🔯পৃথক কমতাপুৰ ৰাজ্য পুনৰ গঠন আৰু অতিশীঘ্ৰেই কোচ ৰাজবংশী জনগোষ্ঠীৰ জনজাতিকৰণৰ দাবী🔯

🔯পৃথক কমতাপুৰ ৰাজ্য পুনৰ গঠন আৰু অতিশীঘ্ৰেই কোচ ৰাজবংশী জনগোষ্ঠীৰ জনজাতিকৰণৰ দাবী🔯

🔯বঙাইগাঁৱত জিলা সমিতিৰ উদ্যোগত তিনি ঘণ্টীয়া অৱস্থান ধৰ্মঘট কাৰ্যসূচী ৰূপায়ণ🔯 

🔯আমি আৰু চৰকাৰৰ প্ৰতাৰণাত ভোল নাযাও -- ক্ষীতিশ বৰ্মন🔯

📝বঙাইগাঁওঃ ৮ জুনঃ পৃথক কমতাপুৰ ৰাজ্য পুনৰ গঠন আৰু অতিশীঘ্ৰেই কোচ ৰাজবংশী জনগোষ্ঠীৰ জনজাতিকৰণৰ দাবীত পুনৰ আন্দোলন আৰম্ভ কৰিছে আক্ৰাছুৱে ৷ বুধবাৰে কেন্দ্ৰীয় সমিতিৰ নিৰ্দেশ অনুসৰি সংগঠনটোৱে জিলাই জিলাই ৰূপায়ণ কৰে প্ৰতিবাদী কাৰ্যসূচী ৷ বঙাইগাঁৱতো আক্ৰাছুৰ বঙাইগাঁও জিলা সমিতি আৰু কোচ ৰাজবংশী মহিলা সমিতিৰ উদ্যোগত তিনি ঘণ্টীয়া অৱস্থান ধৰ্মঘট কাৰ্যসূচী ৰূপায়ণ কৰে ৷ বঙাইগাঁও চহৰৰ গান্ধী ময়দানত পুৱা ১১ বজাৰ পৰা দিনৰ ২ বজালৈ ৰূপায়ণ কৰা অৱস্থান ধৰ্মঘট কাৰ্যসূচীত জিলা সমিতিৰ লগতে বিভিন্ন আঞ্চলিক সমিতিৰ বিষয়ববীয়া আৰু কৰ্মীসকলে অংশগ্ৰহণ কৰি জনগোষ্ঠীটোৰ নাৰ্য প্ৰাপ্য অধিকাৰৰ দাবীত হাতে হাতে বিভিন্ন প্লেকাৰ্ডলৈ আমি কমতাপুৰ বিচাৰো, জনজাতিকৰণ আমাক লাগিবই , অসম চৰকাৰ হায় হায়, বিজেপি চৰকাৰ হায় হায়, ন এচ টি ন ৰেষ্ট, বিজেপি চৰকাৰ মিছলীয়া আদি শ্লোগান দি উত্তাল প্ৰতিবাদ সাব্যস্ত কৰে ৷ কাৰ্যসূচীৰ অন্তত উপৰোক্ত দাবীত আক্ৰাছুৰ জিলা সমিতিয়ে  ভাৰতৰ প্ৰধানমন্ত্ৰী আৰু অসমৰ মুখ্যমন্ত্ৰীলৈ জিলা উপায়ুক্তৰ জৰিয়তে স্মাৰক পত্ৰ প্ৰেৰণ কৰে ৷ জিলা উপায়ুক্তৰ হৈ জিলাৰ অতিৰিক্ত উপায়ুক্ত পংকজ চমুৱাই প্ৰতিবাদস্থলীত উপস্থিত হৈ স্মাৰক পত্ৰ গ্ৰহণ কৰে ৷ ইপিনে অৱস্থান ধৰ্মঘটস্থলীত অংশলৈ আক্ৰাছুৰ কেন্দ্ৰীয় সভাপতি ক্ষীতিশ বৰ্মন,  কমতাপুৰ স্বায়ত্বশাসিত পৰিষদৰ মুখ্য কাৰ্যবাহী পাৰিষদ গোকুল বৰ্মন, কাৰ্যবাহী পাৰিষদ পূৰবী সৰকাৰ আদিকে ধৰি আক্ৰাছুৰ কেইবাগৰাকীও নেতাই পৃথক কমতাপুৰ ৰাজ্য পুনৰ গঠন আৰু জনজাতিকৰণৰ দাবীৰ সমৰ্থনত বক্তব্য ৰাখে ৷

