🔯বঙাইগাঁৱৰ বিভিন্ন স্থানত কলাগুৰু বিষ্ণু প্ৰসাদ ৰাভাৰ স্মৃতি দিৱসৰ আয়োজন🔯

🔯বঙাইগাঁৱৰ বিভিন্ন স্থানত কলাগুৰু বিষ্ণু প্ৰসাদ ৰাভাৰ স্মৃতি দিৱসৰ আয়োজন🔯 

📝বঙাইগাঁওঃ ১৯ জুনঃ নিখিল ৰাভা ছাত্ৰ সন্থাৰ বঙাইগাঁও জিলা সমিতি তথা শংকৰঘোলা আঞ্চলিক সমিতিৰ যৌথ উদ্যোগত আৰু স্থানীয় ৰাইজৰ সহযোগত কাইলৈ ২০ জুনত বঙাইগাঁও জিলাৰ ঐতিহাসিক  ভৈৰৱচূড়া পাহাৰৰ নামনিৰ ১২৫ নম্বৰ শংকৰঘোলা প্ৰাথমিক বিদ্যালয় প্ৰাংগণত কলাগুৰু বিষ্ণু প্ৰসাদ ৰাভাৰ স্মৃতি দিৱসৰ আয়োজন কৰিছে ৷ এদিনীয়া বৰ্ণাঢ্য  কাৰ্যসূচীৰে পালন কৰিবলগীয়া 'ৰাভা দিৱস'ৰ অনুষ্ঠানৰ নিখিল ৰাভা ছাত্ৰ সন্থাৰ বঙাইগাঁও জিলা সমিতিৰ সভাপতি প্ৰমোদ চন্দ্ৰ ৰাভাই পুৱা পতাকা উত্তোলন কৰি অনুষ্ঠানৰ শুভাৰম্ভ কৰিব ৷ ইয়াৰ পিচতে বঙাইগাঁও জিলা ৰাভা সাংস্কৃতিক প্ৰকল্প আৰু গৱেষণা কেন্দ্ৰৰ সভাপতি ভৱেশ্বৰ ৰাভাই স্মৃতি তর্পন কৰাৰ বিপৰীতে শংকৰঘোলা মধ্য ইংৰাজী বিদ্যালয়ৰ প্রধান শিক্ষক বলোৰাম ৰাভাই 'কলাগুৰু বিষ্ণুপ্ৰসাদ ৰাভাৰ প্ৰতিচ্ছবিত মাল্যার্পন' কৰিব ৷সেইদৰে শিক্ষক হিমাংশু দাসে গছপুলি ৰোপণ কাৰ্যসূচী ৰূপায়ণ কৰিব৷ ইয়াৰ পিছতে নিখিল ৰাভা সাহিত্য সভাৰ বঙাইগাঁও জিলা সমিতিৰ সম্পাদক দিলীপ ৰাভা আৰু সদৌ ৰাভা কৃষ্টি সন্মিলনৰ বঙাইগাঁও জিলা সমিতিৰ সম্পাদক দ্বীজেন ৰাভাৰ দ্বৈত পৰিচালনাত অনুষ্ঠিত হ’ব ছাত্র-ছাত্ৰী সকলৰ মাজত প্ৰতিযোগিতা মূলক অনুষ্ঠান। বিয়লি ২ বজাত অনুষ্ঠিত হ’ব মুকলি সভা আৰু হাইস্কুল শিক্ষান্ত পৰীক্ষাত সুখ্যাতিৰে উত্তীৰ্ণ হোৱা ৰাভা ছাত্ৰ-ছাত্ৰী সকলক ৰাজহুৱা ভাৱে সম্বৰ্দ্ধনা অনুষ্ঠান ৷নিখিল ৰাভা ছাত্ৰ সন্থাৰ বঙাইগাঁও জিলা সমিতিৰ সভাপতি প্ৰমোদ চন্দ্ৰ ৰাভাৰ পৌৰহিত্যত অনুষ্ঠিত সভাত জিলা সমিতিৰ উপদেষ্টা তথা বঙাইগাওঁ মহকুমা জনজাতি কল্যাণ বোর্ডৰ অধ্যক্ষ মাখন চন্দ্ৰ ৰাভাই মুকলি সভা উদ্বোধন কৰিব ৷ উল্লেখ্য যে উত্তৰ শালমাৰা জিলা ট্রাইবেল সংঘৰ উপদেষ্টা প্ৰণৱ কুমাৰ নাৰ্জাৰী, অসম সাহিত্য সভাৰ কেন্দ্ৰীয় কার্যনির্বাহক সদস্য কামাখ্যা প্ৰসাদ ৰায়, যোগীঘোপা আৰক্ষী চকীৰ ভাৰপ্ৰাপ্ত আৰক্ষী বিষয়া সতীশ সিং, নিখিল ৰাভা সাহিত্য সভাৰ বঙাইগাঁও জিলা সমিতিৰ সভাপতি তাৰিণী কান্ত ৰাভা, নিখিল ৰাভা ৰাভা সাহিত্য সভাৰ উপদেষ্টা ফুলেন চন্দ্ৰ ৰাভা, বঙাইগাঁও জিলা ট্রাইবেল সংঘৰ সম্পাদক চবিন ৰাভা, শংকৰঘোলা গাঁও পঞ্চায়তৰ সভানেত্রী ৰেবাৱতী ৰাভা, ৰাভা সাংস্কৃতিক প্ৰকল্প আৰু গৱেষণা কেন্দ্ৰৰ  বঙাইগাঁৱৰ সম্পাদক চাবেন ৰাভা, সদৌ ৰাভা কৃষ্টি সন্মিলন, বঙাইগাঁও জিলা সমিতিৰ সভাপতি সোমেশ্বৰ ৰাভাই আমন্ত্রিত অতিথি হিচাপে উপস্থিত থাকিব ৷ সন্ধিয়া ৬ বজাত  শংকৰঘোলা আঞ্চলিক পঞ্চায়তৰ সদস্য অৰুণ ৰাভাই বস্তি প্রজ্বলন কৰি অনুষ্ঠানৰ সফল সামৰণি মাৰিব ৷

