🔯বঙাইগাঁও জিলা নিখিল ভাৰত গণতান্ত্ৰিক মহিলা সমিতিৰ মুখ্যমন্ত্ৰীলৈ স্মাৰকপত্ৰ🔯

🔯বঙাইগাঁও জিলা নিখিল ভাৰত গণতান্ত্ৰিক মহিলা সমিতিৰ মুখ্যমন্ত্ৰীলৈ স্মাৰকপত্ৰ🔯 

🔯আকাশলংঘী মূল্যবৃদ্ধি ৰোধ কৰাৰ লগতে  বানাক্ৰান্তক পৰ্যাপ্ত সাহায্য প্ৰদান আদিৰ দাবী🔯

📝বঙাইগাঁওঃ ৭ জুলাই: নিখিল ভাৰত গণতান্ত্ৰিক মহিলা সমিতিৰ বঙাইগাঁও জিলা সমিতিয়ে বৃহস্পতিবাৰে ৰাজ্যজোৰা কাৰ্যসূচীৰ অংশ হিচাপে বঙাইগাঁও  জিলাৰ  উপায়ুক্তৰ জৰিয়তে পেট্ৰ'ল, ডিজেল, ৰন্ধন গেছকে ধৰি অত্যাৱশ্যকীয় সামগ্ৰীৰ আকাশলংঘী মূল্যবৃদ্ধি ৰোধ কৰাৰ লগতে  বানাক্ৰান্তক পৰ্যাপ্ত সাহায্য প্ৰদান আদিৰ দাবীত  অসমৰ মুখ্যমন্ত্ৰীলৈ  এখন স্মাৰকপত্ৰ প্ৰদান কৰে । জিলা সমিতিৰ সভানেত্ৰী তষ্ণা মেধি আৰু সম্পাদিকা কল্যাণী পাঠকৰ নেতৃত্বত প্ৰতিনিধি দল এটিয়ে জিলা উপায়ুক্তৰ জৰিয়তে মুখ্যমন্ত্ৰীলৈ প্ৰেৰণ কৰা স্মাৰক পত্ৰত পেট্ৰ'ল- ডিজেল, ৰন্ধন গেছ আৰু অত্যাৱশ্যকীয় সামগ্ৰীৰ মূল্য ৰোধ কৰা ,সকলোকে চাউল, আটা, দাইল, মিঠাতেল, চেনি, নিমখ আদি সস্তা দামত যোগান ধৰাৰ লগতে ডিজিটেল ৰেচন কাৰ্ডৰ নামত হাৰাশাস্তি বন্ধ কৰা আৰু ৰাজহুৱা বিতৰণ ব্যৱস্থা শক্তিশালী কৰা, বানপানী, গৰাখহনীয়াত ক্ষতিগ্ৰস্থ  সকলক পৰ্যাপ্ত সাহাৰ্য আৰু গৰাখহনীয়াত ভেঁটি মাটি হেৰুৱাসকলক পুনৰ সংস্থাপনৰ ব্যৱস্থা কৰা, অসমৰ বানপানীক ৰাষ্ট্ৰীয় সমস্যা হিচাপে স্বীকৃতি দিয়া, ভূটানত যধে মধে বান্ধ নিৰ্মাণ বন্ধ কৰা আৰু বান্ধৰ পানী নিয়ন্ত্ৰণ কৰা, বানত ক্ষতিগ্ৰস্থ মথাউৰিসমূহ বিজ্ঞানসন্মত ভাৱে নিৰ্মাণ কৰা, ভগ্ন ৰাষ্টা - ঘাট, দলংসমূহ অতিশীঘ্ৰে নিৰ্মাণ কৰি যাতায়ত ব্যৱস্থা সুচল কৰা, চৰকাৰী আৰু ৰাজহুৱা খণ্ডৰ সকলো খালীপদ নিয়োগ বিনিময় কেন্দ্ৰৰ জৰিয়তে পূৰণ  কৰা, নাৰীৰ ওপৰত চলা সকলো ধৰণৰ নিৰ্যাতন বন্ধ কৰা আৰু নিৰ্যাতনকাৰী, ধৰ্ষণকাৰীসকলক কঠোৰ শাস্তি প্ৰদান কৰাৰ দাবী জনায় ৷ ইপিনে জিলা সমিতিৰ নেতৃত্বই কয় যে অসমত জুনৰ দ্বিতীয় সপ্তাহৰ পৰা  হোৱা দ্বিতীয়টো ভয়াৱহ বানে বিস্তৰ ক্ষতি সাধন কৰে। অসমৰ ৩৫ খন জিলাৰ ৩২  খনেই বানৰ কবলত পৰিছে। বাতৰি কাকতত প্ৰকাশ পোৱা মতে ১৭৮ গৰাকী মানুহৰ মৃত্যু হৈছে। প্ৰায় ৬০ লাখ মানুহ আৰু পাঁচ হেজাৰৰ ওপৰত গাঁও বানপানীত ক্ষতিগ্ৰস্ত হৈছে। 