আনহাতে সংবাদ মাধ্যমৰ আগত আক্ৰাছুৰ সভাপতি ক্ষীতিশ বৰ্মনে কয় যে আক্ৰাছুৱে জনগোষ্ঠীটোৰ নাৰ্য পাপ্য অধিকাৰৰ দাবীত ১৯৯০ চনৰ পৰাই ধাৰাবাহিকভাৱে আন্দোলন কৰি আহিছে ৷ বিশেষকৈ পৃথক কমতাপুৰ ৰাজ্য পুনৰ গঠন, জনজাতিকৰণ, কোচ ৰাজবংশী ভাষাক অষ্টম অনুসুচীত অন্তৰ্ভূক্তিকে ধৰি ৰাজনৈতিক, অৰ্থনৈতিক, সামাজিক আদি বিভিন্ন সমস্যা সমাধানৰ বাবে চৰকাৰক দাবী জনাই আহিছো আৰু আন্দোলন কৰি আহিছো ৷ কিন্তু আজি তিনিটা দশক পাৰ হোৱাৰ পিচতো চৰকাৰে জনগোষ্ঠীটোৰ কাৰণে কোনো ধৰণৰ চিন্তা নকৰিলে ৷ আমি বিজেপি চৰকাৰকো ধিক্কাৰ জনাইছো ৷ কাৰণ জনগোষ্ঠীটোক বিজেপি চৰকাৰেও বাৰম্বাৰ প্ৰতাৰণা কৰি আহিছে ৷ বিজেপি চৰকাৰ শাসনলৈ আহিলেই জনজাতিকৰণ কৰিব বুলি কৈছিল ৷ আনকি প্ৰধানমন্ত্ৰী নৰেন্দ্ৰ মোদীয়ে খোদ কাকৈজানালৈ নিৰ্বাচনী প্ৰচাৰ সভালৈ আহি বিজেপি দল শাসনলৈ আহিলেই ছয় মাহৰ ভিতৰত জনজাতিকৰণ কৰিব ৷ কিন্তু বছৰৰ পিচত বছৰ পাৰ হৈ গ'ল যদিও কোচ ৰাজবংশীৰ জনজাতিকৰণ আৰু কমতাপুৰৰ যি সমস্যা সেয়া সমাধান নহ'ল ৷ আমি দুখ পাইছো ৷ গণতন্ত্ৰৰ যি গণতান্ত্ৰিক মূল্যবোধ সেয়া তেওঁলোকে বগৰাই পেলাব বিচাৰিছে ৷ যাৰ ফলত পূৰ্ব নিৰ্ধাৰিত কাৰ্যসূচী অনুসৰি বুধবাৰে জিলাই জিলাই এইদৰে প্ৰতিবাদী কাৰ্যসূচী ৰূপায়ণ কৰা বুলি উল্লেখ কৰে ৷ লগতে চৰকাৰে যেতিয়ালৈকে জনগোষ্ঠীটোৰ দাবীৰ প্ৰতি গুৰুত্ব নিদিব, তেতিয়ালৈকে ধাৰাবাহিক আন্দোলন চলাই যাব বুলিও কয় ৷ সেইদৰে চৰকাৰে যেতিয়ালৈকে জনগোষ্ঠীটোৰ নাৰ্য পাপ্য দাবী পূৰণ নকৰিব তেতিয়ালৈকে আমিও ভালদৰে চৰকাৰ চলাব নিদিম বুলি কয় ৷ নিৰ্বাচন আহিলেই তেওঁলোকে কয় যে বিজয়ী হলে আমি জনজাতিকৰণ কৰিম ৷ কিন্তু বহু দেখিলো ৷ কেৱল প্ৰতাৰণাই কৰি আহিছে ৷ আমি আৰু এনে প্ৰতাৰণাত ভোল নাযাও ৷ চৰকাৰৰ যদি সঁচাকৈ আন্তৰিকতা আছে, তেতিয়াহলে কাৰ্যকৰী কৰি