ইপিনে বঙাইগাঁও জিলা শিল্পী সমাজৰ উদ্যোগত আৰু বঙাইগাঁও শংকৰদেৱ শিশু বিদ্যা নিকেতনৰ সহযোগত বিদ্যালয় প্ৰাংগণত বিষ্ণু ৰাভা দিৱস উদযাপিত হ'ব ৷ পুৱা বন্তি প্ৰজ্বলন আৰু বিষ্ণু ৰাভাৰ প্ৰতিচ্ছবিত মাল্যাৰ্পণৰে শুভাৰম্ভ হ'ব কাৰ্যসূূূচী ৷ ইয়াৰ পিচতে অনুষ্ঠিত হ'ব বিষ্ণু ৰাভা সংগীত প্ৰতিযোগিতা ৷ আবেলি অনুষ্ঠিত হ'ব বঁটা বিতৰণী সভা ৷ সেইদৰে বঙাইগাঁৱৰ বীৰঝৰা পাব্লিক লাইব্ৰেৰীৰ উদ্যোগত আৰু বৰপাৰা নৱজেউতি ক্লাবৰ সহযোগত দুদিনীয়াকৈ কলাগুৰু বিষ্ণু প্ৰসাদ ৰাভা দিৱস উদযাপিত হ'ব ৷ বীৰঝৰা পাব্লিক লাইব্ৰেৰী প্ৰাংগণত অনুষ্ঠিত হ'বলগীয়া বিষ্ণু ৰাভা দিৱসৰ কাৰ্যসূচী অনুসৰি কাইলৈ চিত্ৰাংকণ প্ৰতিযোগিতা,বিষ্ণু ৰাভা সংগীত প্ৰতিযোগিতা অনুষ্ঠিত হ'ব ৷ আনহাতে ২১ জুনত প্ৰদৰ্শিত হ'ব নাট্যকাৰ দ্বিজেন নাথৰ ৰচনা আৰু যোগীৰাজ চক্ৰৱৰ্তীৰ পৰিচালনাৰে শিশু নাট ' লুকা ভাকু ভাল নালাগে' আৰু নাট্যকাৰ মহেন্দ্ৰ বৰঠাকুৰৰ 'সিঁঁচা পানীৰ মাছ' ৷ নাটখনৰ পৰিচালনা সীমান্ত প্ৰতীম চৌধুৰীৰ ৷ ইপিনে অসম কৃষ্টি বিকাশ সংঘ আৰু বৃহত্তৰ বঙাইগাঁও জ্যেষ্ঠ নাগৰিক সন্মিলনীৰ উদ্যোগতো বিষ্ণু প্ৰসাদ ৰাভা দিৱস উদযাপনৰ প্ৰস্তুতি চলিছে ৷ দিৱস উপলক্ষে আন কাৰ্যসূচীৰ লগতে শিল্পী সম্বৰ্ধনা আৰু গ্ৰন্থ উন্মোচনী অনুষ্ঠান অনুষ্ঠিত হ'ব ৷ 🔯