এই প্ৰলংকৰী বান আৰু ভূমিস্খলনত  মানুহৰ ঘৰ-বাৰী, সা-সম্পত্তি, খেতি পথাৰ, ৰাস্তা, পদূলি ,গছ-গছনি,পশুধন আদিৰ বিস্তৰ ক্ষতি হয়। বৰাকৰ ভয়াবহ বানে শিলচৰ চহৰ বৰ্তমানো ডুবাই ৰাখিছে।আৱদ্ধ পানীৰ মাজত, মথাউৰিত বান বিধ্বস্ত ৰাইজে জীয়াতু ভূগি আছে। বহু কেইখন জিলাৰ ৰাইজৰ অৱস্থা অতি শোচনীয়। বানে ঘৰৰ ভেঁটি পৰ্যন্ত উটুৱাই নিচিহ্ন কৰিছে। ভঁৰালৰ শস্য, কাপোৰ কানি,ব্যৱহাৰ্য সামগ্ৰী একো নাই। কিন্তু অতি পৰিতাপৰ কথা যে, আশ্ৰয় শিবিৰত চৰকাৰী ত্ৰাণ ব্যৱস্থা পৰ্যাপ্ত নোহোৱাত তথা ত্ৰাণসামগ্ৰী সঠিক ভাবে বিতৰণ নোহোৱাত মানুহে দুৰ্বিসহ জীৱন কটাবলগীয়া হৈছে। অসমৰ ৰাইজ বানত ককবকাই থকা অৱস্থাত অসমৰ চৰকাৰ আৰু কেন্দ্ৰীয় চৰকাৰ ব্যস্ত মহাৰাষ্ট্ৰৰ ৰাজনীতিৰ পাশা খেলত। প্ৰধানমন্ত্ৰী দূৰৈৰ কথা, কোনো এজন কেন্দ্ৰীয় মন্ত্ৰীয়েও অসমৰ বান ক্ষতিগ্ৰস্ত ৰাইজৰ খবৰ লবলৈ, ক্ষয়-ক্ষতি ৰ বুজ ল'বলৈ অহা নাই। অসমৰ ৰাইজক কেৱল ভোটৰ সময়তহে প্ৰধানমন্ত্ৰী আৰু শাসক দলটোৰ মনত পৰে। আজিলৈকে অসমৰ বানপীড়িত ৰাইজৰ বাবে এটকা সাহায্যও কেন্দ্ৰীয় চৰকাৰে ঘোষণা কৰা নাই। বান নিয়ন্ত্ৰণৰ বাবে কেন্দ্ৰীয় চৰকাৰৰ পৰা অহা ধন মোদী চৰকাৰৰ আমোলত ধাৰাবাহিক ভাৱে হ্ৰাসহে পাইছে।বান সমস্যাই প্ৰতি বছৰে অসমৰ অৰ্থনীতিৰ ৰাজহাড় ভাঙি আছে। বান সমস্যাৰ স্থায়ী সমাধান অবিহনে অসমৰ উন্নয়ন অসম্ভৱ। অসমৰ ৰাইজ দল-মত নিৰ্বিশেষে বান সমস্যাৰ স্থায়ী সমাধানৰ বাবে ঐক্যবদ্ধ হোৱা আৰু কেন্দ্ৰীয় চৰকাৰৰ ওপৰত হেঁচা প্ৰয়োগ কৰা অতি প্ৰয়োজন।🔯