দেখুৱাওক ৷ আক্ৰাছুৰ সভাপতিগৰাকীয়ে লগতে কয় যে ইয়াৰ পিচত এই দাবীক দিল্লীৰ যন্তৰ - মন্তৰত ধৰ্ণা কাৰ্যসূচী ৰূপায়ণ কৰা হ'ব ৷ একেদৰে আয়োজন কৰা হ'ব গণ সমাৱেশ ৷ তাৰ পিচত ৰে'ল পথ আৰু ৰাষ্ট্ৰীয় ঘাই ঘাইপথ অৱৰোধৰ দৰে কাৰ্যসূচীও আমি ইতিমধ্য গ্ৰহণ কৰিছো ৷ গতিকে আমি আৰু হাত সাৱটি বহি নাথাকো ৷ আমাক আমাৰ নাৰ্য প্ৰাপ্য অধিকাৰ লাগিবই ৷ আনহাতে কেএলঅ লৈ কোচ ৰাজবংশী যুৱক - যুৱতীৰ গমন সন্দৰ্ভত সভাপতি বৰ্মনে কয় যে প্ৰত্যেকৰে নিজা চিন্তাধাৰা আছে আৰু  নিশ্চয়কৈ ক্ষোভিত হৈ সংগঠনলৈ গৈছে ৷ কিন্তু আমি বিচাৰো যাতে আজি আমাৰ নৱ প্ৰজন্মই নিষিদ্ধ সংগঠনলৈ নায়ায় ৷ আমি আমাৰ জনগোষ্ঠীটোৰ যি নাৰ্য প্ৰাপ্য অধিকাৰ সেয়া যাতে আমি গণতান্ত্ৰিক ব্যৱস্থাৰ মাজেৰে আন্দোলন কৰি চৰকাৰৰ পৰা আদায় কৰি আনিব পাৰো তাৰ বাবে বাধ্য কৰিব লাগিব বুলিও নৱ প্ৰজন্ম আহ্বান জনায় ৷  লগতে জংঘললৈ যোৱাসকলক চৰকাৰে আলোচনাৰ মাজেৰে ওভতাই অনাৰ ব্যৱস্থা কৰাটো চৰকাৰৰ দায়িত্ব বুলিও কয় ৷ কাৰণ ইতিমধ্যে চৰকাৰে বিভিন্ন সংগঠনৰ সৈতে আলোচনা কৰি তেওঁলোকৰ সমস্যা সমাধন কৰিবলৈ সক্ষম হৈছে ৷ সেয়ে চৰকাৰৰ সদিচ্ছা থাকিলে চৰকাৰে যি কোনো কাম কৰিব পাৰে বুলিও কয় ৷ কেএলঅ আলোচনাৰ মাজলৈ মাতি আনি তেওঁলোকৰ যি দাবী আছে সেইবোৰ সমাধান কৰক ৷ আলফাৰ লগতো আলোচনা কৰিছিল ৷ আলফাৰ লগতো সমস্যাৰ সমাধন কৰক ৷ শান্তি প্ৰক্ৰিয়া সকলোকে লাগে ৷ 

ইপিনে চৰকাৰ বিৰোধী প্ৰতিবাদী কাৰ্যসূচীত অংশ লৈ কেএচিৰ মুখ্য কাৰ্যবাহী পাৰিষদ গোকুল বৰ্মনে সংবাদ মাধ্যমৰ আগত কয় যে কোচ ৰাজবংশী জনগোষ্ঠীয়ে সুদীৰ্ঘদিন ধৰি জনজাতিকৰণ আৰু কমতাপুৰৰ দাবীত প্ৰতিবাদ সাব্যস্ত কৰি আহিছে ৷ শেহতীয়াভাৱে জনজাতিকৰণৰ বিষয়টো ইতিমধ্যে চূড়ান্ত পৰ্যায়ত উপনীত হৈছে যদিও কিছু অনানুষ্ঠানিকতা থকা কথা পূৰ্বে মুখ্যমন্ত্ৰীয়ে ঘোষণা কৰিছিল ৷  এই বিষয়টো শীঘ্ৰে কাৰ্যকৰী কৰাৰ ক্ষেত্ৰত