপন🔯

🔯সাংবাদিকসকল আশা, বিশ্বাস আৰু সমাজ গঢ়া খনিকৰ---অধ্যাপিকা ৰূপাঞ্জলী দেৱী🔯 

📝বঙাইগাঁওঃ ১৭ জুনঃ 'সাংবাদিক সকল আমাৰ সমাজ আৰু দেশৰ অতন্দ্ৰ প্ৰহৰীয়েই নহয় তেওঁলোক আশা,বিশ্বাস আৰু সমাজ গঢ়া খনিকৰ ৷ এসময়ত সাংবাদিকক চাবলৈ  সৰ্বসাধাৰণলোকৰ চকু পিটপিটাই ফুৰিছিল ৷ সাংবাদিক কেনেকুৱা, ক’ত থাকে আদি ভাৱধাৰাই বহুলোকক উদ্বিগ্ন কৰি ৰাখিছিল ৷ বোধকৰো সেইকাৰণেই সাংবাদিক সকলেও নিজৰ দায়িত্ব আৰু কৰ্তব্যবোধৰ প্ৰতি সজাগ-সচেতন হৈ জনসাধাৰণৰ চকুৰ পৰা নিজক লুকুৱাইহে ৰাখিছিল ৷ কিন্তু পৰিৱৰ্তিত পৰিস্থিতিত  ইয়াৰ এখন বিপৰীত ছবিহে প্ৰতিভাত হৈ উঠিছে ৷’ বৃহত্তৰ বঙাইগাঁও প্ৰেছ ক্লাব প্ৰেক্ষাগৃহত আজি অসমৰ এসময়ৰ সাংবাদিক তথা বৰ্তমান সময়ৰ চিন্তাশীল লিখক তথা ভাৰতীয় তথ্য সেৱাৰ অৱসৰপ্ৰাপ্ত জ্যেষ্ঠ তথ্য বিষয়া ভূপেন্দ্ৰ চন্দ্ৰ দাসৰ ৮৫ সংখ্যক ওপজা দিনৰ এক অন্তৰঙ্গ অনুষ্ঠানত মুখ্য বক্তা হিচাপে অংশ গ্ৰহণ কৰি এই বক্তব্য দাঙি ধৰে বঙাইগাঁও মহাবিদ্যালয়ৰ জ্যেষ্ঠ অধ্যাপিকা ডঃ ৰূপাঞ্জলী দেৱীয়ে ৷ সাংবাদিক কুঞ্জ মোহন ৰায়ে আঁত ধৰা অনুষ্ঠানটিত অধ্যাপিকা দেৱীয়ে বিশিষ্ট লেখক-সাংবাদিক দাসৰ অৱসৰী জীৱনৰ সৃষ্টিশীলতা আৰু কৰ্মনুশীলতাৰ প্ৰৱণতা স্বীকাৰ কৰিবলগীয়া বুলি কৈ তেঁঁৱৰ বৰ্ণময় অভিজ্ঞতাৰ সোঁৱৰণ কৰিবলৈ পাই পুলকিত হোৱা বুলি মন্তব্য কৰে ৷ 

উল্লেখ্য যে অনুষ্ঠানটিৰ আৰম্ভণিতে কেক কাটি দাসলৈ বিভিন্ন জনে ওপজাদিনৰ শুভেচ্ছা আৰু অভিনন্দন জনায় ৷ বৃহত্তৰ বঙাইগাঁও প্ৰেছ ক্লাবৰ সভাপতি ৰঞ্জিত কুমাৰ শৰ্মাৰ পৌৰোহিত্যত অনুষ্ঠিত অনুষ্ঠানটিৰ সন্দৰ্ভত নগাঁৱৰ সাংবাদিক প্ৰাঞ্জল বৰদলৈয়ে জীৱন কালতেই কৰা শ্ৰদ্ধা আৰু সেৱাইহে মানুহক নতুন জীৱন দিয়াৰ লগতে মানুহৰ মানৱীয় গুণৰাশিক জিলিকাই তোলে বুলি  উদ্দেশ্য ব্যাখ্যাৰ লগতে প্ৰকাশ কৰা বক্তব্যৰ বিপৰীতে অসম চৰকাৰৰ অৱসৰপ্ৰাপ্ত প্ৰশাসনীয় বিষয়া ৰোহিনী কুমাৰ চৌধুৰীয়ে ভাৰত চৰকাৰৰ  ইনফৰমেশ্যন অফিচাৰ হিচাপে গুৰু দায়িত্ব পালন কৰাৰ বাবেই দাসে এই পৰ্যন্তও লিখনিৰ ধাৰা  অব্যাহত ৰাখিছে বুলি দোহাৰাৰ লগতে চৌধুৰীয়ে সুহুৰিৰে সুধাকণ্ঠৰ 'স্নেহে আমাৰ শতশ্ৰাৱনৰ’ শীৰ্ষক কালজয়ী গীতটি পৰিবেশন কৰি সকলোকে মুুুগ্ধ কৰি তোলে ৷ অনুষ্ঠানটিত বিশিষ্ট ব্যক্তিসকলৰ  পৰা ওপজাদিনৰ শুভেচ্ছা - অভিনন্দন গ্ৰহণ কৰি অশীতিপৰ ভূপেন্দ্ৰ চন্দ্ৰ দাসে অতীতৰ সুমধুৰ স্মৃতি সুঁৱৰি সাংবাদিকতাৰ বিভিন্ন প্ৰত্যাহ্বানমূলক  সমস্যা সমূহৰ বিষয়ে উল্লেখ কৰি ন'ষ্টালজিক হৈ পৰে ৷ অনুষ্ঠানত দাসৰ পত্নী বাণী দাস, বঙাইগাঁৱৰ বিশিষ্ট পেথল’জিষ্ট ডাঃ কাবেৰী দাস হাজৰিকা, দিশিতা হাজৰিকা, পপী বৰা, নমিতা চৌধুৰী, লাইলীন থাম, জ্যেষ্ঠ চিকিৎসক বিদ্যুত বিকাশ চৌধুৰী প্ৰমুখ্যে বহুকেইগৰাকী গুণী-জ্ঞানী লোক উপস্থিত থকা অনুষ্ঠানটিৰ অন্তত সাংবাদিক কুঞ্জ মোহন ৰায়ৰ শলাগৰ শৰাইৰে অনুষ্ঠানৰ সামৰণি পৰে ৷🔯