🔯বৃহৎ আয়োজনেৰে নহয়, অনুষ্টুপীয়া কাৰ্যসূচীৰেহে ৩০ জুনত মুকলি কৰা হ'ব কমতাপুৰ স্বায়ত্বশাসিত পৰিষদৰ সচিবালয়🔯

🔯সাম্প্ৰতিক বান পৰিস্থিতি🔯

🔯বৃহৎ আয়োজনেৰে নহয়, অনুষ্টুপীয়া কাৰ্যসূচীৰেহে ৩০ জুনত মুকলি কৰা হ'ব কমতাপুৰ স্বায়ত্বশাসিত পৰিষদৰ সচিবালয়🔯

📝বঙাইগাঁওঃ ২২ জুনঃ বৃহৎ আয়োজনেৰে নহয় ,বৰং অনুষ্টুপীয়া কাৰ্যসূচীৰেহে ৩০ জুনত বঙাইগাঁও জিলাৰ উত্তৰ শালমাৰাত মুকলি কৰা হ'ব কমতাপুৰ স্বায়ত্বশাসিত পৰিষদৰ সচিবালয় ৷ বুধবাৰে বৃহত্তৰ বঙাইগাঁও প্ৰেছ ক্লাবত আয়োজন কৰা এক  সংবাদমেলত কেএচিৰ উপাধ্যক্ষ সুকেন ৰায়ে এই কথা প্ৰকাশ কৰে ৷ উপাধ্যক্ষগৰাকীয়ে সংবাদমেলত জানিব দিয়া মতে পূৰ্বে অহা ৩০ জুনৰ এই সচিবালয় মুকলি অনুষ্ঠানটো বৃহৎ আয়োজনেৰে অনুষ্ঠিত কৰাৰ বাবে সিদ্ধান্ত গ্ৰহণ গ্ৰহণ কৰা হৈছিল ৷ কিন্তু ৰাজ্যখনত দেখা দিয়া ভয়াৱহ বান পৰিস্থিতিৰ বাবে পূৰ্বৰ এই সিদ্ধান্ত বাতিল কৰি অনুষ্টুপীয়াকৈ এই অনুষ্ঠান অনুষ্ঠিত কৰাৰ সিদ্ধান্ত লোৱা হৈছে ৷ পূৰ্বৰ কাৰ্যসূচী মতে কেএচিৰ সচিবালয় উদ্বোধনী অনুষ্ঠানত মুখ্যমন্ত্ৰী ডঃ হিমন্ত বিশ্ব শৰ্মাৰ লগতে মন্ত্ৰী ডাঃ ৰণোজ পেগু, ৰণজিৎ কুমাৰ দাস,  পীয়ুষ হাজৰিকা, জয়ন্ত মল্ল বৰুৱা আদিক আমন্ত্ৰণ জনোৱাৰ সিদ্ধান্ত লোৱা হৈছিল আৰু উদ্বোধনী অনুষ্ঠানত কমেও লক্ষাধিক লোকৰ সমাগম কৰাৰ উদ্যোগ লোৱা হৈছিল ৷ কিন্তু বৰ্তমানৰ বান পৰিস্থিতিৰ পৰিপ্ৰেক্ষিতত এই সিদ্ধান্ত বাতিল কৰা হৈছে ৷ ফলত সচিবালয় মুকলি অনুষ্ঠান উপলক্ষে কোনো সভা অনুষ্ঠিত কৰা নহয় ৷ কেৱল মাংগলিক নীতি নিয়মৰ মাজেৰে কিছু সংখ্যক লোকৰ উপস্থিতিত অনুষ্টুপীয়া কাৰ্যসূচীৰে কেএচিৰ সচিবালয়টো আনুষ্ঠানিকভাৱে মুকলি কৰা হ'ব ৷ এই অনুষ্ঠানলৈ ৰাজ্য চৰকাৰৰ কেইবাগৰাকীও মন্ত্ৰীক আমন্ত্ৰণ জনোৱাৰ বাবে যোগাযোগ চলি আছে যদিও বৰ্তমানলৈকে তেওঁলোকৰ নিশ্চয়তা পোৱা নাই বুলিও জানিবলৈ দিছে উপাধ্যক্ষগৰাকীয়ে ৷ উল্লেখ্য যে কমতাপুৰ স্বায়ত্ত্বশাসিত পৰিষদ গঠন হোৱাৰ পাছত পৰিষদৰ কাম - কাজ চলোৱাৰ বাবে কাৰ্যালয়ৰ প্ৰয়োজন হৈ পৰিছে ৷ কিন্তু কাৰ্যালয়ৰ বাবে কোনো সুবিধাযুক্ত গৃহ নোপোৱাত অৱশেষত বঙাইগাঁও জিলাৰ উত্তৰ শালমাৰাস্থিত ৰাজ্য চৰকাৰৰ পৰ্যটন বিভাগৰ অধীনৰ প্ৰশান্তি ল'জক অস্থায়ী কাৰ্যালয় হিচাপে ব্যৱহাৰৰ সিদ্ধান্ত গ্ৰহণ কৰে পৰিষদে ৷ সেই অনুসৰি ইয়াকে ৩০ জুনত মুকলি কৰা হ'ব কেএচিৰ অস্থায়ী সচিবালয় হিচাপে ৷ সংবাদমেলত কমতাপুৰ স্বায়ত্ত্বশাসিত পৰিষদৰ কাৰ্যবাহী পাৰিষদ অতুল চন্দ্ৰ ৰায় , পূৰৱী সৰকাৰ আৰু গোলাপ পাঠকৰ লগতে সাধাৰণ পাৰিষদ ত্ৰৈলোক্য ৰায় উপস্থিত আছিল ৷🔯