🔯চিৰাঙৰ বানাক্ৰান্ত অঞ্চল পৰিদৰ্শন কৰি জিলা প্ৰশাসনৰ বিষয়াবৰ্গৰে বানপানীৰ ক্ষয়-ক্ষতি সন্দৰ্ভত পৰ্য্যালোচনা মন্ত্ৰী বিমল বড়াৰ🔯

🔯চিৰাঙৰ বানাক্ৰান্ত অঞ্চল পৰিদৰ্শন কৰি জিলা প্ৰশাসনৰ বিষয়াবৰ্গৰে বানপানীৰ  ক্ষয়-ক্ষতি সন্দৰ্ভত পৰ্য্যালোচনা মন্ত্ৰী বিমল বড়াৰ🔯 

📝কাজলগাঁও, ২৮ জুন: ৰাজ্য চৰকাৰৰ নিৰ্দেশ অনুসৰি মঙ্গলবাৰে চিৰাং জিলাত অসম চৰকাৰৰ উদ্যোগ, বাণিজ্য আৰু ৰাজহুৱা উদ্যোগ তথা সাংস্কৃতিক বিভাগৰ মন্ত্ৰী বিমল বড়াই বানপীড়িত ৰাইজৰ সাম্প্ৰতিক পৰিস্থিতি বুজ লোৱাৰ লগতে জিলাখনত বানে কৰা ক্ষয়-ক্ষতিৰ পৰ্য্যালোচনা কৰি এক সঠিত চিত্ৰ চৰকাৰৰ সন্মুখত দাঙি ধৰাৰ উদ্দেশ্যেৰে চিৰাং উপস্থিত হয়। মন্ত্ৰী গৰাকীয়ে জিলাখনত উপস্থিত হৈয়েই পোন প্ৰথমে বিজনী ৰাজহ চক্ৰৰ অন্তর্গত ১ নং ফাগুনাগাঁৱত থকা আশ্ৰয় শিবিৰ পৰিদৰ্শন কৰি বন্যাৰ্তৰ সৈতে মত বিনিময় কৰি তেওঁলোকৰ অৱস্থা বুজ লয় আৰু চৰকাৰৰ তৰফৰ পৰা গ্ৰহণ কৰিবলগীয়া সকলো প্ৰয়োজনীয় ব্যস্থাপনাৰ আশ্বাস প্ৰদান কৰে। ইয়াৰ পিছত মন্ত্ৰীগৰাকীয়ে খুজ্ৰাবগুৰী ৰাজহ গাঁৱৰ খহনীয়া প্ৰভাৱিত স্থানসমূহ পৰিদৰ্শন কৰি পৰিস্থিতিৰ বুজ লয় আৰু জলসম্পদ বিভাগৰ বিষয়াসকলক পৰ্কুপাইন স্থাপনৰ সৈতে নদীৰ পাৰ সুৰক্ষাৰ কাম লগতে তাৎক্ষণিক ভাৱে প্ৰশমনমূলক ব্যৱস্থা গ্ৰহণ কৰিবলৈ নিৰ্দেশ দিয়ে। এই ভ্ৰমণ কালত তেওঁৰ সৈতে বিজনী সমষ্টিৰ বিধায়ক অজয় ​​কুমাৰ ৰায়, অসম চৰকাৰৰ জ্যেষ্ঠ সচিব ড০ লক্ষ্মণন এছ, চিৰাঙৰ উপাযুক্ত নৰেন্দ্ৰ কুমাৰ শ্বাহ, আৰক্ষী অধীক্ষক প্ৰাণজিৎ বৰা, অতিৰিক্ত উপায়ুক্ত আৰু জিলাৰ অন্যান্য বিষয়াসকলে উপস্থিত থাকে।

ইয়াৰ পিচতে জিলা সদৰ কাজলগাঁওস্থিত জিলা উপায়ুক্তৰ কাৰ্য্যালয়ত উপস্থিত হৈ সভাকক্ষত জিলা উপায়ুক্ত আৰু অন্যান্য জ্যেষ্ঠ প্ৰশাসনীয় বিষয়াৰ উপস্থিতিত জিলাখনৰ বিভিন্ন বিভাগৰ মুৰব্বী বিষয়া তথা আন সংশ্লীষ্ট বিষয়াৰে সৈতে এখন বান পৰ্য্যালোচনা সভা সম্বোধন কৰে। এই পৰ্য্যালোচনা সভাখনৰ জৰিয়তে মন্ত্ৰী গৰাকীয়ে জিলাখনৰ বানপানীৰ পৰৱৰ্তী সময়ছোৱাৰ স্থিতি সম্পৰ্কে এক স্পষ্ট ছৱি আয়ত্ত কৰাৰ চেষ্টা কৰে। মন্ত্রী বৰাই লোক নিৰ্মাণ বিভাগ, জলসম্পদ, পশুপালন ও পশু চিকিৎসা, মীন, কৃষি, জনস্বাস্থ্য ও কাৰিকৰী, শক্তি, শিক্ষা ইত্যাদি বিভাগ সমূহৰ অধীনত বৰ্তমানলৈ চলোৱা সমীক্ষা অনুসৰি কিমান ক্ষয়-ক্ষতি হৈছে সেয়া জানিবলৈ চেষ্টা কৰাৰ লগতে সমূহ বিভাগক সোনকালে নিজৰ নিজৰ বিভাগীয় ক্ষয়-ক্ষতিৰ সম্পূৰ্ণ তথ্য জিলা প্ৰশাসনৰ হাতত জমা দিয়াৰ বাবে নিৰ্দেশ দিয়ে। মন্ত্রী গৰাকীয়ে  সকলোকে ক্ষয়-ক্ষতিৰ তালিকা প্ৰস্তুত কৰোঁতে প্ৰকৃত হিতাধিকাৰীয়ে যাতে চৰকাৰী সাহায্যৰ পৰা বঞ্চিত নহয় তথা বাদ পৰি নাযায় সেইটো লক্ষ্য কৰিবলৈ আহ্বান জনাই।🔯