আক্ৰাছুৰ তৰফৰ পৰা দাবী উত্তাপন কৰি আহিছে ৷ কিন্তু জনগোষ্ঠীটোৰ জনজাতিকৰণৰ বিষয়টো যি দৰে চৰকাৰে গুৰুত্বসহকাৰে লৈ আলোচনা অনুষ্ঠিত কৰিব লাগিছিল, সেই ক্ষেত্ৰত কিছু পলম হৈছে ৷ সেই কাৰণে অতিশীঘ্ৰে জনজাতিকৰণৰ সমস্যাটো সমাধান কৰাৰ কাৰণে কেএচিৰ তৰফৰ পৰা মুখ্যমন্ত্ৰীক আহ্বান জনাইছে বুলি কৈ এই ক্ষেত্ৰত অতি কম দিনৰ ভিতৰতে মুখ্যমন্ত্ৰীগৰাকীয়ে আনুষ্ঠানিক বৈঠকলৈ আমন্ত্ৰণ কৰিব বুলিও কথা দিয়া বুলি কয় ৷ মুখ্য পাৰিষদগৰাকীয়ে লগতে কয় যে এই প্ৰতিবাদী কাৰ্যসূচীস্থলীৰ পৰা গৈয়ে মুখ্যমন্ত্ৰীৰ ৰাজনৈতিক সচিব জয়ন্ত মল্ল বৰুৱাৰ সৈতে আলোচনা কৰিব ৷ আনহাতে আক্ৰাছু, কোচ ৰাজবংশী মহিলা সমিতিৰ লগতে জনগোষ্ঠীটোৰ যিমান দল - সংগঠন আছে তথা কেএচিয়েও ইতিমধ্যে সিদ্ধান্ত গ্ৰহণ কৰি প্ৰস্তাৱ গ্ৰহণ কৰিছে যে অচিৰেই জনগোষ্ঠীটোক চৰকাৰে জনজাতিকৰণ কৰিব লাগে ৷ সেই দাবীৰ প্ৰস্তাৱ অহা ৩০ জুনত উত্তৰ শালমাৰাত যি কেএচিৰ মুখ্য কাৰ্যালয় মুকলি অনুষ্ঠানত মুখ্যমন্ত্ৰীক আমন্ত্ৰণ জনাইছো তাতে প্ৰদান কৰা হ'ব যদিহে তেওঁ উপস্থিত থাকে ৷ লগতে সিদিনাই আমি আশা কৰিম যে জনজাতিকৰণৰ দাবী সন্দৰ্ভভ মুখ্যমন্ত্ৰীগৰাকীয়ে কিবা এটা প্ৰতিশ্ৰুতি দিব ৷ ইপিনে প্ৰতিবাদস্থলীত দিয়া বক্তব্যত মুখ্য কাৰ্যবাহী পাৰিষদগৰাকীয়ে কয় যে জাতি আগত, চৰকাৰ পিচত ৷ সেয়ে কেএচিয়ে যেতিয়ালৈকে জনজাতিকৰণ আৰু কমতাপুৰৰ সমস্যা সমাধান নহ'ব তেতিয়ালৈকে আক্ৰাছুৱে গ্ৰহণ কৰা প্ৰতিটো কাৰ্যসূচীত পূৰ্ণ সমৰ্থন আৰু সহায় সহযোগিতা কৰি যাম ৷ উল্লেখ্য যে কেএচিৰ মুখ্য কাৰ্যবাহী পাৰিষদগৰাকীয়ে জনজাতিকৰণ আৰু কমতাপুৰৰ দাবীত নানা শ্লোগানো দিয়ে ৷ প্ৰতিবাদী কাৰ্যসূচীত জিলা আক্ৰাছুৰ সভাপতি সঞ্জীৱ কুমাৰ ৰায় কোচ ,  সাধাৰণ সম্পাদক শিৱেন নাৰায়ণ দেৱৰ লগতে জিলা সমিতিৰ বিষয়ববীয়া, মহিলা সমিতিৰ বিষয়ববীয়া আৰু ৰেন্দ্ৰীয় সমিতিৰ বিষয়ববীয়াও উপস্থিত থাকে ৷🔯