🔯চিৰাঙত স্বাস্থ্য বিভাগৰ কাৰ্যালয় আৰু সভাকক্ষ উদ্বোধন🔯

🔯চিৰাঙত স্বাস্থ্য বিভাগৰ কাৰ্যালয় আৰু সভাকক্ষ উদ্বোধন🔯

📝বঙাইগাঁওঃ ৪ জুনঃ চিৰাঙ জিলাৰ উপাযুক্ত নৰেন্দ্ৰ কুমাৰ শ্বাহে শনিবাৰে কাজলগাঁৱত চিৰাঙৰ স্বাস্থ্য আৰু পৰিয়াল কল্যাণ বিভাগৰ তিনিটা নতুন কাৰ্যালয় ভৱন আৰু এটা সভাকক্ষ উদ্বোধন কৰে ৷ তেওঁ অতিৰিক্ত মুখ্য চিকিৎসা আৰু স্বাস্থ্য বিষয়াৰ নতুন কাৰ্যালয়, ৰাষ্ট্ৰীয় ভেক্টৰ বৰ্ণ ৰোগ নিয়ন্ত্ৰণ কাৰ্যসূচীৰ কাৰ্যালয়, সংহত ৰোগ নিৰীক্ষণ কাৰ্যসূচীৰ কাৰ্যালয় আৰু জিলা স্বাস্থ্য সমিতিৰ সভাকক্ষটো আনুষ্ঠানিকভাৱে উদ্বোধন কৰে ৷ এই অনুষ্ঠানত বিজনীৰ মহকুমাধিপতি ৰাহুল গুপ্তা, চিৰাং জিলা স্বাস্থ্য বিভাগৰ ভাৰপ্ৰাপ্ত যুটীয়া সঞ্চালক ডাঃ ডি ৰামচিয়াৰী,স্বাস্থ্য বিভাগৰ অন্যান্য বিষয়া আৰু কৰ্মচাৰীসক উপস্থিত থাকে ৷  

উল্লেখযোগ্য যে এই ভৱনসমূহ চলিত বৰ্ষৰ ১২ ফেব্ৰুৱাৰীলৈকে ভাৰতীয় সেনাই শিবিৰ হিচাপে ব্যৱহাৰ কৰিছিল আৰু তেওঁলোকে খালী কৰাৰ লগে লগে চিৰাং জিলা প্ৰশাসনৰ উদ্যোগত এই সকলোবোৰ স্বাস্থ্য বিভাগৰ কাৰ্যালয়লৈ ৰূপান্তৰিত কৰা হয় ৷ এই উপলক্ষে নতুন সভাগৃহত স্বাস্থ্য বিভাগৰবিষয়াসকলৰ সৈতে অনুষ্ঠিত এক অনুষ্ঠানত উপায়ুক্ত শ্বাহে কয় যে এই সুবিধাসমূহে সকলোৰে বাবে সুলভ স্বাস্থ্যসেৱা প্ৰদান কৰাত গুৰুত্বপূৰ্ণ ভূমিকা পালন কৰিব।  তেওঁ স্বাস্থ্য বিভাগৰ বিষয়াসকলক আৰ্তজন আৰু দৰিদ্ৰ লোকসকলক সৰ্বাধিক স্বাস্থ্য সেৱা আগবঢ়োৱাৰ উদ্দেশ্যেৰে কঠোৰ পৰিশ্ৰম কৰিবলৈ কয় যাতে চিৰাং জিলাক সুস্থ আৰু শান্তিপূৰ্ণ জিলা কৰি তুলিব পৰা যায় ৷ উল্লেখ্য যে উপায়ুক্ত নৰেন্দ্ৰ কুমাৰ শ্বাহে ভৱন চৌহদত বিশ্ব পৰিৱেশ দিৱস উপলক্ষে এডাল গছপুলিও ৰোপণ কৰে।🔯