🔯যোৰহাটত শিক্ষামন্ত্ৰী ডাঃ ৰণোজ পেগুৰ উপস্থিতিত শিক্ষা বিভাগৰ জ'নেল ভিত্তিক পৰ্যালোচনা সভা🔯

🔯যোৰহাটত শিক্ষামন্ত্ৰী ডাঃ ৰণোজ পেগুৰ উপস্থিতিত শিক্ষা বিভাগৰ জ'নেল ভিত্তিক পৰ্যালোচনা সভা🔯

📝News4Bongaigaon:২ জুলাইঃ অসম চৰকাৰৰ শিক্ষা বিভাগৰ প্ৰাথমিক আৰু মাধ্যমিক শিক্ষাৰ বিভিন্ন দিশসমূহ সাঙুৰি আজি শিক্ষামন্ত্ৰী ডাঃ ৰণোজ পেগুৰ লগতে বিভাগৰ উচ্চ পদস্থ বিষয়াসকলৰ উপস্থিতিত উজনি অসমৰ ৮ খন জিলাৰ সমূহ শিক্ষা বিষয়াসকলৰ সৈতে যোৰহাট আৱৰ্ত ভৱনৰ সভাকক্ষত এখন পৰ্যালোচনা সভা অনুষ্ঠিত হয়৷ উক্ত সভাত যোৰহাট, শিৱসাগৰ, চৰাইদেউ, মাজুলী, গোলাঘাট, ডিব্ৰুগড়, তিনিচুকীয়া আৰু নগাঁও জিলাৰ সকলো শিক্ষাবিষয়াক লৈ বিভাগীয় পৰ্যালোচনা কৰা হয়৷ইপিনে শিক্ষামন্ত্ৰী ডা: ৰণোজ পেগুৱে পৰ্যালোচনা সভাখনত উপস্থিত থাকি বিদ্যালয়সমূহৰ একত্ৰিকৰণ, প্ৰাদেশিকীকৰণ, নৱনিযুক্ত শিক্ষকসকলৰ যোগদান, শিক্ষকসকলৰ সমস্যা দূৰ কৰা, বিজ্ঞানৰ প্ৰতি ছাত্ৰ ছাত্ৰীসকলক আগ্ৰহী কৰোৱা আদি বিভিন্ন দিশ সন্দৰ্ভত সংশ্লিষ্ট বিষয়াসকলৰ লগত আলোচনা কৰে৷ বিদ্যালয় একত্ৰিকৰণৰ বাবে জিলাসমূহে বিদ্যালয়ৰ নাম বাছনি কৰাৰ ক্ষেত্ৰত বিষয়াসকলে নিজে উপস্থিত থাকি বিদ্যালয়ৰ ছাত্ৰ ছাত্ৰীৰ সংখ্যা,পৰিৱেশ আদি সকলো দিশ সুক্ষ্ম দৃষ্টিৰে চাইহে চৰকাৰলৈ প্ৰ'পজেল প্ৰেৰণ কৰিবলৈ মন্ত্ৰীগৰাকীয়ে নিৰ্দেশ দিয়ে৷ ৰাজ্যখনৰ জিলাসমূহক মুঠ ৭ টা জ'নত ভাগ কৰি কেইবাখনো জিলাৰ শিক্ষা বিষয়াসকলক লৈ এই পৰ্যালোচনা সভা অনুষ্ঠিত কৰা হৈছে ৷ ইতিমধ্যে গুৱাহাটী আৰু ধেমাজীত উক্ত সভা অনুষ্ঠিত হৈ গৈছে৷ 

উল্লেখ্য যে জিলাকেইখনৰ হাইস্কুল শিক্ষান্ত পৰীক্ষাৰ ফলাফল শূণ্য তথা সন্তোষজনক নোহোৱা বিদ্যালয়সমূহৰ বিষয়েও সভাত আলোচনা কৰা হয়৷আনহাতে  ওচৰ চুবুৰীয়া বিদ্যালয়সমূহত মাজে মাজে এখন বিদ্যালয়ৰ শিক্ষকসকলে আন এখন বিদ্যালয়ত পাঠদান কৰিলে ছাত্ৰ ছাত্ৰীসকল অধিক উপকৃত হোৱাৰ সন্দৰ্ভতো সভাত আলোচনা কৰা হয়৷সভাত যোৰহাট জিলাৰ অভিভাৱক সচিব তথা মাধ্যমিক শিক্ষা বিভাগৰ সচিব ভাৰত ভূষণ দেৱচৌধুৰীয়ে কয় যে শিক্ষা বিভাগে চৰকাৰী বিদ্যালয়সমূহত গুণগত মানদণ্ডৰ শিক্ষা প্ৰদানৰ ক্ষেত্ৰত গুৰুত্ব প্ৰদান কৰি আহিছে৷ শিক্ষা প্ৰসাৰৰ ক্ষেত্ৰত বিদ্যালয়সমূহত কোনোধৰণৰ বাধাৰ সৃষ্টি নোহোৱাকৈ শিক্ষা প্ৰদান কাৰ্য সম্পন্ন কৰাৰ প্ৰতি লক্ষ্য ৰাখি বিভাগে এনেধৰণৰ আলোচনা সভা অনুষ্ঠিত কৰাত গুৰুত্ব প্ৰদান কৰিছে, যাতে সকলো শিক্ষা বিষয়াই মুক্তভাবে অসুবিধাসমূহৰ বিষয়ে অৱগত কৰিব পাৰে৷পৰ্যালোচনা সভাত অসম চৰকাৰৰ প্ৰাথমিক শিক্ষা বিভাগৰ সচিব ড০ বিজয়া চৌধৰী, প্ৰাথমিক আৰু মাধ্যমিক শিক্ষা সঞ্চালকদ্বয় ক্ৰমে সুৰঞ্জনা সেনাপতি আৰু মমতা হোজাই, জিলা প্ৰশাসনৰ জ্যেষ্ঠ বিষয়াসকল, ৮ খন জিলাৰ বিদ্যালয়সমূহৰ পৰিদৰ্শকসকলৰ লগতে জিলা প্ৰাথমিক শিক্ষা বিষয়াসকল আৰু খণ্ড প্ৰাথমিক শিক্ষা বিষয়াসকল উপস্থিত থাকে৷🔯